'ಕ್ರಾಂತಿ' ಟ್ರೈಲರ್ ಲಾಂಚ್ ಈವೆಂಟ್: ದರ್ಶನ್ ಜೊತೆ ವೇದಿಕೆ ಮೇಲೆ ನಿಲ್ಲೋದ್ಯಾರು?

ಒರಾಯನ್ ಮಾಲ್‌ನಲ್ಲಿ ಟ್ರೈಲರ್ ಲಾಂಚ್

ನಗರದ ಒರಾಯನ್ ಮಾಲ್‌ನಲ್ಲಿ ನಾಳೆ (ಜನವರಿ 7) ಸಂಜೆ ಟ್ರೈಲರ್ ಲಾಂಚ್ ಕಾರ್ಯಕ್ರಮ ಆಯೋಜಿಸಲಾಗಿದೆ. ಹುಬ್ಬಳ್ಳಿಯಲ್ಲಿ 'ಪುಷ್ಪವತಿ' ಸಾಂಗ್ ರಿಲೀಸ್ ಸುದ್ದಿಗೋಷ್ಠಿ ವೇಳೆಯೇ ಬೆಂಗಳೂರಿನಲ್ಲಿ ಟ್ರೈಲರ್ ರಿಲೀಸ್ ಮಾಡುವ ಬಗ್ಗೆ ದರ್ಶನ್ ಮಾತನಾಡಿದ್ದರು. ಅದಕ್ಕೆ ಕಾರಣವನ್ನು ಕೂಡ ಕೊಟ್ಟಿದ್ದರು. ಸಂಜೆ 6.45ಕ್ಕೆ ಈವೆಂಟ್ ಶುರುವಾಗಲಿದೆ. ದೃಶ್ಯ ಮಾಧ್ಯಮಗಳು ದರ್ಶನ್ ಕುರಿತು ಸುದ್ದಿ ಮಾಡುತ್ತಿಲ್ಲ. ಇನ್ನುಳಿದಂತೆ ಡಿಜಿಟಲ್ ಮಾಧ್ಯಮ, ಯೂಟ್ಯೂಬ್ ಮಾಧ್ಯಮದವರು ಭಾಗಿ ಆಗಲಿದ್ದಾರೆ. ದರ್ಶನ್ ಫ್ಯಾನ್ಸ್‌ 'ಕ್ರಾಂತಿ' ಟ್ರೈಲರ್ ನೋಡಲು ಕಾತರದಿಂದ ಕಾಯುತ್ತಿದ್ದಾರೆ.

ಈವೆಂಟ್‌ಗೆ ಬರುವ ಅತಿಥಿಗಳು

'ಕ್ರಾಂತಿ' ಚಿತ್ರದಲ್ಲಿ ಕ್ರೇಜಿಸ್ಟಾರ್ ವಿ. ರವಿಚಂದ್ರನ್, ಮುಖ್ಯಮಂತ್ರಿ ಚಂದ್ರು, ಉಮಾಶ್ರೀ, ಸುಮಲತಾ ಅಂಬರೀಶ್ ಸೇರಿದಂತೆ ಅನುಭವಿ ಕಲಾವಿದರು ನಟಿಸಿದ್ದಾರೆ. ಮೈಸೂರು, ಹೊಸಪೇಟೆ, ಹುಬ್ಬಳ್ಳಿಯಲ್ಲಿ ನಡೆದ ಸಾಂಗ್ ರಿಲೀಸ್ ವೇಳೆ ದರ್ಶನ್, ರಚಿತಾ ರಾಮ್ ಮಾತ್ರ ಭಾಗಿ ಆಗಿದ್ದರು. ಆದರೆ ಟ್ರೈಲರ್ ಲಾಂಚ್ ಈವೆಂಟ್‌ಗೆ ಇಡೀ ಚಿತ್ರತಂಡ ಭಾಗಿ ಆಗಲಿದೆ. ಎಲ್ಲರಿಗೂ ಬೆಳ್ಳಿ ಪರದೆಯಲ್ಲಿ 'ಕ್ರಾಂತಿ' ಟ್ರೈಲರ್, ಸಾಂಗ್ಸ್ ಪ್ರದರ್ಶನ ಮಾಡಲಾಗುತ್ತದೆ. ಒಂದರ್ಥದಲ್ಲಿ ಕ್ರೇಜಿಸ್ಟಾರ್ ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಸಂಜೆ 7.30ರ ಸುಮಾರಿಗೆ ಟ್ರೈಲರ್ ಲಾಂಚ್ ಆಗಲಿದೆ.

ಟ್ರೈಲರ್ ಗೆಲ್ಲಿಸಲು ಫ್ಯಾನ್ಸ್ ಪ್ಲ್ಯಾನ್

ಟ್ರೈಲರ್‌ನ ದೊಡ್ಡಮಟ್ಟದಲ್ಲಿ ನೋಡಿ ಹಿಟ್ ಮಾಡಲು ಅಭಿಮಾನಿಗಳು ಕಸರತ್ತು ನಡೆಸುತ್ತಿದ್ದಾರೆ. 24 ಗಂಟೆಗಳಲ್ಲಿ ಅತಿ ಹೆಚ್ಚು ವೀವ್ಸ್, ಲೈಕ್ಸ್ ಗಿಟ್ಟಿಸಿದ ಕನ್ನಡ ಸಿನಿಮಾ ಟ್ರೈಲರ್‌ಗಳ ಲಿಸ್ಟ್‌ನಲ್ಲಿ 'ಕ್ರಾಂತಿ' ಟ್ರೈಲರ್‌ ಅನ್ನು ಉತ್ತಮ ಸ್ಥಾನದಲ್ಲಿ ಇರುವಂತೆ ನೋಡಿಕೊಳ್ಳಬೇಕು ಎಂದು ಪ್ಲ್ಯಾನ್ ಮಾಡುತ್ತಿದ್ದಾರೆ. ದರ್ಶನ್ ನಟನೆಯ 'ರಾಬರ್ಟ್' ಸಿನಿಮಾ ಟ್ರೈಲರ್ 24 ಗಂಟೆಗಳಲ್ಲಿ ಮೂರುವರೆ ಲಕ್ಷ ಲೈಕ್ಸ್, 80 ಲಕ್ಷ ವೀವ್ಸ್ ಸಾಧಿಸಿತ್ತು. ಅದನ್ನು ಮೀರಿಸಿ ದಾಖಲೆ ಬರೆಯಲು ಫ್ಯಾನ್ಸ್ ಕಾಯುತ್ತಿದ್ದಾರೆ. ವಿ. ಹರಿಕೃಷ್ಣ ಜಬರ್ದಸ್ತ್ ಬಿಜಿಎಂ ಹಿನ್ನಲೆಯಲ್ಲಿ ಕ್ಲಾಸ್, ಮಾಸ್ ಝಲಕ್ ಮಿಕ್ಸ್ ಮಾಡಿ 'ಕ್ರಾಂತಿ' ಟ್ರೈಲರ್ ಕಟ್ ಮಾಡಲಾಗಿದೆ.

'ಕ್ರಾಂತಿ' ಸಾಂಗ್ಸ್ ಆರ್ಭಟ

'ಕ್ರಾಂತಿ' ಚಿತ್ರದ 3 ಹಾಡುಗಳನ್ನು ಅಭಿಮಾನಿಗಳ ಸಮ್ಮುಖದಲ್ಲೇ ಮೂರು ಬೇರೆ ಬೇರೆ ಜಿಲ್ಲೆಗಳಲ್ಲಿ ರಿಲೀಸ್ ಮಾಡಲಾಗಿತ್ತು. 3 ಸಾಂಗ್ಸ್ ದರ್ಶನ್ ಫ್ಯಾನ್ಸ್ ಮನಗೆದ್ದಿದೆ. 'ಬೊಂಬೊ ಬೊಂಬೆ' ಹಾಗೂ 'ಪುಷ್ಪವತಿ' 10 ಮಿಲಿಯನ್‌ಗೂ ಅಧಿಕ ವೀವ್ಸ್ ಸಾಧಿಸಿದವೆ. 'ಧರಣಿ' ಸಾಂಗ್ ವೀವ್ಸ್ 7 ಮಿಲಿಯನ್ ಮೀರಿದೆ. ಜನವರಿ 26ಕ್ಕೆ ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ 'ಕ್ರಾಂತಿ' ಸಿನಿಮಾ ತೆರೆಗೆ ಬರಲಿದೆ. ಚಿತ್ರದಲ್ಲಿ ಅಕ್ಷರ 'ಕ್ರಾಂತಿ'ಯ ಕಥೆಯನ್ನು ಹೇಳಲಾಗ್ತಿದೆ.