ದ್ವಾರಕೀಶ್ ಬ್ಯಾನರ್ ನಲ್ಲಿ ಮೊದಲ ಬಾರಿಗೆ ಶಿವಣ್ಣ ಸಿನಿಮಾ!

ದ್ವಾರಕೀಶ್ ಸಂಸ್ಥೆಯ 52ನೇ ಸಿನಿಮಾ

'ಚೌಕ' ಸಿನಿಮಾ ದ್ವಾರಕೀಶ್ ಬ್ಯಾನರ್ ನಲ್ಲಿ ಬಂದ 50ನೇ ಸಿನಿಮಾವಾಗಿತ್ತು. 'ಅಮ್ಮ ಐ ಲವ್ ಯೂ' 51ನೇ ಚಿತ್ರವಾಗಿತ್ತು. ಈಗ ಈ ಎರಡು ಹಿಟ್ ಸಿನಿಮಾಗಳ ಬಳಿಕ 52ನೇ ಸಿನಿಮಾ ಶುರುವಾಗುತ್ತಿದೆ. ಈ ಚಿತ್ರದ ಮೂಲಕ ಮೊದಲ ಬಾರಿಗೆ ದ್ವಾರಕೀಶ್ ಬ್ಯಾನರ್ ನಲ್ಲಿ ಶಿವಣ್ಣ ನಟಿಸುತ್ತಿದ್ದಾರೆ.

ಪಿ.ವಾಸು ನಿರ್ದೇಶನ

ದ್ವಾರಕೀಶ್ ಹಾಗೂ ಶಿವರಾಜ್ ಕುಮಾರ್ ಜೋಡಿಯ ಈ ಸಿನಿಮಾವನ್ನು ಪಿ.ವಾಸು ನಿರ್ದೇಶನ ಮಾಡುತ್ತಾರೆ. ಈ ಹಿಂದೆ ಶಿವರಾಜ್ ಕುಮಾರ್ ಅವರಿಗೆ 'ಶಿವಲಿಂಗ' ಸಿನಿಮಾ ಮಾಡಿದ್ದ ಪಿ.ವಾಸು ಆ ಹಿಟ್ ಚಿತ್ರದ ನಂತರ ಮತ್ತೆ ಶಿವಣ್ಣನಿಗೆ ಆಕ್ಷನ್ ಕಟ್ ಹೇಳುತ್ತಿದ್ದಾರೆ.

ಮತ್ತೆ ಒಂದಾದ 'ಆಪ್ತಮಿತ್ರ' ಜೋಡಿ

ಈ ಹಿಂದೆ ಪಿ.ವಾಸು ನಿರ್ದೇಶನ ಮಾಡಿದ್ದ 'ಆಪ್ತಮಿತ್ರ' ಸಿನಿಮಾವನ್ನು ದ್ವಾರಕೀಶ್ ಚಿತ್ರ ಸಂಸ್ಥೆ ನಿರ್ಮಾಣ ಮಾಡಿತ್ತು. ಆ ಸಿನಿಮಾ ಕನ್ನಡ ಚಿತ್ರರಂಗದಲ್ಲಿಯೇ ದೊಡ್ಡ ಹಿಟ್ ಸಿನಿಮಾವಾಗಿತ್ತು. ಈ ಚಿತ್ರದ ಬಳಿಕ ಈಗ ಮತ್ತೆ ದ್ವಾರಕೀಶ್ ಬ್ಯಾನರ್ ನಲ್ಲಿ ಪಿ.ವಾಸು ಸಿನಿಮಾ ಮಾಡುತ್ತಿದ್ದಾರೆ.

ಹೆಚ್ಚಿನ ಮಾಹಿತಿ ಇಲ್ಲ

ಸದ್ಯಕ್ಕೆ ದ್ವಾರಕೀಶ್ ಬ್ಯಾನರ್ ನಲ್ಲಿ ಶಿವಣ್ಣ ನಟಿಸುತ್ತಿರುವ ಸುದ್ದಿ ಬಹಿರಂಗ ಆಗಿದೆ. ಅದು ಬಿಟ್ಟರೆ ಆ ಸಿನಿಮಾದ ಹೆಸರು, ಕಲಾವಿದರ ಪಟ್ಟಿ ಸೇರಿದಂತೆ ಹೆಚ್ಚಿನ ವಿವರಗಳು ಹೊರ ಬಂದಿಲ್ಲ.

ಶಿವಣ್ಣನ ಸಿನಿಮಾಗಳು

ಸದ್ಯ ಶಿವರಾಜ್ ಕುಮಾರ್ ಸಾಲು ಸಾಲು ಸಿನಿಮಾ ಮಾಡುತ್ತಿದ್ದಾರೆ. 'ದಿ ವಿಲನ್', 'ಕವಚ', 'ರುಸ್ತುಂ', 'ಎಸ್.ಆರ್.ಕೆ', 'ದ್ರೋಣ' ಶಿವಣ್ಣನ ಮುಂದಿನ ಸಿನಿಮಾಗಳಾಗಿವೆ.