2022ರಲ್ಲಿ ಬಿಡುಗಡೆಯಾದ ಈ 4 ಚಿತ್ರಗಳು ನನ್ನ ಫೇವರಿಟ್ ಎಂದ ರಿಷಬ್ ಶೆಟ್ಟಿ

ಗಂಧದ ಗುಡಿ ಮೊದಲ ಫೇವರಿಟ್

ಸಂದರ್ಶಕರು ಈ ವರ್ಷ ಬಿಡುಗಡೆಯಾದ ಚಿತ್ರಗಳಲ್ಲಿ ಕಾಂತಾರ ಹೊರತುಪಡಿಸಿ ನಿಮಗೆ ಯಾವ ಚಿತ್ರಗಳು ಇಷ್ಟವಾದವು ಎಂದು ಪ್ರಶ್ನೆ ಕೇಳಿದಾಗ ಉತ್ತರಿಸಿದ ರಿಷಬ್ ಶೆಟ್ಟಿ ಮೊದಲಿಗೆ ಪುನೀತ್ ರಾಜ್‌ಕುಮಾರ್ ಅವರ ಕನಸಿನ ಕೂಸು ಗಂಧದ ಗುಡಿ ಹೆಸರನ್ನು ಉಲ್ಲೇಖಿಸಿದರು. ಈ ಚಿತ್ರ ಪುನೀತ್ ರಾಜ್‌ಕುಮಾರ್ ಅವರ ಕೊನೆಯ ಚಿತ್ರವಾಗಿತ್ತು ಹಾಗೂ ವಿಶೇಷವಾಗಿ ತನಗೆ ಕನೆಕ್ಟ್ ಆಯಿತು ಎಂದು ರಿಷಬ್ ಶೆಟ್ಟಿ ತಿಳಿಸಿದರು.

ಉಳಿದ ಮೂರು ಚಿತ್ರಗಳು ಯಾವುವು?

ಇನ್ನೂ ಮುಂದುವರಿದು ಮಾತನಾಡಿದ ರಿಷಬ್ ಶೆಟ್ಟಿ ಇತ್ತೀಚೆಗಷ್ಟೆ ತಮಿಳಿನಲ್ಲಿ ಬಂದ ಲವ್ ಟುಡೇ ಚಿತ್ರ ತನಗೆ ಭಾರೀ ಇಷ್ಟವಾಯಿತು ಎಂದು ತಿಳಿಸಿದರು. ಇನ್ನು ರಕ್ಷಿತ್ ಶೆಟ್ಟಿ ಅಭಿನಯದ 777 ಚಾರ್ಲಿ ಚಿತ್ರ ಕೂಡ ತನಗೆ ಇಷ್ಟವಾಯಿತು ಎಂದ ರಿಷಬ್ ಶೆಟ್ಟಿ, ಗೆಳೆಯನ ಚಿತ್ರವಾದ ಕಾರಣ ಈ ಚಿತ್ರದ ಹೆಸರನ್ನು ಹೇಳುತ್ತಾನೆ ಎಂದು ಕೆಲವರು ಕಾಲೆಳೆಯುತ್ತಾರೆ ಎಂದು ನಕ್ಕರು. ಇನ್ನು ಅಂತಿಮವಾಗಿ ಕೆಜಿಎಫ್ ಚಾಪ್ಟರ್ 2 ಹೆಸರನ್ನು ತೆಗೆದುಕೊಂಡ ರಿಷಬ್ ಶೆಟ್ಟಿ ಈ ವರ್ಷ ಕನ್ನಡ ಚಿತ್ರರಂಗದ ಗೆಲುವು ಶುರುವಾಗಿದ್ದು ಅಲ್ಲಿಂದಲೇ ಎಂದರು.

ಕಾಂತಾರ 2ನಲ್ಲಿ ರಿಷಬ್ ಬ್ಯುಸಿ

ಹೀಗೆ ದೇಶವ್ಯಾಪಿ ಕಾಂತಾರ ಚಿತ್ರದ ಮೂಲಕ ಪ್ರಸಿದ್ಧಿಯನ್ನು ಪಡೆದ ರಿಷಬ್ ಶೆಟ್ಟಿ ಸದ್ಯ ಉಳಿದ ಚಿತ್ರಗಳನ್ನು ಕೈಬಿಟ್ಟು ಕಾಂತಾರದ ಸೀಕ್ವೆಲ್‌ನಲ್ಲಿ ಬ್ಯುಸಿಯಾಗಿದ್ದಾರೆ. ಈಗಾಗಲೇ ಕಾಂತಾರ 2 ಚಿತ್ರ ಮಾಡುವ ಸಲುವಾಗಿ ಪಂಜುರ್ಲಿ ದೈವದ ಅನುಮತಿ ಕೇಳಿರುವ ರಿಷಬ್ ಶೆಟ್ಟಿಗೆ ಕೆಲ ‍ಷರತ್ತುಗಳ ಮೇರೆಗೆ ದೈವ ಒಪ್ಪಿಗೆ ನೀಡಿದೆ ಎಂಬ ಸುದ್ದಿ ಕೂಡ ಹೊರಬಿದ್ದಿದೆ.