'ಕೋಟಿಗೊಬ್ಬ-3' ಸಿನಿಮಾದಲ್ಲಿ ಶ್ರದ್ಧಾ ದಾಸ್ ಪಾತ್ರವೇನು.?

Recommended Video

'ಕೋಟಿಗೊಬ್ಬ' ಹಾಗೂ 'ಕೋಟಿಗೊಬ್ಬ-2' ಚಿತ್ರಗಳ ಯಶಸ್ಸಿನ ಸ್ಫೂರ್ತಿ ಪಡೆದು ನಿರ್ಮಾಪಕ ಸೂರಪ್ಪ ಬಾಬು 'ಕೋಟಿಗೊಬ್ಬ-3' ಚಿತ್ರಕ್ಕೆ ಚಾಲನೆ ನೀಡಿದ್ದಾರೆ. 'ಕೋಟಿಗೊಬ್ಬ-3' ಚಿತ್ರದ ಚಿತ್ರೀಕರಣಕ್ಕಾಗಿ ಚಿತ್ರತಂಡ ಈಗಾಗಲೇ ಬೆಲ್ ಗ್ರೇಡ್ ತಲುಪಿದೆ.

'ಕೋಟಿಗೊಬ್ಬ-3' ಚಿತ್ರದ ಬಹುಪಾಲು ಸನ್ನಿವೇಶಗಳು ವಿದೇಶಗಳಲ್ಲಿಯೇ ನಡೆಯಲಿವೆ. ಹೀಗಾಗಿ, ಒಂದು ತಿಂಗಳಿಗೂ ಅಧಿಕ ಕಾಲ ಕಿಚ್ಚ ಸುದೀಪ್ ಫಾರಿನ್ ನಲ್ಲೇ ಇರಬೇಕು.

ಬರೀ ಸುದೀಪ್ ಮಾತ್ರ ಅಲ್ಲ, ಅಫ್ತಾಬ್ ಶಿವದಾಸನಿ, ಮಡೋನ ಸೆಬಾಸ್ಟಿಯನ್ ಹಾಗೂ ಶ್ರದ್ಧಾ ದಾಸ್ ಕೂಡ ಬೆಲ್ ಗ್ರೇಡ್ ಗಾಗಿ ಫ್ಲೈಟ್ ಹತ್ತಿದ್ದಾರೆ. ಅಂದ್ಹಾಗೆ, 'ಕೋಟಿಗೊಬ್ಬ-3' ಚಿತ್ರದಲ್ಲಿ ಪರಭಾಷಾ ಚೆಲುವೆ ಶ್ರದ್ಧಾ ದಾಸ್ ಪಾತ್ರವೇನು ಎಂದು ಯೋಚನೆ ಮಾಡ್ತಿದ್ರಾ.?

'ಕೋಟಿಗೊಬ್ಬ-3' ಸಿನಿಮಾದಲ್ಲಿ ಶ್ರದ್ಧಾ ದಾಸ್ ಇಂಟರ್ ಪೋಲ್ ಅಧಿಕಾರಿ ಪಾತ್ರ ನಿರ್ವಹಿಸುತ್ತಿದ್ದಾರೆ. ಹಾಗ್ನೋಡಿದ್ರೆ, ಪೊಲೀಸ್ ಪಾತ್ರ ಮಾಡಬೇಕೆಂಬ ಕನಸು ಶ್ರದ್ಧಾ ದಾಸ್ ಅವರಿಗಿತ್ತು. ಅದು, 'ಕೋಟಿಗೊಬ್ಬ-3' ಮೂಲಕ ಈಡೇರುತ್ತಿರುವುದಕ್ಕೆ ಶ್ರದ್ಧಾ ದಾಸ್ ಖುಷಿಯಾಗಿದ್ದಾರೆ.

ಅಂತಾರಾಷ್ಟ್ರೀಯ ಮಟ್ಟದ ಕ್ರೈಂ ಕಥೆ ಕುರಿತಾದ ಚಿತ್ರ 'ಕೋಟಿಗೊಬ್ಬ-3'. ಸಿನಿಮಾದ ಕಥೆಯ ಎಳೆಯನ್ನ ಸುದೀಪ್ ರವರೇ ಹೇಳಿದ್ಮೇಲೆ, ಚಿತ್ರಕ್ಕೆ ಬಂಡವಾಳ ಹೂಡಲು ಸೂರಪ್ಪ ಬಾಬು ಸೈ ಎಂದರು. ಶಿವ ಕಾರ್ತಿಕ್ ಎಂಬುವರು 'ಕೋಟಿಗೊಬ್ಬ-3' ಚಿತ್ರಕ್ಕೆ ಆಕ್ಷನ್ ಕಟ್ ಹೇಳುತ್ತಿದ್ದಾರೆ.