Sanjana Galrani: ತಲೆ ಬೋಳಿಸಿಕೊಂಡ ತುಂಬು ಗರ್ಭಿಣಿ ಸಂಜನಾ, ಕಾರಣ ಕೇಳಿದ್ರೆ ಹೃದಯ ಕರಗುತ್ತೆ!

ಸಂಜನಾ ಬೋಳು ತಲೆಯ ಫೋಟೊ ವೈರಲ್!

ನಟಿ ಸಂಜನಾ ಗಲ್ರಾನಿ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹೊಸ ಲುಕ್‌ನ ಫೋಟೊ ಒಂದನ್ನು ಹರಿ ಬಿಟ್ಟಿದ್ದಾರೆ. ಆದರೆ ಅದು ಮಾಮೂಲಿ ಫೋಟೊ ಅಲ್ಲ. ಈ ಫೋಟೊದಲ್ಲಿ ಸಂಜನಾ ತಲೆಯಲ್ಲಿ ಕೂದಲು ಇಲ್ಲ. ತಲೆ ಬೋಳಿಸಿಕೊಂಡ ಲುಕ್‌ನಲ್ಲಿ ಇದ್ದಾರೆ ಸಂಜನಾ. ಇದು ಲುಕ್ ಮಾತ್ರ ಅಲ್ಲ. ಸಂಜನಾ ತನ್ನ ತಲೆ ಕೂದಲನ್ನು ದಾನ ಮಾಡಿದ್ದಾರೆ. ಬಳಿಕ ಬೋಳು ತಲೆಯ ಫೋಟೊ ಹಂಚಿಕೊಂಡಿದ್ದಾರೆ. ಸಂಜನಾಳ ಈ ಲುಕ್ ಕಂಡವರು ಸಂಜನಾಗೆ ಏನಾಯ್ತು?. ಎಂದು ಅಚ್ಚರಿ ವ್ಯಕ್ತ ಪಡಿಸುತ್ತಿದ್ದಾರೆ.

ಸಂಜನಾ ಕೂದಲು ದಾನ ಮಾಡಿದ್ದು ಯಾಕೆ?

ನಟಿ ಸಂಜನ ಹೀಗೆ ತಮ್ಮ ತಲೆ ಕೂದಲನ್ನು ದಾನ ಮಾಡಲು ಕಾರಣ ಇದೆ. ಹಾಗಂತ ಆಕೆಗೆ ಯಾವುದೋ ಖಾಯಿಲೆ ಬಂದಿಲ್ಲ. ಬದಲಿಗೆ ತಾನೇ ಸ್ವಂತ ಇಚ್ಛೆಯಿಂದ ಕೂದಲು ದಾನ ಮಾಡಿದ್ದಾರೆ. ಸಂಜನಾ ಬದುಕಲ್ಲಿ ಈಗ ಉತ್ತಮವಾದ ಸಂಗತಿಗಳು ನಡೆಯುತ್ತಿವೆ ಅಂತೆ. ಹಾಗಾಗಿ ಅವರು ಸರ್ವ ಶಕ್ತಿಗೆ ಧನ್ಯವಾದ ಹೇಳಲು ಈ ರೀತಿ ಕೂದಲು ದಾನ ಮಾಡಿದ್ದಾರೆ ಎಂದು ತಿಳಿದು ಬಂದಿದೆ. ಫೋಟೊ ಹಂಚಿಕೊಂಡ ನಟಿ ಸಂಜನಾ ಕಾರಣದ ಜೊತೆಗೆ, ಕ್ಯಾಪ್ಷನ್ ಕೂಡ ಕೊಟ್ಟಿದ್ದಾರೆ.

ಭಾವುಕ ಸಂದೇಶ ಬರೆದ ಸಂಜನಾ ಗಲ್ರಾನಿ!

ಸಂಜನಾ ತಮ್ಮ ಪೋಸ್ಟ್‌ನಲ್ಲಿ ಈ ರೀತಿಯಾಗಿ ಬರೆದುಕೊಂಡಿದ್ದಾರೆ. "ಸೌಂದರ್ಯವು ನೋಡುಗರ ದೃಷ್ಟಿಯಲ್ಲಿದೆ. ನಾನು ದೇವರಲ್ಲಿ ಇಟ್ಟ ನಂಬಿಕೆಯನ್ನು ಪೂರ್ಣಮಾಡಲು ನನ್ನ ತಲೆ ಕೂದಲನ್ನು ತ್ಯಾಗ ಮಾಡಿದ್ದೇನೆ ಎಂದಿದ್ದಾರೆ. ಅನೇಕ ಕಷ್ಟಗಳನ್ನು ದಾಟಿದ ನಂತರ, ಜೀವನವು ಮತ್ತೊಮ್ಮೆ ಸುಂದರವಾಗಿದೆ. ನನ್ನ ಜೀವನದ ಈ ಹಂತಕ್ಕಾಗಿ ನಾನು ದೇವರಿಗೆ ಎಷ್ಟೇ ಧನ್ಯವಾದ ಹೇಳಿದರು ಸಾಲದು. ಇದು ನನ್ನ ಸಾಮಾಜಿಕ ಮಾಧ್ಯಮದ ಕೆಲಸದ ಅನುಮೋದನೆಗಾಗಿ ಅಥವಾ ನನ್ನ ಜೀವನದಲ್ಲಿ ಶೀಘ್ರದಲ್ಲೇ ಬರಲಿರುವ ಮಗುವಿಗಾಗಿ. ಈ ಮೂಲಕ ನಾನು ನನ್ನ ಕೃತಜ್ಞತೆ ಸಲ್ಲಿಸುತ್ತೇನೆ. ಜೈ ಶ್ರೀ ಕೃಷ್ಣ, ಅಹಂ ಬ್ರಹ್ಮಾಸ್ಮಿ".

ಮಗುವಿನ ನಿರೀಕ್ಷೆಯಲ್ಲಿ ನಟಿ ಸಂಜನಾ!

ನಟಿ ಸಂಜನಾ ಗಲ್ರಾನಿ ಈಗ 8 ತಿಂಗಳ ತುಂಬು ಗರ್ಭಿಣಿ. ಸದ್ಯ ಮಗುವಿನ ನಿರೀಕ್ಷೆಯಲ್ಲಿ ಸಂಜನಾ ಕಾಯುತ್ತಾ ಇದ್ದಾರೆ. ಬದುಕಿನಲ್ಲಿ ಸಾಕಷ್ಟು ಏಳು ಬೀಳುಗಳನ್ನು ಕಂಡ ಸಂಜನಾ ಈಗ ಸಂತಸದಿಂದ ಕುಟುಂಬದ ಜೊತೆಗೆ ಕಾಲ ಕಳೆಯುತ್ತಾ ಇದ್ದಾರೆ. ಇನ್ನು ಒಂದು ತಿಂಗಳಲ್ಲಿ ಸಂಜನಾ ಮಗು ಜನ್ಮ ಪಡೆಯಲಿದೆ. ಆ ಬಳಿಕಾ ಮತ್ತೆ ಸಂಜನಾ ಸಿನಿಮಾಗಳಲ್ಲಿ ಅಭಿನಯಿಸುತ್ತಾರಾ ಅನ್ನೋದನ್ನು ಕಾದು ನೋಡಬೇಕಿದೆ.