ದರ್ಶನ್ ಜೊತೆಗೆ ಇಟ್ಟ ಮೊದಲ ಹೆಜ್ಜೆ ನೆನೆದ 'ಬುಲ್ ಬುಲ್' ರಚಿತಾ ರಾಮ್!

ರಚಿತಾ ರಾಮ್ ಸಿನಿಮಾ ಜರ್ನಿಗೆ 9 ವರ್ಷ!

ನಟಿ ರಚಿತಾ ರಾಮ್ ಬಣ್ಣದ ಲೋಕಕ್ಕೆ ಬಂದಿದ್ದು ಕಿರುತೆರೆಯ ಮೂಲಕ. ಅರಸಿ ಧಾರಾವಾಹಿ ಮೂಲಕ ಪ್ರೇಕ್ಷಕರ ಮನೆ ಗೆದ್ದ ರಚಿತಾ ರಾಮ್, ನೇರವಾಗಿ ಬಂದಿದ್ದು ಸಿನಿಮಾರಂಗಕ್ಕೆ. ರಚಿತಾ ರಾಮ್ ಮೊದಲ ಸಿನಿಮಾವೇ ಸೂಪರ್ ಹಿಟ್ ಆದ ಕಾರಣ ಕನ್ನಡದ ಬಹುಬೇಡಿಕೆಯ ನಟಿಯಾಗಿ ರಚಿತಾ ಹೊರ ಹೊಮ್ಮಿದರು. 'ಬುಲ್ ಬುಲ್' ಚಿತ್ರದಿಂದ ಶುರುವಾದ ರಚಿತಾ ರಾಮ್ ಸಿನಿಮಾ ಪಯಣಕ್ಕೆ ಈಗ ಬರೋಬ್ಬರಿ 9 ವರ್ಷ.

'ಬುಲ್ ಬುಲ್' ಬಗ್ಗೆ ರಚಿತಾ ರಾಮ್ ಪೋಸ್ಟ್!

'ಬುಲ್ ಬುಲ್' ಚಿತ್ರದ ಜೊತೆಗೆ ತಮ್ಮ ಸಿನಿಮಾ ಪಯಣವನ್ನು ನೆನೆದು ರಚಿತಾ ರಾಮ್ ಎಲ್ಲರಿಗೂ ಧನ್ಯವಾದ ತಿಳಿಸದ್ದಾರೆ. ದರ್ಶನ್ ಜೊತೆಗಿನ 'ಬುಲ್ ಬುಲ್' ಪೋಸ್ಟರ್ ಹಂಚಿಕೊಂಡು, "ನಿಮ್ಮೆಲ್ಲರ ಪ್ರೀತಿ ಅಭಿಮಾನಕ್ಕೆ ನಾನು ಹಾಗೂ ನನ್ನ ಕುಟುಂಬ ಚಿರ ಋಣಿಯಾಗಿರುತ್ತೇವೆ, ನಿಮ್ಮ ಆಶೀರ್ವಾದ ಸದಾ ಹೀಗೆ ಇರಲಿ". ಎಂದು ಬರೆದುಕೊಂಡಿದ್ದಾರೆ. ಈ ಪೋಸ್ಟನ್ನು ನಟ ದರ್ಶನ್‌ಗೆ ಟ್ಯಾಗ್ ಮಾಡಿದ್ದಾರೆ.

ರಚ್ಚು- ದಚ್ಚು ಕಾಂಬಿನೇಶನ್ ಹಿಟ್!

ರಚಿತಾ ರಾಮ್ ಮತ್ತು ದರ್ಶನ್ 'ಬುಲ್ ಬುಲ್', 'ಅಂಬರೀಶ' ಚಿತ್ರಗಳಲ್ಲಿ ನಟಿಸಿದ್ದಾರೆ. 'ಜಗ್ಗುದಾದ' ಚಿತ್ರದಲ್ಲಿ ರಚಿತಾ ಅತಿಥಿ ಪಾತ್ರ ಮಾಡಿದ್ದಾರೆ. ಆದರೆ ಆ ಬಳಿಕ ಈ ಜೋಡಿ ಒಟ್ಟಿಗೆ ಸಿನಿಮಾ ಮಾಡಿಲ್ಲ. ಈಗ ಮತ್ತೆ 'ಕ್ರಾಂತಿ' ಸಿನಿಮಾದ ಮೂಲಕ ಒಂದಾಗಿದೆ. ರಚಿತಾ ರಾಮ್ ಮತ್ತು ದರ್ಶನ್ ಕಾಂಬಿನೇಶನ್ ಇರುವ ಕಾರಣಕ್ಕೆ ಈ ಚಿತ್ರದ ಮೇಲಿನ ನಿರೀಕ್ಷೆ ಮತ್ತಷ್ಟು ಹೆಚ್ಚಾಗಿದೆ.

ಸಾಲು ಸಾಲು ಸಿನಿಮಾಗಳಲ್ಲಿ ರಚಿತಾ ರಾಮ್ ಬ್ಯುಸಿ!

ರಚಿತಾ ರಾಮ್ ತಮ್ಮ 9 ವರ್ಷಗಳ ಸಿನಿಮಾ ಜರ್ನಿಯಲ್ಲಿ ಹತ್ತು ಹಲವು ಬಗೆಯ ಪಾತ್ರಗಳನ್ನು ಮಾಡಿದ್ದಾರೆ. ಕಮರ್ಷಿಯಲ್ ಚಿತ್ರಗಳಲ್ಲಿ ನಾಯಕಿಯಾಗಿ ಮಾತ್ರ ಅಭಿನಯಿಸದೆ, '100', ' ಲವ್ ಯು ರಚ್ಚು' ಅಂತಹ ವಿಭಿನ್ನ ಕಥಾ ಹಂದರಯುಳ್ಳ ಚಿತ್ರಗಳಲ್ಲಿ ನಟಿಸಿದ್ದಾರೆ. ಇನ್ನು ಈಗಂತೂ ಸಾಲು, ಸಾಲು ಚಿತ್ರಗಳಲ್ಲಿ ಸಿಕ್ಕಾಪಟ್ಟೆ ಬ್ಯುಸಿಯಾಗಿದ್ದಾರೆ. 'ಮಾನ್ಸೂನ್ ರಾಗ', 'ಕ್ರಾಂತಿ', 'ಲಿಲ್ಲಿ', 'ಮ್ಯಾಟ್ನಿ' ಸೇರಿದಂತೆ ಹಲವು ಚಿತ್ರಗಳಲ್ಲಿ ಬ್ಯೂಸಿಯಾಗಿದ್ದಾರೆ.