ಮಿಸ್ ಯೂನಿವರ್ಸ್: 4ನೇ ಸ್ಥಾನ ಪಡೆದ ಭಾರತದ ಆಡ್ಲೈನ್ ಕ್ಯಾಸ್ಟೆಲಿನೊ ಯಾರು? ಇಲ್ಲಿದೆ ಮಾಹಿತಿ

ಉಡುಪಿ ಮೂಲದ ಮಾಡೆಲ್ ಆಡ್ಲೈನ್ ಕ್ಯಾಸ್ಟೆಲಿನೊ

1998ರಲ್ಲಿ ಆಡ್ಲೈನ್ ಕರ್ನಾಟಕದ ಉಡುಪಿ ಮೂಲದ ಕ್ಯಾಥೋಲಿಕ್ ಪೋಷಕರಿಗೆ ಜನಿಸಿದರು. ಕುವೈತ್ ನಲ್ಲಿ ಬೆಳೆದ ಆಡ್ಲೈನ್ ಪ್ರಾಥಮಿಕ ವಿದ್ಯಾಭ್ಯಾಸವನ್ನು ಕುವೈತ್‌ನಲ್ಲೇ ಮುಗಿಸಿದರು. ಬಳಿಕ 15ನೇ ವಯಸ್ಸಿಗೆ ಮುಂಬೈ ಬಂದ ಆಡ್ಲೈನ್ ನಂತರದ ವಿದ್ಯಾಭ್ಯಾಸ ಮುಂಬೈನಲ್ಲಿ ಮುಗಿಸಿದರು. ವಿಲ್ಸನ್ ಕಾಲೇಜ್ ಆಫ್ ಬಿಸಿನೆಸ್ ಅಡ್ಮಿನಿಸ್ಟ್ರೇಶನ್‌ನಿಂದ ಪದವಿ ಪಡೆದರು.

ಸಾಮಾಜಿಕ ಕಾರ್ಯದಲ್ಲೂ ಭಾಗಿ

ಸಾಮಾಜಿಕ ಕೆಲಸಗಳಲ್ಲೂ ತೊಡಗಿಸಿಕೊಂಡಿರುವ ಆಡ್ಲೈನ್ ಕ್ಯಾಸ್ಟೆಲಿನೊ ವಿಕಾಸ್ ಸಹಯೋಗ್ ಪ್ರತಿಷ್ಠಾನ್ ಎಂಬ ಕಲ್ಯಾಣ ಸಂಸ್ಥೆಯಲ್ಲಿ ಕೆಲಸ ಮಾಡಿದ್ದಾರೆ. ರೈತರ ಯೋಗಕ್ಷೇಮ ಮತ್ತು ಆತ್ಮಹತ್ಯೆ ನಿಗ್ರಹಿಸುವಲ್ಲಿ ಪ್ರಯತ್ನಿಸಿದ್ದಾರೆ. ಡ್ಯಾನ್ಸ್ ಅಂದರೆ ತುಂಬಾ ಇಷ್ಟ ಪಡುವ ಆಡ್ಲೈನ್ ನೃತ್ಯ ನಿರ್ದೇಶಕಿಯಾಗಿಯೂ ಕೆಲಸ ಮಾಡಿದ್ದಾರೆ.

ಲಿವಾ ಮಿಸ್ ದಿವಾ ಯೂನಿವರ್ಸ್ ಕಿರೀಟ ಗೆದ್ದಿರುವ ಆಡ್ಲೈನ್

2020ರಲ್ಲಿ ಲಿವಾ ಮಿಸ್ ದಿವಾ ಯೂನಿವರ್ಸ್ ಕಿರೀಟ ಗೆದ್ದಿದ್ದಾರೆ. ಈ ಸಮಯದಲ್ಲಿ ಹುಟ್ಟೂರು ಉಡುಪಿಗೆ ಆಗಮಿಸಿದ್ದ ಆಡ್ಲೈನ್ ಅವರನ್ನು ಅದ್ದೂರಿ ಸ್ವಾಗತ ಮಾಡಲಾಗಿತ್ತು. ಮೆರವಣಿಗೆ ಮೂಲಕ ಹುಟ್ಟೂರಿಗೆ ಬರಮಾಡಿಕೊಳ್ಳಲಾಗಿತ್ತು.

ಹುಟ್ಟೂರಿನಲ್ಲಿ ಸಂತಸ

ಸದ್ಯ ಮಿಸ್ ಯೂನಿವರ್ಸ್ ಸ್ಪರ್ಧೆಯಲ್ಲಿ ಭಾಗಿಯಾಗಿ 4ನೇ ಸ್ಥಾನ ಪಡೆದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆ ಮಾಡಿರುವ ಆಡ್ಲೈನ್ ತನ್ನ ಹುಟ್ಟೂರಿಗೆ ಯಾವಾಗ ಆಗಮಿಸಲಿದ್ದಾರೆ? ಈ ಬಾರಿ ಹೇಗೆ ಸ್ವಾಗತ ಮಾಡಲಿದೆ ಊರು ಎನ್ನುವುದು ಕುತೂಹಲ ಮೂಡಿಸಿದೆ. ಆಡ್ಲೈನ್ ಸಾಧನೆಗೆ ಹುಟ್ಟೂರು ಉಡುಪಿಯಲ್ಲೂ ಸಂತಸ ಮನೆ ಮಾಡಿದೆ.