Kabzaa Item Song : ಜಾಕ್ವೆಲಿನ್, ನೋರಾ ಅಲ್ಲ, 'ಕಬ್ಜ' ಐಟಂ ಸಾಂಗ್‌ನಲ್ಲಿ ಕುಣಿಯೋದು ಯಾರು ಗೊತ್ತಾ?

'ಕಬ್ಜ' ಸ್ಪೆಷಲ್‌ ಸಾಂಗ್‌ನಲ್ಲಿ 'ಬಸಣ್ಣಿ'

ಮಾಸ್ ಕಮರ್ಷಿಯಲ್ ಸಿನಿಮಾ ಅಂದಮೇಲೆ ಐಟಂ ಸಾಂಗ್ ಇರಲೇಬೇಕು ಎನ್ನುವುದು ಕೆಲವರ ವಾದ. 'ಕಬ್ಜ' ಡ್ಯಾನ್ಸ್ ನಂಬರ್‌ನಲ್ಲಿ ಯಾರು ಕುಣಿತ್ತಾರೆ ಎನ್ನುವ ಬಗ್ಗೆ ಕೂಡ ಭಾರೀ ಕುತೂಹಲ ಇತ್ತು. ಬಾಲಿವುಡ್‌ ನಟಿಯರ ಹೆಸರು ಕೂಡ ಕೇಳಿಬಂದಿತ್ತು. ಜಾಕ್ವೆಲಿನ್ ಫರ್ನಾಂಡಿಸ್ ಅಥವಾ ನೋರಾ ಫತೇಹಿ ಸ್ಪೆಷಲ್‌ ಸಾಂಗ್‌ಗೆ ಬಂದು ಹೆಜ್ಜೆ ಹಾಕಿದರೂ ಅಚ್ಚರಿ ಪಡಬೇಕಿಲ್ಲ ಎನ್ನಲಾಗಿತ್ತು. ಸಿನಿಮಾ ಹಿಂದಿಗೂ ಡಬ್ ಆಗಿ ರಿಲೀಸ್ ಆಗುತ್ತಿರುವುದರಿಂದ ಈ ಮಾತು ನಿಜವಾಗಬಹುದು ಎಂದು ಕೆಲವರು ಅಂದುಕೊಂಡಿದ್ದರು. ಆದರೆ 'ಕಬ್ಜ' ಸ್ಪೆಷಲ್‌ ಸಾಂಗ್‌ನಲ್ಲಿ ತಾನ್ಯಾ ಹೋಪ್ ಕುಣಿಯುವದು ಪಕ್ಕಾ ಆಗಿದೆ.

'ಯಜಮಾನ' ಚಿತ್ರದಲ್ಲಿ ಬಸಣ್ಣಿ ಸ್ಟೆಪ್ಸ್

ಸದ್ಯ ಸಿಗುತ್ತಿರುವ ಮಾಹಿತಿ ಪ್ರಕಾರ 'ಕಬ್ಜ' ಐಟಂ ಸಾಂಗ್ ಶೂಟಿಂಗ್‌ಗೆ ಸಕಲ ಸಿದ್ಧತೆ ನಡೆದಿದೆ. 'ಯಜಮಾನ' ಚಿತ್ರದಲ್ಲಿ ಬಸಣ್ಣಿ ಆಗಿ ದರ್ಶನ್ ಜೊತೆ ಹೆಜ್ಜೆ ಹಾಕಿದ್ದ ತಾನ್ಯಾ 'ಕಬ್ಜ' ಕೋಟೆಯಲ್ಲೂ ಬಿಂದಾಸ್ ಆಗಿ ಕುಣಿಯಲಿದ್ದಾರೆ. 'ರಾ ರಾ ರಕ್ಕಮ್ಮ' ಎಂದು ಸುದೀಪ್ ಹಾಗೂ ಜಾಕ್ವೆಲಿನ್‌ನ ಕುಣಿಸಿದ್ದ ತೆಲುಗಿನ ಜಾನಿ ಮಾಸ್ಟರ್ ಈ ಹಾಡಿಗೂ ಕೊರಿಯೋಗ್ರಫಿ ಮಾಡಲಿದ್ದಾರೆ. ಹಾಗಾಗಿ ಸಹಜವಾಗಿಯೇ 'ಕಬ್ಜ' ಸ್ಪೆಷಲ್ ಸಾಂಗ್ ಕುತೂಹಲ ಮೂಡಿಸಿದೆ. ರವಿ ಬಸ್ರೂರು ಹಾಡಿಗೆ ಟ್ಯೂನ್ ಕಂಪೋಸ್ ಮಾಡ್ತಿದ್ದಾರೆ.

2 ಭಾಗಗಳಾಗಿ 'ಕಬ್ಜ' ರಿಲೀಸ್

'ಕಬ್ಜ' ಸ್ಪೆಷಲ್ ಸಾಂಗ್ ಶೂಟಿಂಗ್‌ಗಾಗಿ ನೈಸ್ ರೋಡ್ ಹೊರಭಾಗದಲ್ಲಿ 4 ಎಕರೆ ಜಾಗದಲ್ಲಿ ಅದ್ಧೂರಿ ಸೆಟ್ ನಿರ್ಮಾಣವಾಗುತ್ತಿದೆ. ಫೆಬ್ರವರಿ 11ರಿಂದ 6 ದಿನಗಳ ಕಾಲ ಅಲ್ಲಿ ಸಾಂಗ್ ಚಿತ್ರೀಕರಣ ನಡೆಯಲಿದೆ. ಉಪೇಂದ್ರ, ತಾನ್ಯ ಹೋಪ್ ಜೊತೆ ಒಂದಷ್ಟು ಡ್ಯಾನ್ಸರ್ಸ್ ಸಾಂಗ್‌ನಲ್ಲಿ ಹೆಜ್ಜೆ ಹಾಕಲಿದ್ದಾರೆ. 1940ರಿಂದ 1980ರ ನಡುವಿನ ಕಾಲ್ಪನಿಕ ಕಥೆಯನ್ನು 'ಕಬ್ಜ' ಚಿತ್ರದಲ್ಲಿ ಹೇಳಲಾಗುತ್ತಿದೆ. ರೆಟ್ರೋ ಸ್ಟೈಲ್‌ನಲ್ಲಿ ಈ ಗ್ಯಾಂಗ್‌ಸ್ಟರ್ ಕಥೆಯನ್ನು ಆರ್. ಚಂದ್ರು ಕಟ್ಟಿಕೊಡುತ್ತಿದ್ದಾರೆ. 2 ಭಾಗಗಳಾಗಿ ಸಿನಿಮಾ ಪ್ರೇಕ್ಷಕರ ಮುಂದೆ ಬರ್ತಿದೆ. ಕಿಚ್ಚ ಸುದೀಪ್ ಭಾರ್ಗವ್ ಭಕ್ಷಿ ಆಗಿ ಗೆಸ್ಟ್ ಅಪಿಯರೆನ್ಸ್ ಮಾಡ್ತಿದ್ದಾರೆ.