ಏನೇ ಹೇಳಿ.....ಆಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾಗೆ ತುಂಬಾ ಅದೃಷ್ಟ 'ರಿ'!

ಮೊದಲ ಚಿತ್ರದ ಅದ್ಧೂ'ರಿ'

ಧ್ರುವ ಸರ್ಜಾ ನಟಿಸಿದ ಮೊದಲ ಚಿತ್ರ ಅದ್ಧೂರಿ. ಎಪಿ ಅರ್ಜುನ್ ನಿರ್ದೇಶಿಸಿದ್ದ ಈ ಚಿತ್ರ ದೊಡ್ಡ ಹಿಟ್ ಆಗಿತ್ತು. ಧ್ರುವ ಎಂಟ್ರಿಗೆ ತಕ್ಕ ಸಿನಿಮಾ ಇದಾಗಿತ್ತು. ಮೂರು ಅಕ್ಷರಗಳ ಟೈಟಲ್‌ ಇದಾಗಿತ್ತು. ರಾಧಿಕಾ ಪಂಡಿತ್ ನಾಯಕಿಯಾಗಿ ನಟಿಸಿದ್ದರು.

ಚೇತನ್ ಜೊತೆ ಭರ್ಜ'ರಿ'

ಅದ್ಧೂರಿ ಹಿಟ್ ಆದ ಬಳಿಕ ಚೇತನ್ ಕುಮಾರ್ ಜೊತೆ ಬಹದ್ದೂರ್ ಎಂಬ ಸಿನಿಮಾ ಮಾಡಿದರು. ಅದು ಸೂಪರ್ ಹಿಟ್ ಆಯ್ತು. ಅದಾದ ಬಳಿಕ ಭರ್ಜರಿ ಸಿನಿಮಾ ಮಾಡಿದರು. ಈ ಚಿತ್ರದ ಹೆಸರಿನಲ್ಲೂ ಮೂರೇ ಅಕ್ಷರ ಇತ್ತು. ಜೊತೆಗೆ ಕೊನೆಯ ಅಕ್ಷರ 'ರಿ' ಆಗಿತ್ತು. ಇದಕ್ಕೂ ಮುಂಚೆ ಅದ್ಧೂರಿ, ಆಮೇಲೆ ಭರ್ಜರಿ. ಈ ಎರಡು ಚಿತ್ರಗಳಲ್ಲೂ 'ರಿ' ಸಾಮಾನ್ಯವಾಗಿತ್ತು.

ಪೊಗರು ನಂತರ ದುಬಾ'ರಿ'

ನಂದ ಕಿಶೋರ್ ಮತ್ತು ಧ್ರುವ ಸರ್ಜಾ ಕಾಂಬಿನೇಷನ್‌ನಲ್ಲಿ ಪೊಗರು ಸಿನಿಮಾ ತಯಾರಾಗಿದೆ. ಈ ಸಿನಿಮಾ ಆದ್ಮೇಲೆ ಧ್ರುವ ಕೈಗೆತ್ತಿಕೊಂಡಿರುವ ಚಿತ್ರ 'ದುಬಾರಿ'. ವಿಶೇಷ ಅಂದ್ರೆ ಈ ಚಿತ್ರದ ಹೆಸರಿನಲ್ಲಿ ಮೂರೇ ಅಕ್ಷರ. ಕೊನೆಯ ಅಕ್ಷರ 'ರಿ'. ಧ್ರುವ ಅವರ ಐದು ಚಿತ್ರಗಳ ಪೈಕಿ ಮೂರು ಚಿತ್ರಗಳ ಶೀರ್ಷಿಕೆಯಲ್ಲಿ ಸಾಮ್ಯತೆ ಇದೆ. ಇದು ಒಂದು ರೀತಿ ಆಕ್ಷನ್ ಪ್ರಿನ್ಸ್‌ಗೆ ಅದೃಷ್ಟ ಇರಬಹುದು.

ಉದಯ್ ಮೆಹ್ತಾ ಜೊತೆ ದುಬಾರಿ

ಸುದೀಪ್ ಜೊತೆ 'ಬಚ್ಚನ್' ಸಿನಿಮಾ ಮಾಡಿದ್ದ ಉದಯ್ ಮೆಹ್ತಾ ಹೊತೆ ಧ್ರುವ ತಮ್ಮ ಐದನೇ ಚಿತ್ರ ಮಾಡುತ್ತಿದ್ದಾರೆ. 'ದುಬಾರಿ' ಚಿತ್ರಕ್ಕೂ ನಂದ ಕಿಶೋರ್ ಆಕ್ಷನ್ ಕಟ್ ಹೇಳುತ್ತಿದ್ದಾರೆ. ಸದ್ಯಕ್ಕೆ ಸ್ಕ್ರಿಪ್ಟ್ ಪೂಜೆ ಮುಗಿಸಿ ಟೈಟಲ್ ಲಾಂಚ್ ಮಾಡಿ ಸಿನಿಮಾ ಆರಂಭಿಸಿರುವ ದುಬಾರಿ ಹೆಚ್ಚಿನ ಮಾಹಿತಿ ಬಿಟ್ಟುಕೊಟ್ಟಿಲ್ಲ.