ಕನಸಿನ 'ಪ್ರಜಾಕೀಯ'ವನ್ನೇ ಬಿಡಲು ಸಿದ್ಧವಾದ ಉಪೇಂದ್ರ.? ಕಾರಣ ಯಾರು.?

ಇಲ್ಲಿಂದ ಶುರುವಾಯ್ತು....

ಕೆಜಿಎಫ್ ಸಿನಿಮಾದ ಟ್ರೈಲರ್ ಬಿಡುಗಡೆಯಾಗಿತ್ತು. ಇದನ್ನ ನೋಡಿದ ಅಭಿಮಾನಿಯೊಬ್ಬ 'ಸಿನಿಮಾ ಹೇಗೆ ಮಾಡಬೇಕು ಎಂದು ತೋರಿಸುವ ಮೂಲಕ ಇಡೀ ಭಾರತದ ಗಮನ ಸೆಳೆದಿರುವ ಪ್ರಶಾಂತ್ ನೀಲ್ ಮತ್ತು ತಂಡದಿಂದ ನೀವು ಏನಾದರು ಕಲಿತುಕೊಂಡ್ರಾ.? ನಿಮಗೆ ಇದೆಲ್ಲಾ ಬೇಡ ಬಿಡಿ. ಯಾಕಂದ್ರೆ, ನೀವು ಅಂದುಕೊಂಡಿದ್ದೀರಾ, ಇದೆಲ್ಲಾ ನಾನು ಆಗಲೇ ಮಾಡಿಬಿಟ್ಟಿದ್ದೀನಿ ಅಂತ. ಸತ್ಯ ಏನಪ್ಪಾ ಅಂದ್ರೆ, ಅಭಿಮಾನಿಗಳ ಬಗ್ಗೆ ಯೋಚನೆ ಮಾಡದೇ ನೀವು ಬರಿ ರೀಮೇಕ್ ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದೀರಾ'' ಎಂದು ಟ್ವೀಟ್ ಮಾಡಿ ಪ್ರಶ್ನಿಸಿದ್ದರು.

ಉಪ್ಪಿ ಉತ್ತರ ಬೇರೇಯೇ ಇತ್ತು

ಈ ಟ್ವೀಟ್ ನೋಡಿದ ಉಪೇಂದ್ರ ''ನಾನು ನನಗೋಸ್ಕರ ಮಾಡಿದ್ರೆ ನಾನೊಬ್ಬ ಅತ್ಯುತ್ತಮ ನಟ, ನಿರ್ದೇಶಕ ಮತ್ತು ಸೂಪರ್ ಸ್ಟಾರ್ ಹಾಗೂ ಎಲ್ಲರಿಗಿಂತ ಉತ್ತಮ. ಆದ್ರೆ, ಆಕಸ್ಮಾತ್ ಆಗಿ ನಾನು ಬೇರೆಯವರಿಗಾಗಿ (ನಿಮಗಾಗಿ) ಬದುಕ್ತಿದ್ದೀನಿ. (ಸದಾ ನಾನು ಯಾವಾಗಲೂ ಬೇರೆಯವರ ಸಾಧನೆ ಮತ್ತು ಖುಷಿಯನ್ನ ಎದುರು ನೋಡುತ್ತೇನೆ) ಅದಕ್ಕಾಗಿಯೇ ಪ್ರಜಾಕೀಯ'' ಎಂದು ಟಾಂಗ್ ಕೊಟ್ಟರು.

ಉಪ್ಪಿ ವಿರುದ್ಧ ಇನ್ನೊಂದು ಹಂತದ ಅಟ್ಯಾಕ್

ಉಪ್ಪಿಯ ಈ ಉತ್ತರ ನೋಡಿದ ಮತ್ತೊಬ್ಬ ಅಭಿಮಾನಿ ''ಉಪೇಂದ್ರ ಅವರು ರೀಮೇಕ್ ಮಾಡೋದು ಬಿಡಲ್ಲ, ಡೈರೆಕ್ಷನ್ ಮಾಡಲ್ಲ, ಒಳ್ಳೆಯ ಸ್ಕ್ರಿಪ್ಟ್ ಆಯ್ಕೆ ಮಾಡಲ್ಲ. ಯಾಕಂದ್ರೆ, ಅವರು ನಮ್ಮ ಬಗ್ಗೆ ಯೋಚನೆ ಮಾಡಲ್ಲ. ಥ್ಯಾಂಕ್ ಯೂ ಬಾಸ್'' ಎಂದು ಪರೋಕ್ಷವಾಗಿ ಉಪ್ಪಿಗೆ ಧಿಕ್ಕಾರ ಹಾಕಿದರು.

ಉಪೇಂದ್ರ ಸಿರೀಯಸ್ ಆಗಿ ತಗೊಂಡ್ರು.!

ಉಪೇಂದ್ರ ಭಕ್ತರ ಈ ಮಾತುಗಳನ್ನ ಕೇಳಿದ ರಿಯಲ್ ಸ್ಟಾರ್ ''ದಯವಿಟ್ಟು ಈ ರೀತಿ ಯೋಚನೆ ಮಾಡಬೇಡಿ. ನೀವಿಲ್ಲದೇ ನಾನು ಏನೂ ಇಲ್ಲ. ನಿಮಗೆ ಏನು ಇಷ್ಟವಾಗತ್ತೋ ಅದನ್ನೇ ನಾನು ಮಾಡ್ತೀನಿ. ನಿಮಗೆ ನಾನು ಪ್ರಜಾಕೀಯ ಮಾಡೋದು ಬೇಡ, ಡೈರೆಕ್ಷನ್ ಮಾಡಿ ಅಂದ್ರೆ ಅದೇ ಮಾಡ್ತೀನಿ'' ಎಂದು ಮನವೊಲಿಸಲು ಮುಂದಾದರು.

ಅಭಿಮಾನಕ್ಕಾಗಿ ಕನಸು ಕೈಬಿಡ್ತಾರಾ.?

ಉಪ್ಪಿ ಹೇಳಿದ ಮಾತಿನಲ್ಲಿ ಒಂದು ಅಂಶವನ್ನ ಮುಖ್ಯವಾಗಿ ಪರಿಗಣಿಸಬೇಕಿದೆ. ಅಭಿಮಾನಿಗಳು ಪ್ರಜಾಕೀಯ ಮಾಡೋದು ಬೇಡ, ಡೈರೆಕ್ಷನ್ ಮಾಡಿ' ಅಂದ್ರೆ ನಾನು ಅದನ್ನೇ ಮಾಡ್ತೀನಿ ಎಂದಿರುವುದನ್ನ ನೋಡಿದ್ರೆ, ಅಭಿಮಾನಿಗಳಿಗೆ ತಮ್ಮ ಕನಸನ್ನ ಕೈಬಿಡ್ತಾರಾ ಎಂಬ ಕುತೂಹಲ ಈಗ ಕಾಡ್ತಿದೆ. ಆದ್ರೆ, ಈ ಟ್ವೀಟ್ ಗೆ ಪ್ರತಿಕ್ರಿಯಿಸಿರುವ ಉಪ್ಪಿ ಫ್ಯಾನ್ಸ್ ಯಾವುದೇ ಕಾರಣಕ್ಕೂ ಪ್ರಜಾಕೀಯ ನಿಲ್ಲಿಸಬೇಡಿ, ನಿರ್ದೇಶನವನ್ನ ಕೂಡ ಮಾಡಿ'' ಎಂದು ಮನವಿ ಮಾಡಿದ್ದಾರೆ.