ಈ ತಿಂಡಿ ತಿನ್ನೋಕೆ ಮಲ್ಲೇಶ್ವರಂಗೆ ಬಂದಿದ್ದರಂತೆ ದೀಪಿಕಾ ಪಡುಕೋಣೆ.!

ಕರ್ನಾಟಕ ಮೂಲದ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಇಂದು ವಿಶ್ವಮಟ್ಟದಲ್ಲಿ ಖ್ಯಾತಿಗಳಿಸಿಕೊಂಡಿರುವ ನಟಿ. ದೀಪಿಕಾ ತಮ್ಮ ಸಿನಿ ಕರಿಯರ್ ಆರಂಭಿಸಿದ್ದೇ ಕನ್ನಡ ಚಿತ್ರರಂಗದಿಂದ ಎನ್ನುವುದು ವಿಶೇಷ.

ದೀಪಿಕಾ ಪಡುಕೋಣೆ ಎಷ್ಟೇ ಎತ್ತರಕ್ಕೆ ಹೋದರು, ಕರ್ನಾಟಕ ಅದರಲ್ಲೂ ಬೆಂಗಳೂರನ್ನ ಮರೆಯುವುದಿಲ್ಲ. ಯಾಕಂದ್ರೆ, ತಮ್ಮ ಚಿತ್ರಗಳ ಪ್ರಮೋಷನ್ ಗಾಗಿ ಆಗಾಗ ಸಿಲಿಕಾನ್ ಸಿಟಿಗೆ ಬಂದು ಹೋಗುತ್ತಿರುತ್ತಾರೆ. ಹೀಗಿರುವಾಗ, ಇದೀಗ, ದೀಪಿಕಾಳ ಒಂದು ಫೋಟೋ ವೈರಲ್ ಆಗಿದೆ.

ಬೆಂಗಳೂರಿನ ಮಲೇಶ್ವರಂನಲ್ಲಿರುವ ವೀಣಾ ಸ್ಟೋರ್ ಮಾಲೀಕರ ಜೊತೆ ದೀಪಿಕಾ ಪಡುಕೋಣೆ ಫೋಟೋ ತೆಗೆಸಿಕೊಂಡಿರುವುದು. ಈ ಫೋಟೋ ಹಿಂದಿನ ಕಹಾನಿ ಹುಡುಕಿದಾಗ ಗೊತ್ತಾಗಿದ್ದು ಏನಪ್ಪಾ ಅಂದ್ರೆ, ದೀಪಿಕಾ ಮಲ್ಲೇಶ್ವರಂನಲ್ಲಿ ಇಡ್ಲಿ-ವಡಾ ತಿನ್ನೋಕೆ ಬಂದಿದ್ದರಂತೆ.

ಹೌದು, ದೀಪಿಕಾ ಬೆಳ್ಳಂಬೆಳಗ್ಗೆ ಆರು ಮೂವತ್ತಕ್ಕೆ ಇವರ ಹೋಟೆಲ್​ಗೆ ಬಂದು ಇಡ್ಲಿ ವಡೆ ತಿಂದು ಹೋಗಿದ್ದಾರಂತೆ. ಅದೇ ಖುಷಿಯಲ್ಲಿ ಮಾಲೀಕ ಪ್ರದೀಪ್ ಜೊತೆ ಒಂದು ಸೆಲ್ಫಿಗೆ ಫೋಸ್ ಕೊಟ್ಟು ಹೋಗಿದ್ದಾರೆ.

ಅಂದ್ಹಾಗೆ, ಮಲ್ಲೇಶ್ವರಂನಲ್ಲಿ ದೀಪಿಕಾ ಪಡುಕೋಣೆ ಅವರ ಮನೆ ಇದ್ದು, ಬೆಂಗಳೂರಿಗೆ ಬಂದಾಗ ಈ ಹೋಟೆಲ್ ಗೆ ಬರುತ್ತಿರುತ್ತಾರಂತೆ.