ದುನಿಯಾ ವಿಜಯ್ 'ಜಾಕ್ಸನ್' ತಮಿಳು ರೀಮೇಕ್

ನಟ ದುನಿಯಾ ವಿಜಯ್ ಅವರ ಹೊಸ ಚಿತ್ರ 'ಜಾಕ್ಸನ್' ಸೆಟ್ಟೇರಿದೆ. ಅವರ 39ನೇ ಹುಟ್ಟುಹಬ್ಬದ ದಿನ 'ಜಾಕ್ಸನ್' ಚಿತ್ರಕ್ಕೆ ಚಾಲನೆ ಸಿಕ್ಕಿರುವುದು ವಿಜಿ ಅಭಿಮಾನಿಗಳಿಗೆ ಎಲ್ಲಿಲ್ಲದ ಖುಷಿ ಕೊಟ್ಟಿದೆ. ಈ ಚಿತ್ರ ತಮಿಳಿನ ಯಶಸ್ವಿ ಚಿತ್ರ 'ಇದರ್ ಕುಥನ್ ಆಸೈಪಟ್ಟಿ ಬಾಲಕುಮಾರ' (ಇದಕ್ಕಾಗಿ ಆಸೆಪಟ್ಟೆಯಾ ಬಾಲಕುಮಾರ) ರೀಮೇಕ್ ಎಂಬುದು ವಿಶೇಷ.

ಮೂಲ ಚಿತ್ರದಲ್ಲಿ ವಿಜಯ್ ಸೇತುಪತಿ ಪ್ರಮುಖ ಪಾತ್ರ ಪೋಷಿಸಿದ್ದರು. ಗೋಕುಲ ಆಕ್ಷನ್ ಕಟ್ ಹೇಳಿದ ಚಿತ್ರವಿದು. ಮೂಲ ಚಿತ್ರದಲ್ಲಿ ಅಲ್ಪಸ್ವಲ್ಪ ಬದಲಾವಣೆಗಳನ್ನು ಮಾಡಿಕೊಂಡು ದುನಿಯಾ ವಿಜಯ್ ಇಮೇಜಿಗೆ ತಕ್ಕಂತೆ ತೆರೆಗೆ ತರಲಾಗುತ್ತಿದೆ. [ವಿಜಿ 'ಅರ್ಥಪೂರ್ಣ'ಹುಟ್ಟುಹಬ್ಬ ಆಚರಣೆ]

ಕುಡಿತದಿಂದ ಏನಲ್ಲಾ ಅನಾಹುತಗಳಾಗುತ್ತವೆ ಎಂಬ ಸಂದೇಶ ಕ್ಲೈಮ್ಯಾಕ್ಸ್ ನಲ್ಲಿ ಬಳಸಿಕೊಂಡಿದ್ದೇವೆ. ಜಂಗ್ಲಿ ಹಾಗೂ ಜಾನಿ ಮೇರಾ ನಾಮ್ ಚಿತ್ರಗಳಂತೆ ಜಾಕ್ಸನ್ ಚಿತ್ರವೂ ಕಾಮಿಡಿ ಎಂಟರ್ ಟೈನರ್ ಎಂದಿದ್ದಾರೆ ದುನಿಯಾ ವಿಜಯ್.

ದುನಿಯಾ ವಿಜಯ್

ಪಾವನಿ ಚಿತ್ರದ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಒಟ್ಟು 45 ದಿನಗಳ ಕಾಲ ಚಿತ್ರೀಕರಣಕ್ಕೆ ಪ್ಲಾನ್ ಮಾಡಿಕೊಳ್ಳಲಾಗಿದೆ. ಮೂಲ ಚಿತ್ರದ 12 ನಿಮಿಷಗಳಷ್ಟು ಭಾಗವನ್ನು ಮೊಟಕುಗೊಳಿಸಿ ತೆರೆಗೆ ತರಲಾಗುತ್ತಿದೆ. ಚಿತ್ರದಲ್ಲಿ ಪಾವನಿ ಅವರದು ಪಕ್ಕದ ಮನೆ ಹುಡುಗಿ ಪಾತ್ರ. ನಾಯಕ ನಟನಿಂದ ಏನೆಲ್ಲಾ ಕಿರಿಕಿರಿ ಅನುಭವಿಸುತ್ತಾರೆ ಎಂಬುದು ತೆರೆಯ ಮೇಲೆ ಮೂಡಿಬರಲಿದೆ.

ಇವೆಂಟ್ ಮ್ಯಾನೇಜ್ ಮೆಂಟ್ ಕಂಪನಿ ನಡೆಸುತ್ತಿದ್ದ ಸುಂದರ್ ಗೌಡ ಅವರು ಈ ಚಿತ್ರದ ಮೂಲಕ ನಿರ್ಮಾಪಕರಾಗಿ ಬದಲಾಗುತ್ತಿದ್ದಾರೆ. ವೀರ್ ಸಮರ್ಥ್ ಅವರ ಸಂಗೀತ, ಕಿರಣ್ ಅವರ ಸಂಭಾಷಣೆ ಚಿತ್ರಕ್ಕಿದೆ. ಛಾಯಾಗ್ರಹಣ ಸೆಲ್ವಂ. (ಏಜೆನ್ಸೀಸ್)