ಅಮಿತಾಬ್ ಬಂದ್ರು ಬಗ್ಗಲಿಲ್ಲ ಯಜಮಾನ: ನಾಲ್ಕನೇ ದಿನವೂ ಡಿ-ಬಾಸ್ ಅಬ್ಬರ

ಸತತ ನಾಲ್ಕನೇ ದಿನವೂ ನಂಬರ್ 1

ಫೆಬ್ರವರಿ 10 ರಂದು ಬಿಡುಗಡೆಯಾಗಿದ್ದ ಯಜಮಾನ ಟ್ರೈಲರ್ ನಾಲ್ಕನೇ ದಿನವೂ ಯೂಟ್ಯೂಬ್ ಟ್ರೆಂಡಿಂಗ್ ನಲ್ಲಿ ಮೊದಲ ಸ್ಥಾನದಲ್ಲಿದೆ. ಬಹುಶಃ ಸತತ ನಾಲ್ಕು ದಿನವೂ ಕನ್ನಡ ಚಿತ್ರದ ಟ್ರೈಲರ್ ಟಾಪ್ ನಲ್ಲಿರುವುದು ಬಹಳ ಅಪರೂಪ. ಈಗ ಲೇಟೆಸ್ಟ್ ಆಗಿ ಯಜಮಾನ ಈ ದಾಖಲೆ ಮಾಡಿದೆ.

ಮೊದಲ ಸ್ಥಾನಕ್ಕೆ ಬಚ್ಚನ್ ಪೈಪೋಟಿ

ಹಾಗ್ನೋಡಿದ್ರೆ, ಯಜಮಾನ ಚಿತ್ರಕ್ಕಿಂತ ಹೆಚ್ಚು ವೀಕ್ಷಣೆ ಹೊಂದಿರುವ 'ಬದ್ಲಾ' ಟ್ರೈಲರ್ ಯೂಟ್ಯೂಬ್ ಟ್ರೆಂಡಿಂಗ್ ನಲ್ಲಿ ಎರಡನೇ ಸ್ಥಾನದಲ್ಲಿದೆ. ಫೆಬ್ರವರಿ 11 ರಂದು ಬದ್ಲಾ ಟ್ರೈಲರ್ ರಿಲೀಸ್ ಆಗಿತ್ತು. 18 ಮಿಲಿಯನ್ ವೀವ್ಸ್ ಪಡೆದುಕೊಂಡಿದೆ.

ಕನ್ನಡದ ಎರಡನೇ ಸಿನಿಮಾ

ಸದ್ಯದ ಮಟ್ಟಿಗೆ ಅತಿ ಹೆಚ್ಚು ವೀವ್ಸ್ ಪಡೆದಿರುವ ಕನ್ನಡ ಟ್ರೈಲರ್ ಗಳ ಪಟ್ಟಿಯಲ್ಲಿ ಯಜಮಾನ ಎರಡನೇ ಸ್ಥಾನದಲ್ಲಿದೆ. ಮೊದಲನೇ ಸ್ಥಾನದಲ್ಲಿ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಕೆಜಿಎಫ್ ಸಿನಿಮಾ ಇದೆ. ಯಜಮಾನ ಟ್ರೈಲರ್ ವೀಕ್ಷಣೆ ಸಂಖ್ಯೆ 15.8 ಮಿಲಿಯನ್. ಕೆಜಿಎಫ್ ಟ್ರೈಲರ್ ವೀಕ್ಷಣೆ ಸಂಖ್ಯೆ 18 ಮಿಲಿಯನ್.

ಮೂರನೇ ಸ್ಥಾನದಲ್ಲಿ ಪುನೀತ್ ಸಾಂಗ್

ಇನ್ನು ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಮತ್ತು ರಚಿತಾ ರಾಮ್ ಜೋಡಿಯ ನಟಸಾರ್ವಭೌಮ ಚಿತ್ರದ ಹಾಡು ಯೂಟ್ಯೂಬ್ ಟ್ರೆಂಡಿಂಗ್ ನಲ್ಲಿ ಮೂರನೇ ಸ್ಥಾನದಲ್ಲಿದೆ. ನಾಲ್ಕನೇ ಸ್ಥಾನದಲ್ಲಿ ರಣ್ವೀರ್ ಸಿಂಗ್ ಅವರ ಗಲ್ಲಿ ಬಾಯ್ ವಿಡಿಯೋ ಇದೆ.