ಟಾಲಿವುಡ್ ಗೆ ರಿಮೇಕ್ ಆಗಲಿದೆ 'ಒಂದು ಮೊಟ್ಟೆಯ ಕಥೆ'

ಕನ್ನಡದ ಎಷ್ಟೋ ಸಿನಿಮಾಗಳು ಬೇರೆ ಬೇರೆ ಭಾಷೆಗೆ ರಿಮೇಕ್ ಆಗುತ್ತಿವೆ. ಆ ಸಾಲಿಗೆ ಈಗ 'ಒಂದು ಮೊಟ್ಟೆಯ ಕಥೆ' ಕೂಡ ಸೇರಕೊಳ್ಳಲಿದೆ. ಈ ಮೂಲಕ ತೆಲುಗು ಜನರು ಸಹ ಬೋಳು ತಲೆಯ ಗೋಳು ಕೇಳುವ ಅವಕಾಶ ಪಡೆಯಲಿದ್ದಾರೆ.

ನಿರ್ದೇಶಕ ಪವನ್ ಕುಮಾರ್ ಇತ್ತೀಚಿಗಷ್ಟೆ 'ಯೂ ಟರ್ನ್' ಸಿನಿಮಾವನ್ನು ತೆಲುಗಿನಲ್ಲಿ ರಿಮೇಕ್ ಮಾಡಿದ್ದರು. ಕಳೆದ ವಾರ ತಾನೇ ರಿಲೀಸ್ ಆಗಿದ್ದ ಈ ಸಿನಿಮಾಗೆ ದೊಡ್ಡ ಪ್ರತಿಕ್ರಿಯೆ ಸಿಗುತ್ತಿದೆ. ಇದರಿಂದ ಪವನ್ ಆತ್ಮ ವಿಶ್ವಾಸ ಕೂಡ ಹೆಚ್ಚಾಗಿದೆ. ಅದೇ ಸಂತಸದಲ್ಲಿ ಅವರು 'ಒಂದು ಮೊಟ್ಟೆಯ ಕಥೆ' ಸಿನಿಮಾವನ್ನು ಕೂಡ ಟಾಲಿವುಡ್ ನಲ್ಲಿ ಮಾಡುವ ಮನಸ್ಸು ಮಾಡಿದ್ದಾರೆ.

'ಒಂದು ಮೊಟ್ಟೆಯ ಕಥೆ' ರಿಮೇಕ್ ಬಗ್ಗೆ ಇತ್ತೀಚಿಗಷ್ಟೆ ಪವನ್ ಮಾತನಾಡಿದ್ದಾರೆ. ಕನ್ನಡದಲ್ಲಿ ರಾಜ್ ಬಿ ಶೆಟ್ಟಿ ನಿರ್ದೇಶನ ಮಾಡಿದ್ದ ಈ ಸಿನಿಮಾವನ್ನು ಪವನ್ ನಿರ್ಮಾಣ ಮಾಡಿದ್ದರು. ಅದೇ ರೀತಿ ಈಗ ತೆಲುಗಿನಲ್ಲಿ ಇನ್ನೊಬ್ಬ ನಿರ್ದೇಶಕರ ಕೈ ನಲ್ಲಿ ಚಿತ್ರವನ್ನು ಮಾಡಿಸುವ ಪ್ಲಾನ್ ಪವನ್ ಅವರದ್ದು.

ಸಿನಿಮಾವನ್ನು ರಿಮೇಕ್ ಮಾಡುವ ಆಲೋಚನೆ ಪವನ್ ಕುಮಾರ್ ಅವರಿಗೆ ಇದೆ. ಆದರೆ, ಸದ್ಯಕ್ಕೆ ಇನ್ನೂ ರಿಮೇಕ್ ಬಗ್ಗೆ ಯಾವುದು ಫೈನಲ್ ಆಗಿಲ್ಲವಂತೆ.

ಅಂದಹಾಗೆ, 'ಲೂಸಿಯಾ' 'ಯೂ ಟರ್ನ್', 'ಕಿರಿಕ್ ಪಾರ್ಟಿ', 'ರಾಮಾ ರಾಮಾ ರೇ' ಬೇರೆ ಭಾಷೆಗಳಿಗೆ ರಿಮೇಕ್ ಆಗಿರುವ ಇತ್ತೀಚಿಗಿನ ಪ್ರಮುಖ ಸಿನಿಮಾಗಳಾಗಿವೆ.