ಗಂಡು ಮೆಟ್ಟಿದ ನಾಡಲ್ಲಿ ಜಮೀರ್ ಪುತ್ರನ ಮುಂದೆ ದರ್ಶನ್ ಚಾಲೆಂಜ್!

'ಬನಾರಸ್' ಈವೆಂಟ್‌ಗೆ ದರ್ಶನ್ ಬಲ

ಹೌದು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಹುಬ್ಬಳ್ಳಿಯಲ್ಲಿ ನಡೆಯಲಿರುವ 'ಬನಾರಸ್' ಸಿನಿಮಾ ಪ್ರೀ ರಿಲೀಸ್‌ ಈವೆಂಟ್‌ಗೆ ಮುಖ್ಯ ಅತಿಥಿಯಾಗಿ ಬರ್ತಿದ್ದಾರೆ. ಮಾಜಿ ಸಚಿವರಾದ ಜಮೀರ್ ಅಹಮದ್ ಹಾಗೂ ದರ್ಶನ್ ಆತ್ಮೀಯ ಸ್ನೇಹಿತರು. ಝೈದ್ ಖಾನ್ ಕೂಡ ದಚ್ಚು ಬಳಗದಲ್ಲಿ ಗುರ್ತಿಸಿಕೊಂಡಿದ್ದಾರೆ. ಸಿನಿಮಾ ಪೋಸ್ಟರ್ ಲಾಂಚ್‌ ಸಮಯದಿಂದಲೂ ತಂಡದ ಜೊತೆಗಿದ್ದಾರೆ. ಬಹಳ ದಿನಗಳ ನಂತರ ದರ್ಶನ್ ಸಿನಿಮಾವೊಂದರ ಪ್ರೀ ರಿಲೀಸ್ ಈವೆಂಟ್‌ಗೆ ಬರ್ತಿದ್ದಾರೆ.

ರೈಲ್ವೆ ಸ್ಪೋರ್ಟ್ಸ್‌ ಗ್ರೌಂಡ್‌ನಲ್ಲಿ ಈವೆಂಟ್

ಹುಬ್ಬಳ್ಳಿಯ ರೈಲ್ವೆ ಸ್ಪೋರ್ಟ್ಸ್‌ ಗ್ರೌಂಡ್‌ನಲ್ಲಿ ಶನಿವಾರ ಸಂಜೆ 7 ಗಂಟೆಗೆ 'ಬನಾರಸ್' ಸಿನಿಮಾ ಈವೆಂಟ್ ಶುರುವಾಗಲಿದೆ. ದೊಡ್ಡ ವೇದಿಕೆಯಲ್ಲಿ ಚಿತ್ರತಂಡದ ಜೊತೆಗೆ ಚಿತ್ರರಂಗದ ತಾರೆಯರು ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಲಿದ್ದಾರೆ. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಕಾರ್ಯಕ್ರಮದ ಕೇಂದ್ರಬಿಂದು ಆಗಿದ್ದು ಅಭಿಮಾನಿಗಳು ನೆಚ್ಚಿನ ನಟನನ್ನು ನೋಡಲು ದೊಡ್ಡ ಸಂಖ್ಯೆಯಲ್ಲಿ ಜಮಾಯಿಸುವ ಸಾಧ್ಯತೆಯಿದೆ.

'ಬನಾರಸ್' ಚಿತ್ರದಲ್ಲಿ ದರ್ಶನ್ ನಟನೆ?

ನಟ ದರ್ಶನ್ ಕೂಡ 'ಬನಾರಸ್' ಚಿತ್ರದ ಅತಿಥಿ ಪಾತ್ರದಲ್ಲಿ ನಟಿಸಿದ್ದಾರೆ ಎನ್ನಲಾಗ್ತಿದೆ. ಈ ಬಗ್ಗೆ ಚಿತ್ರತಂಡ ಯಾವುದೇ ಸುಳಿವು ನೀಡಿಲ್ಲ. ಪ್ರೀ ರಿಲೀಸ್‌ ಈವೆಂಟ್‌ನಲ್ಲೇ ಈ ಬಗ್ಗೆ ಖಚಿತ ಮಾಹಿತಿ ಸಿಗಲಿದೆ. 'ರಾಬರ್ಟ್' ನಂತರ ದರ್ಶನ್ ನಟನೆಯ ಯಾವುದೇ ಸಿನಿಮಾ ತೆರೆಗೆ ಬಂದಿಲ್ಲ. ಹಾಗಾಗಿ 'ಬನಾರಸ್' ಚಿತ್ರದಲ್ಲಿ ನೆಚ್ಚಿನ ನಟನನ್ನು ಕಣ್ತುಂಬಿಕೊಳ್ಳಲು ಕಾಯುತ್ತಿದ್ದಾರೆ. ಸ್ನೇಹಪೂರ್ವಕವಾಗಿ ದರ್ಶನ್ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ ಎನ್ನಲಾಗ್ತಿದೆ. ಪಾತ್ರಕ್ಕಾಗಿ ಯಾವುದೇ ಸಂಭಾವನೆಯನ್ನು ಪಡೆದಿಲ್ಲವಂತೆ. ಆದರೆ ನಿರ್ಮಾಪಕರು ದರ್ಶನ್‌ಗೆ ಪ್ರೀತಿಯಿಂದ ದುಬಾರಿ ವಾಚ್‌ವೊಂದನ್ನು ಉಡುಗೊರೆಯಾಗಿ ನೀಡಿದ್ದಾರೆ ಎನ್ನುವ ಮಾತುಗಳು ಕೇಳಿಬರ್ತಿದೆ.

ನವೆಂಬರ್ 4ಕ್ಕೆ ಸಿನಿಮಾ ರಿಲೀಸ್

ಟೈಮ್ ಟ್ರಾವೆಲ್ ಬ್ಯಾಕ್‌ಡ್ರಾಪ್‌ನಲ್ಲಿ ನಡೆಯುವ ಒಂದು ರೊಮ್ಯಾಂಟಿಕ್ ಲವ್ ಸ್ಟೋರಿ 'ಬನಾರಸ್'. ಆಕ್ಷನ್, ಕಾಮಿಡಿ, ಸಸ್ಪೆನ್ಸ್, ಥ್ರಿಲ್ ಎಲ್ಲವೂ ಸಿನಿಮಾದಲ್ಲಿದೆ. 'ಬನಾರಸ್'(ವಾರಣಾಸಿ) ನಗರದ ಹಿನ್ನಲೆಯಲ್ಲಿ ಈ ಕಥೆಯನ್ನು ಹಣೆಯಲಾಗಿದೆ. ಟ್ರೈಲರ್, ಸಾಂಗ್ಸ್‌ನಲ್ಲಿ ಝೈದ್- ಸೋನಲ್ ಕೆಮೆಸ್ಟ್ರಿ ಚೆನ್ನಾಗಿ ಮೂಡಿ ಬಂದಿರುವುದು ಗೊತ್ತಾಗುತ್ತಿದೆ. ಡೀ ಬೀಟ್ಸ್ ಸಂಸ್ಥೆ ಚಿತ್ರದ ಕರ್ನಾಟಕ ವಿತರಣೆ ಹಕ್ಕು ಖರೀರಿಸಿದೆ. ಬೇರೆ ಭಾಷೆಗಳ ವಿತರಣೆ ಹಕ್ಕು ಒಳ್ಳೆ ಬೆಲೆಗೆ ಮಾರಾಟವಾಗಿದೆ. ನವೆಂಬರ್ 4ಕ್ಕೆ ತೆರೆಮೇಲೆ 'ಬನಾರಸ್' ಪ್ರೇಮಕಾವ್ಯ ಅನಾವರಣವಾಗಲಿದೆ.