ರಿಷಬ್ ಸೆಂಚುರಿ : ನೂರು ದಿನ ಪೂರೈಸಿದ 'ಬೆಲ್ ಬಾಟಂ'

ಒಂದು ಒಳ್ಳೆಯ ಕಥೆ, ಹೊಸತನದ ಪ್ರಯೋಗ ಇದ್ದರೆ ಸಿನಿಮಾ ಗೆಲ್ಲುತ್ತದೆ ಎನ್ನುವುದು ಮತ್ತೆ ಸಾಬೀತಾಗಿದೆ. 'ಬೆಲ್ ಬಾಟಂ' ಸಿನಿಮಾ ಇಂದಿಗೆ (ಶುಕ್ರವಾರ) ಸರಿಯಾಗಿ ನೂರು ದಿನಗಳನ್ನು ಪೂರೈಸಿದೆ.

ಐಪಿಎಲ್ ಹಾಗೂ ಚುನಾವಣೆಯ ನಡುವೆಯೂ ಈ ಸಿನಿಮಾ ತನ್ನ ಶಕ್ತಿ ತೋರಿಸಿದೆ. ಬೆಂಗಳೂರಿನ ಸ್ವಪ್ನ, ವೀರೇಶ್, ಸವಿತ, ಸೇರಿದಂತೆ ಸಿಂಗಲ್ ಸ್ಕ್ರೀನ್ ಹಾಗೂ ಮಲ್ಟಿಪ್ಲೆಕ್ಸ್ ನಲ್ಲಿ ಸಿನಿಮಾ ಈಗಲೂ ಪ್ರದರ್ಶನ ಆಗುತ್ತಿದೆ.

ಮೈಸೂರು, ಶಿವಮೊಗ್ಗ, ದಾವಣಗೆರೆ, ಉಡುಪಿ ಸೇರಿದಂತೆ ಕೆಲ ಜಿಲ್ಲಾ ಕೇಂದ್ರದಲ್ಲಿಯೂ ಸಿನಿಮಾ ಓಡುತ್ತಿದೆ. ಈ ಖುಷಿಯನ್ನು ಚಿತ್ರತಂಡ ಪ್ರೇಕ್ಷಕರ ಜೊತೆಗೆ ಹಂಚಿಕೊಳ್ಳಲು ನಿರ್ಧಾರ ಮಾಡಿದೆ.

ನಾಳೆ (ಮೇ 25) ಬೆಂಗಳೂರಿನ ಮಾಗಡಿ ರಸ್ತೆಯ ವೀರೇಶ್ ಚಿತ್ರಮಂದಿರದಲ್ಲಿ ಸಂಜೆ 6 ಗಂಟೆಗೆ 100 ದಿನಗಳ ಯಶಸ್ವಿ ಪ್ರದರ್ಶನದ ಸಂಭ್ರಮವನ್ನು ಪ್ರೇಕ್ಷಕರ ಜೊತೆ ಚಿತ್ರತಂಡ ಸೆಲಿಬ್ರೇಟ್ ಮಾಡುತ್ತಿದೆ

ಇನ್ನು ತಮ್ಮ ಸಂತಸ ಹಂಚಿಕೊಂಡಿರುವ ನಿರ್ದೇಶಕ ಜಯತೀರ್ಥ ''ಇವತ್ತಿಗೆ ಬೆಲ್ ಬಾಟಂ ನೂರು ದಿನಗಳ ಪ್ರದರ್ಶನವನ್ನು ಪೂರೈಸಿದೆ. ನಮ್ಮನ್ನು ಸಮೃದ್ಧಿಯೊಂದಿಗೆ 100 ರ ಗಡಿದಾಟಿಸಿ ಮುನ್ನಡೆಸುತ್ತಿರುವ ಅನ್ನದಾತರಿಗೆ ಮತ್ತು ಬೆಲ್ ಬಾಟಂ ಕಟ್ಟಲು ನನಗೆ ಬೆನ್ನೆಲುಬಾದ ನನ್ನ ನಿರ್ಮಾಪಕರು, ತಂತ್ರಜ್ಞರು, ಕಲಾವಿದರು, ಸಂಗೀತ-ಸಾಹಿತಿಗಳು ಮತ್ತು ವಿತರಕರಿಗೆ ಅನಂತಾನಂತ ಕೃತಜ್ಞತೆಗಳು. Love You All'' ಎಂದಿದ್ದಾರೆ.

'ಬೆಲ್ ಬಾಟಂ' ರಿಷಬ್ ಶೆಟ್ಟಿ ನಾಯಕನಾಗಿ ನಟಿಸಿದ ಮೊದಲ ಸಿನಿಮಾ ಆಗಿತ್ತು. ಹರಿಪ್ರಿಯಾ ನಾಯಕಿಯಾಗಿದ್ದರು. ಸಿನಿಮಾದ ಕಾಮಿಡಿ, ಹಾಡುಗಳು, ನಿರೂಪಣಾ ಶೈಲಿ ಪ್ರೇಕ್ಷಕರಿಗೆ ಬಹಳ ಇಷ್ಟ ಆಗಿತ್ತು.