ಸ್ಯಾಂಡಲ್‌ವುಡ್‌ನಲ್ಲಿ ಅಸಮಾನತೆ ಭೂತ: ಧ್ವನಿ ಎತ್ತಿದ ರಮ್ಯಾ, ಆಶಿಕಾ, ಮಾನ್ವಿತಾ, ಅಮೃತಾ!

ನಟರು ಹೇಗೆ ಇದ್ದರೂ ಹೀರೋ ಆಗಬಹುದಾ: ರಮ್ಯಾ ಪ್ರಶ್ನೆ?

ನಟಿ ರಮ್ಯಾ ಸಿನಿಮಾರಂಗದಲ್ಲಿ ಇರುವ ಅಸಮಾನತೆಯ ಬಗ್ಗೆ ಪೋಸ್ಟ್ ಹಂಚಿಕೊಂಡಿದ್ದರು. ಸಿನಿಮಾರಂಗದಲ್ಲಿ ನಟಿಯರಯನ್ನು ಅಳೆಯುವ ಮಾನದಂಡ ಇರಬಾರದು ಎಂದು ಪೋಸ್ಟ್ ಮೂಲಕ ಕಿಡಿ ಕಾರಿದ್ದರು. "ಪುರುಷನಾದವನು ಸಂಪೂರ್ಣವಾಗಿ ತಲೆಕೂದಲು ಕಳೆದುಕೊಂಡು ವಿಗ್ ಹಾಕಿಕೊಂಡರೂ ಪರವಾಗಿಲ್ಲ. ಮುಖದಲ್ಲಿನ ಒಂದೊಂದು ಗಲ್ಲವೂ 5 ಕೆಜಿ ಇದ್ದರೂ ಪರವಾಗಿಲ್ಲ. 65 ವರ್ಷವಾಗಿದ್ದರೂ ಆತ ಹೀರೋ ಆಗಿಯೇ ನಟಿಸುತ್ತಾನೆ. ಆದರೆ ನಟಿ ತೂಕ ಹೆಚ್ಚಿಸಿಕೊಂಡರೆ ಆಂಟಿ, ಬುಡ್ಡಿ, ಅಜ್ಜಿ ಎಂದು ಕರೆಯಲಾಗುತ್ತದೆ" ಎಂದು ರಮ್ಯಾ ಪೋಸ್ಟ್‌ನಲ್ಲಿ ಬರೆದುಕೊಂಡಿದ್ದರು.

ಚಿತ್ರರಂಗದಲ್ಲಿ ಅಸಮಾನತೆ: ಆಶಿಕಾ ರಂಗನಾಥ್!

ನಟಿ ರಮ್ಯಾ ಈ ರೀತಿಯಾಗಿ ಪೋಸ್ಟ್ ಹಾಕುತ್ತಿದ್ದ ಹಾಗೆ, ಕನ್ನಡದ ನಟಿ ಮಣಿಯರು ರಮ್ಯಾ ಮಾತಿಗೆ ದನಿ ಗೂಡಿಸಿದ್ದಾರೆ. ನಟಿ ರಮ್ಯಾ ಹೇಳುತ್ತಿರುವುದು ಸರಿ. ಸಿನಿಮಾರಂಗದಲ್ಲಿ ಇರುವ ಅಸಮಾನತೆ ವಿರುದ್ಧ ಹೋರಾಡಬೇಕು ಎಂದಿದ್ದಾರೆ. ನಟಿ ಆಶಿಕಾ ರಂಗನಾಥ್ ರಮ್ಯಾ ಪೋಸ್ಟ್ ಹಂಚಿಕೊಂಡು "ಇದಕ್ಕಿಂತ ಹೆಚ್ಚಿದನ್ನು ಹೇಳಲಾಗುವುದಿಲ್ಲ. ಈ ವಿಚಾರದ ಬಗ್ಗೆ ಮಾತನಾಡಿದ್ದಕ್ಕೆ ರಮ್ಯಾ ಅವರಿಗೆ ಧನ್ಯವಾದಗಳು, ನಟಿಯರು ಲುಕ್ ಮತ್ತು ಕೆಲವು ವಿಚಾರಗಳಿಂದ ಅಳೆಯಲಾಗುತ್ತದೆ. ಆದರೆ ನಾವು ನಮ್ಮನ್ನು ಪ್ರೀತಿಸುವುದನ್ನು ಮರೆಯಬಾರದು" ಎಂದು ಪೋಸ್ಟ್ ಹಾಕಿದ್ದಾರೆ.

ರಮ್ಯಾ ಮಾತು ಒಪ್ಪಿದ ಅಮೃತಾ ಅಯ್ಯರ್, ಮಾನ್ವಿತಾ ಕಾಮತ್!

ಆಶಿಕಾ ರಂನಾಥ್ ಮಾತ್ರ ಅಲ್ಲ. ಕನ್ನಡದ ನಟಿಯರಾದ ಅಮೃತಾ ಅಯ್ಯರ್, ರಮ್ಯಾ ಹೇಳಿರುವ ಮಾತು ನೂರಕ್ಕೆ, ನೂರು ಸತ್ಯ ಎಂದಿದ್ದಾರೆ. ಇನ್ನು ನಟಿ ಮಾನ್ವಿತಾ ಕಮಾತ್ ಕೂಡ ರಮ್ಯಾ ಪೋಸ್ಟ್ ಹಂಚಿಕೊಂಡು "ನೀವು ಹೇಳಿರುವುದು ಸರಿಯಾಗಿ ಇದೆ." ಎಂದಿದ್ದಾರೆ. ಹೀಗೆ ರಮ್ಯಾ ಸಿನಿಮಾರಂಗದ ಸಮಾನತೆ ಬಗ್ಗೆ ಮಾತನಾಡುತ್ತಲೆ, ಹಲವು ನಟಿಯರು ಈ ಬಗ್ಗೆ ಧ್ವನಿ ಎತ್ತಿದ್ದಾರೆ.

ಅಸಮಾನತೆ ವಿರುದ್ಧ ನಡೆಯುತ್ತಾ ಅಭಿಯಾನ!

ಕನ್ನಡದ ನಟಿಯರು ಈ ರೀತಿಯಾಗಿ ಸಿನಿಮಾರಂಗದಲ್ಲಿರುವ ಅಸಮಾನತೆ ಬಗ್ಗೆ ಮಾತನಾಡುತ್ತಾ ಇದ್ದು ಇದಕ್ಕೆ ಮತ್ತಷ್ಟು ನಟಿಯರು ದನಿಗೂಡಿಸುವ ಸಾಧ್ಯತೆ ಇದೆ. ಇನ್ನು ಕನ್ನಡದ ಹಲವು ನಟಿಯರು ಅಸಮಾನತೆ ಬಗ್ಗೆ ಮಾತನಾಡಿದ್ದು, ಸ್ಯಾಂಡಲ್‌ವುಡ್ ಕೂಡ ಈ ರೀತಿಯ ಆಚರಣೆ ಅಭ್ಯಾಸಗಳಿಂದ ಹೊರತಲ್ಲ ಎನ್ನುವುದ ತಿಳಿದು ಬರುತ್ತದೆ. ಮೀಟೂ ಮಾದರಿಯಲ್ಲಿ ಈ ಇದು ಕೂಡ ದೊಟ್ಟ ಮಟ್ಟದಲ್ಲಿ ಅಭಿಯಾನ ಆದರೆ ಬಹುಶಃ ಒಂದಷ್ಟು ಪರಿಣಾಮ ಕಾಣಬಹುದು.