'ಗಂಡುಗಲಿ ಮದಕರಿ ನಾಯಕ' ದರ್ಶನ್ ಗಿಂತ ಈ ಇಬ್ಬರಿಗೆ ಬಹಳ ಮುಖ್ಯ!

ರಾಜೇಂದ್ರ ಸಿಂಗ್ ಬಾಬು ಹಿಟ್ ನೀಡಿ ದಶಕಗಳು ಕಳೆದಿವೆ

ಸ್ಯಾಂಡಲ್ ವುಡ್ ಕಂಡ ಪ್ರತಿಭಾವಂತ ನಿರ್ದೇಶಕರಲ್ಲಿ ರಾಜೇಂದ್ರ ಸಿಂಗ್ ಬಾಬು ಪ್ರಮುಖರು. 'ಮುತ್ತಿನ ಹಾರ', 'ಬಂಧನ', 'ಅಂತ', 'ಯುಗ ಪುರುಷ' ಹೀಗೆ ಸಾಕಷ್ಟು ಮರೆಯಲಾಗದ ಸಿನಿಮಾದ ಸೃಷ್ಟಿಕರ್ತ ಅವರು. ಆದರೆ, ರಾಜೇಂದ್ರ ಸಿಂಗ್ ಬಾಬು ಒಂದು ಹಿಟ್ ಸಿನಿಮಾ ನೀಡಿ ಹತ್ತು ವರ್ಷಕ್ಕೂ ಮೇಲೆ ಆಗಿದೆ. 'ಕುರಿಗಳು ಸಾರ್ ಕುರಿಗಳು', 'ಕೋತಿಗಳು ಸಾರ್ ಕೋತಿಗಳು' ನಂತರ ರಾಜೇಂದ್ರ ಸಿಂಗ್ ಬಾಬು ಗೆಲುವಿನ ಮುಖ ನೋಡಿಲ್ಲ.

'ರಾಜಾ ಹುಲಿ' ನಂತರ ಹಂಸಲೇಖ ಗೆದ್ದಿಲ್ಲ

ನಾದ ಬ್ರಹ್ಮ ಹಂಸಲೇಖ ಸಂಗೀತದ ಗಣಿ. ಸಾಹಿತ್ಯದ ಧಣಿ. ಕನ್ನಡ ಚಿತ್ರರಂಗಕ್ಕೆ ಅವರ ಹಾಡುಗಳ ಕೊಡುಗೆ ಅಪಾರ. ಆದರೆ, ಇತ್ತೀಚಿಗೆ ಹಂಸಲೇಖ ಸಂಗೀತದ ನಾದ ಕೊಂಚ ಕಡಿಮೆ ಆಗಿದೆ. ಯಶ್ ನಟನೆಯ 'ರಾಜಾಹುಲಿ' ನಂತರ ಹಂಸಲೇಖ ಅವರ ಯಾವ ಸಿನಿಮಾದ ಹಾಡುಗಳು ಹಿಟ್ ಆಗಿಲ್ಲ. ಆ ನಂತರ ಹೆಚ್ಚು ಸಿನಿಮಾಗಳನ್ನು ಅವರು ಮಾಡಲು ಹೋಗಿಲ್ಲ.

ದಿಗ್ಗಜ ಕಮ್ ಬ್ಯಾಕ್ ಗೆ ವೇದಿಕೆ ಸಿದ್ಧ

ಹೀಗಾಗಿ, ರಾಜೇಂದ್ರ ಸಿಂಗ್ ಬಾಬು ಹಾಗೂ ಹಂಸಲೇಖ ಇಬ್ಬರಿಗೂ ಈಗೊಂದು ಗೆಲವು ಬೇಕು. ಇಬ್ಬರ ಸಿನಿ ಜೀವನಕ್ಕೆ ಈ ಸಿನಿಮಾ ಬಹಳ ಮುಖ್ಯ. ತಮ್ಮನ್ನು ತಾವು ಮತ್ತೆ ಈ ಸಿನಿಮಾದ ಮೂಲಕ ಸಾಬೀತು ಮಾಡಿಕೊಳ್ಳಬೇಕಾಗಿದೆ. ತಮ್ಮ ಅನುಭವದ ಮೂಲಕ ಇಂದಿನ ಪ್ರೇಕ್ಷಕರನ್ನು ಸೆಳೆಯಬೇಕಾಗಿದೆ. 'ಗಂಡುಗಲಿ ಮದಕರಿ ನಾಯಕ' ಇಬ್ಬರ ಕಮ್ ಬ್ಯಾಕ್ ಗೆ ವೇದಿಕೆಯಾಗಿದೆ.

ಹಿಟ್ ಜೋಡಿಗೆ ಮೆಗಾ ಸಿನಿಮಾ

ರಾಜೇಂದ್ರ ಸಿಂಗ್ ಬಾಬು ಹಾಗೂ ಹಂಸಲೇಖ ಒಟ್ಟಿಗೆ ಸೇರಿದರೆ ಆ ಸಿನಿಮಾದ ಹಾಡುಗಳು ಸೋತಾ ಮಾತೇ ಇಲ್ಲ. 'ಯುಗ ಪುರುಷ', 'ಬಣ್ಣದ ಗೆಜ್ಜೆ', 'ಮುತ್ತಿನ ಹಾರ' ಹಾಡುಗಳು ಸೂಪರ್ ಡೂಪರ್ ಹಿಟ್ ಆಗಿವೆ. ಈ ಇಬ್ಬರು ಕಲಾಕಾರ್ ಗಳನ್ನು ನಿರ್ಮಾಪಕ ರಾಕ್ ಲೈನ್ ವೆಂಕಟೇಶ್ ಮತ್ತೆ ಒಂದು ಮಾಡಿದ್ದಾರೆ. 'ಗಂಡುಗಲಿ ಮದಕರಿ ನಾಯಕ' ಸಿನಿಮಾ ಮತ್ತು ಹಾಡುಗಳ ಮೇಲೆ ದೊಡ್ಡ ನಿರೀಕ್ಷೆ ಇದೆ. ಚಿತ್ರದ ಮುಹೂರ್ತ ಡಿಸೆಂಬರ್ 2 ರಂದು ಆಗಲಿದೆ.