ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ 'ಸ್ಟೈಲ್ ಕಿಂಗ್' ಸಿನಿಮಾ ಇಂದು ಕರ್ನಾಟಕ ರಾಜ್ಯಾದ್ಯಂತ ಬಿಡುಗಡೆ ಆಗಿದೆ. ಭರ್ಜರಿ ಓಪನ್ನಿಂಗ್ ಕೂಡ ಲಭಿಸಿದೆ.
ಇಂದು 'ಸ್ಟೈಲ್ ಕಿಂಗ್' ಸಿನಿಮಾ ನೋಡಿದ ಎಲ್ಲಾ ಪ್ರೇಕ್ಷಕರಿಗೆ ಸದ್ಯ ಕಾಡುತ್ತಿರುವ ಏಕೈಕ ಪ್ರಶ್ನೆ 'ಸ್ಟೈಲ್ ಕಿಂಗ್ - 2' ಬರುತ್ತಾ? ಅಂತ.! ಯಾಕಂದ್ರೆ, 'ಸ್ಟೈಲ್ ಕಿಂಗ್' ಚಿತ್ರದ ಕ್ಲೈಮ್ಯಾಕ್ಸ್ ನಲ್ಲಿ ನಿರ್ದೇಶಕ ಪಿ.ಸಿ.ಶೇಖರ್ ನೀಡಿರುವ ಟ್ವಿಸ್ಟ್ ಅಂಥದ್ದು.! [ಚಿತ್ರ ವಿಮರ್ಶೆ; ಹೊಸ 'ಸ್ಟೈಲ್'ನಲ್ಲಿ 'ಕಿಂಗ್' ಆದ ಗಣೇಶ್.!]
ಕಳ್ಳ ಕಾಶಿ (ಗಣೇಶ್) ಮಟ್ಟ ಹಾಕುವ ಕಾರ್ತಿಕ್ (ಗಣೇಶ್), ತನ್ನೆಲ್ಲಾ ಸಮಸ್ಯೆಗಳನ್ನ ಬಗೆಹರಿಸಿಕೊಂಡು ಚಿತ್ರಕ್ಕೆ ಶುಭ ಹಾಡುತ್ತಾನೆ ಅಂತ ಪ್ರೇಕ್ಷಕರು ಭಾವಿಸುವ ಹೊತ್ತಿಗೆ, ಕಾಶಿ ಬದುಕಿದ್ದಾನೆ ಅಂತ ಕಾರ್ತಿಕ್ ಗೆ ಗೊತ್ತಾಗುತ್ತೆ.
ಇಬ್ಬರು ಮತ್ತೆ ಸವಾಲು-ಪ್ರತಿ ಸವಾಲು ಹಾಕುತ್ತಾರೆ. ಅಲ್ಲಿಗೆ, ಇಬ್ಬರ ಜುಗಲ್ಬಂದಿ 'ಸ್ಟೈಲ್ ಕಿಂಗ್ - 2' ಚಿತ್ರವಾಗಬಹುದು ಎಂದು ಪ್ರೇಕ್ಷಕರು ಮಾತನಾಡಿಕೊಳ್ಳುತ್ತಿದ್ದಾರೆ.
'ಸ್ಟೈಲ್ ಕಿಂಗ್-2' ಬರುವ ಬಗ್ಗೆ ಚಿತ್ರತಂಡದ ಬಳಿ ಸದ್ಯ ಉತ್ತರ ಇಲ್ಲ. ಅಂದ್ಹಾಗೆ, 'ಸ್ಟೈಲ್ ಕಿಂಗ್' ಚಿತ್ರದಲ್ಲಿ ಗಣೇಶ್ ದ್ವಿಪಾತ್ರದಲ್ಲಿ ಮಿಂಚಿದ್ದಾರೆ. ಗಣೇಶ್ ಜೊತೆ ರಮ್ಯಾ ನಂಬೀಸನ್ ಡ್ಯುಯೆಟ್ ಹಾಡಿದ್ದಾರೆ. ನಿಮ್ಮನ್ನೆಲ್ಲಾ ನಕ್ಕು-ನಲಿಸಲು ಸಾಧು ಕೋಕಿಲ, ರಂಗಾಯಣ ರಘು ಇದ್ದಾರೆ. ಪಿ.ಸಿ.ಶೇಖರ್ ನಿರ್ದೇಶನ ಮಾಡಿದ್ದಾರೆ.
