''ಇನ್ನು ಮುಂದೆ ದುಡ್ಡು ಮಾಡಿ ತೋರಿಸುತ್ತೇನೆ'' - ರವಿಚಂದ್ರನ್

Recommended Video

''ಮನೆ ಕಟ್ಟಿ ನೋಡು.. ಮದುವೆ ಮಾಡಿ ನೋಡು..'' ಎನ್ನುವ ಮಾತಿದೆ. ಒಂದು ಮದುವೆ, ಒಬ್ಬ ವ್ಯಕ್ತಿ ಯೋಚನೆ ಮಾಡುವ ಶೈಲಿಯನ್ನೇ ಬದಲು ಮಾಡುವ ಶಕ್ತಿ ಹೊಂದಿದೆ. ಅದೇ ರೀತಿ ಮಗಳ ಮದುವೆ ಕ್ರೇಜಿ ಸ್ಟಾರ್ ರವಿಚಂದ್ರನ್ ಬದುಕಿನಲ್ಲಿ ಬದಲಾವಣೆ ತಂದಿದೆ.

ಅದರ ಪ್ರಭಾವದಲ್ಲಿ ಇತ್ತೀಚಿಗೆ 'ಬಯಲಾಟದ ಬೀಮಣ್ಣ' ಎಂಬ ಸಿನಿಮಾ ಕಾರ್ಯಕ್ರಮದಲ್ಲಿ ಮಾತನಾಡಿರುವ ರವಿಚಂದ್ರನ್ ''ಇನ್ನು ಮುಂದೆ ದುಡ್ಡು ಮಾಡಿ ತೋರಿಸುತ್ತೇನೆ'' ಎಂದು ಹೇಳಿದ್ದಾರೆ.

ರವಿಚಂದ್ರನ್ ಸಿನಿಮಾವನ್ನು ದುಡ್ಡಿಗಾಗಿ ಮಾಡುವುದಿಲ್ಲ. ತಮ್ಮ ಕನಸು ತೆರೆ ಮೇಲೆ ಬಂದರೆ ಅದೇ ಗೆಲುವು ಎಂದುಕೊಂಡಿದ್ದಾರೆ. ಬರೀ ಕಲೆಕ್ಷನ್ ಆಧಾರದ ಮೇಲೆ ಒಂದು ಸಿನಿಮಾದ ಸೋಲು ಗೆಲುವಿನ ನಿರ್ಧಾರ ಮಾಡುವುದು ರವಿಚಂದ್ರನ್ ರಿಗೆ ಇಷ್ಟ ಆಗುವುದಿಲ್ಲವಂತೆ.

ಈ ರೀತಿ ಯೋಚನೆ ಮಾಡುತ್ತಿದ್ದ ರವಿಚಂದ್ರನ್ ರಿಗೆ ಈಗ ಹಣದ ಅಗತ್ಯ ಕೂಡ ತಿಳಿದಿದೆ. ''ಮಗಳ ಮದುವೆ ಮಾಡಿದ ಮೇಲೆ ನನಗೆ ದುಡ್ಡಿನ ಮಹತ್ವ ತಿಳಿದಿದೆ. ಅದಕ್ಕೆ ಇನ್ನು ಮುಂದೆ ದುಡ್ಡು ಮಾಡಿ ತೋರಿಸುತ್ತೇನೆ'' ಎಂದು ಹೇಳಿದ್ದಾರೆ.

ಮಗಳ ಮದುವೆಯ ನಂತರ ರವಿಚಂದ್ರನ್ ಯೋಚನಾ ಕ್ರಮ ಕೊಂಚ ಬದಲಾಗಿದೆ. ತಮ್ಮ ಕನಸನ್ನು ತೆರೆ ಮೇಲೆ ತರುವುದರ ಜೊತೆಗೆ ಕಲೆಕ್ಷನ್ ಮೇಲೆಯೂ ಕ್ರೇಜಿ ಸ್ಟಾರ್ ಕಣ್ಣು ಇಡಲಿದ್ದಾರೆ.