'ಲವ್ 360' ಚಿತ್ರ ನೋಡಿ ಎಂದು ಕೈಮುಗಿದು ಕೇಳಿಕೊಂಡ ನಿರ್ದೇಶಕ ಶಶಾಂಕ್!

ವೀರೇಶ್ ಚಿತ್ರಮಂದಿರದಲ್ಲಿ ಒಳ್ಳೆ ಕಲೆಕ್ಷನ್

'ಲವ್ 360' ಸಿನಿಮಾ ನೋಡಿದವರೆಲ್ಲಾ ಮೆಚ್ಚಿಕೊಳ್ಳುತ್ತಿದ್ದಾರೆ. ಆದರೆ ವೀರೇಶ್ ಥಿಯೇಟರ್‌ನಲ್ಲಿ ಮಾತ್ರ ರೆಸ್ಪಾನ್ಸ್ ಚೆನ್ನಾಗಿದೆ. ಒಳ್ಳೆ ಕಲೆಕ್ಷನ್ ಆಗುತ್ತಿದೆ. ಆದರೆ ಉಳಿದ ಕಡೆಗಳಲ್ಲಿ ಕಲೆಕ್ಷನ್ ನಿರೀಕ್ಷಿತ ಮಟ್ಟದಲ್ಲಿ ಸಾಗುತ್ತಿಲ್ಲ. ಯಾವುದೇ ಸಿನಿಮಾದ ಭವಿಷ್ಯ ನಿರ್ಧಾರವಾಗುವುದು ಮೊದಲ ಶನಿವಾರ ಮತ್ತು ಭಾನುವಾರ. ಆದರೆ ಭಾನುವಾರವೂ ನಿರೀಕ್ಷಿತ ಮಟ್ಟದಲ್ಲಿ ಪ್ರೇಕ್ಷಕರು ಬರುತ್ತಿಲ್ಲ. ಇಂದು ಬಂದು ಸಿನಿಮಾ ನೋಡಿ. ಸಿನಿಮಾ ಹೇಗಿದೆ ಎಂದು ನಾಲ್ಕು ಜನಕ್ಕೆ ಹೇಳಿ ಎಂದು ನಿರ್ದೇಶಕರು ವಿನಂತಿಸಿಕೊಂಡಿದ್ದಾರೆ.

ಪ್ರೇಕ್ಷಕರು ಯಾಕೆ ಸಿನಿಮಾ ನೋಡುತ್ತಿಲ್ಲ?

ನಿರ್ದೇಶಕರು ಹೇಳುವಂತೆ ಹೊಸಬರ ಸಿನಿಮಾ ಅನ್ನುವ ಕಾರಣಕ್ಕೆ, ಸಿನಿಮಾ ಹೇಗಿದೆ ಅನ್ನುವುದು ಗೊತ್ತಾಗದ ಕಾರಣಕ್ಕೆ ಆರಂಭದಲ್ಲಿ ಒಳ್ಳೆ ಓಪನಿಂಗ್ ಸಿಗದೇ ಇರಬಹುದು. ಆದರೆ ಈಗ ಸಿನಿಮಾ ಚೆನ್ನಾಗಿದೆ ಎಂದು ನೋಡಿದವರೆಲ್ಲಾ ಹೇಳುತ್ತಿದ್ದಾರೆ. ವಿಮರ್ಶಕರಿಂದಲೂ ಒಳ್ಳೆ ಅಂಕ ಸಿಕ್ಕಿದೆ. ಇದಕ್ಕಿಂತ ಮತ್ತೇನು ಬೇಕು. ಬಂದು ಸಿನಿಮಾ ನೋಡಿ ಆಶೀರ್ವದಿಸಿ, ಒಳ್ಳೆ ಪ್ರತಿಭೆಗಳನ್ನಿಟ್ಟುಕೊಂಡು ಒಳ್ಳೆ ಸಿನಿಮಾ ಮಾಡಿಯೂ ನಷ್ಟ ಅನುಭವಿಸಿದಂತಾಗುತ್ತದೆ. ಸಿನಿಮಾವನ್ನು ಗೆಲ್ಲಿಸುವುದು ನಿಮ್ಮ ಕೈಯಲ್ಲಿದೆ ಎಂದು ಶಶಾಂಕ್ ಹೇಳಿದ್ದಾರೆ.

ಅಪರೂಪದ ಪ್ರೇಮ್‌ ಕಹಾನಿ 'ಲವ್ 360'

ಚಿಕ್ಕಂದಿನಿಂದಲೂ ಒಟ್ಟಿಗೆ ಬದುಕುವ ರಾಮ್‌ ಹಾಗೂ ಜಾನಕಿಯ ಕಥೆ 'ಲವ್ 360'. ಈ ಮುಗ್ಧ ಪ್ರೇಮಿಗಳ ಬದುಕಿನಲ್ಲಿ ಖಳನಾಯಕರ ಆಗಮನವಾಗುತ್ತದೆ. ಅಲ್ಲಿಂದ ಮುಂದೆ ಏನೆಲ್ಲಾ ಆಗುತ್ತೆ? ಅವರಿಬ್ಬರ ಪ್ರೀತಿಗೆ ಎದುರಾಗುವ ಸವಾಲುಗಳೇನು? ಅದನ್ನೆಲ್ಲಾ ಮೀರಿ ಅವರ ಪ್ರೀತಿ ಗೆಲ್ತಾ ಇಲ್ವಾ ಅನ್ನುವುದನ್ನು ಥಿಯೇಟರ್‌ನಲ್ಲಿಯೇ ನೋಡಬೇಕು. ಆಕ್ಷನ್, ಕಾಮಿಡಿ, ಮರ್ಡರಿ ಮಿಸ್ಟರ್ ಅಂಶಗಳೆಲ್ಲಾ ಸೇರಿಸಿ ಬಹಳ ಚೆಂದವನ್ನು ಕಥೆಯನ್ನು ನಿರೂಪಿಸಿದ್ದಾರೆ. ರಾಮ್‌ ಆಗಿ ಪ್ರವೀಣ್‌ ಜಾನಕಿಯಾಗಿ ರಚನಾ ಪಾತ್ರಗಳನ್ನು ಆವರಿಸಿಕೊಂಡಿದ್ದಾರೆ. ಪ್ರೀತಿಯ 360 ಕೋನಗಳನ್ನು ತೋರಿಸುವ ಪ್ರಯತ್ನ ಮಾಡಿದ್ದು ಕಂಪ್ಲೀಟ್ ಫ್ಯಾಮಿಲಿ ಕೂತು ನೋಡಬಹುದಾದ ಸಿನಿಮಾ ಇದು.

ಚಿತ್ರಕ್ಕೆ ತಾರೆಯರ ಬೆಂಬಲ

ನಿರ್ದೇಶಕ ಶಶಾಂಕ್ ವಿಡಿಯೋ ಮಾಡಿ ಎಲ್ಲರೂ ಬಂದು ಸಿನಿಮಾ ನೋಡುವಂತೆ ಮನವಿ ಮಾಡುತ್ತಿದ್ದಂತೆ ಸ್ಯಾಂಡಲ್‌ವುಡ್ ತಾರೆಯರು ಬೆಂಬಲ ಸೂಚಿಸಿದ್ದಾರೆ. ನಟ, ನಿರ್ದೇಶಕ ಉಪೇಂದ್ರ ಆ ವಿಡಿಯೋ ಶೇರ್ ಮಾಡಿ "ಕನ್ನಡ ಚಿತ್ರ ಅಭಿಮಾನಿಗಳೇ ದಯವಿಟ್ಟು ಈ ವೀಡಿಯೋ ನೋಡಿ, ಶೇರ್ ಮಾಡಿ, ಹೊಸಬರ ಮತ್ತು ಸ್ರಜನಶೀಲ ನಿರ್ದೇಶಕ ಶಶಾಂಕ್ ಚಿತ್ರ ಲವ್ 360 ನೋಡಿ ಆಶೀರ್ವದಿಸಿ" ಎಂದು ಮನವಿ ಮಾಡಿಕೊಂಡಿದ್ದಾರೆ. ಸಾಕಷ್ಟು ಜನ ಅಭಿಮಾನಿಗಳು ಚಿತ್ರತಂಡದ ಬೆನ್ನಿಗೆ ನಿಂತಿದ್ದಾರೆ.