ಮುಂಬೈನಲ್ಲೊಬ್ಬ ರಿಯಲ್ 'ಜಂಟಲ್ ಮ್ಯಾನ್': ದಿನಕ್ಕೆ 20 ಗಂಟೆ ನಿದ್ದೆ!

20 ಗಂಟೆ ನಿದ್ರಿಸುತ್ತಿದ್ದ ರಾಜೀವ್ ಭಾಸಿನ್

'ಜಂಟಲ್ ಮ್ಯಾನ್‌' ಚಿತ್ರದಲ್ಲಿ ಪ್ರಜ್ವಲ್ ದೇವರಾಜ್ 18 ಗಂಟೆಗಳ ಕಾಲ ನಿದ್ರಿಸಿದರೆ, ಮುಂಬೈ ಮೂಲದ ರಾಜೀವ್ ಭಾಸಿನ್ ಎಂಬ ವ್ಯಕ್ತಿ ದಿನಕ್ಕೆ 20 ಗಂಟೆ ನಿದ್ದೆ ಮಾಡುತ್ತಿದ್ದರಂತೆ. 43 ವರ್ಷದ ರಾಜೀವ್ ಭಾಸಿನ್ ಅವರು 10 ವರ್ಷಗಳಿಂದ "ಹೈಪರ್ಸೋಮ್ನಿಯಾ" ಖಾಯಿಲೆಯಿಂದ ಬಳಲುತ್ತಿದ್ದಾರೆ. ಮೊದಲ ಬಾರಿ 16ನೇ ವಯಸ್ಸಿನಲ್ಲಿ ಆ ಸಮಸ್ಯೆ ಅವರಿಗೆ ಕಾಡಿತ್ತು.‌ ನಂತರ ಅವರ 33 ನೇ ವಯಸ್ಸಿಗೆ ಮತ್ತೆ ಕಾಡತೊಡಗಿತು.

'ಜಂಟಲ್ ಮ್ಯಾನ್' ಸಿನಿಮಾ ಕುರಿತು ತಿಳಿದುಕೊಂಡೆ

"ಕನ್ನಡ ಚಲನಚಿತ್ರ 'ಜಂಟಲ್ ಮ್ಯಾನ್' ಬಗ್ಗೆ ನಾನು ಸೋಶಿಯಲ್ ಮೀಡಿಯಾದ ಮೂಲಕ ತಿಳಿದುಕೊಂಡೆ. ಸ್ಲೀಪಿಂಗ್ ಡಿಸಾರ್ಡರ್ (ನಿದ್ದೆ ಖಾಯಿಲೆ) ಸುತ್ತಲೂ ಚಲನಚಿತ್ರವೊಂದನ್ನು ನಿರ್ಮಿಸಲಾಗಿರುರುವುದಕ್ಕೆ ನನಗೆ ತುಂಬಾ ಸಂತೋಷವಾಗಿದೆ. ಇಂತಹ ಕಾಯಿಲೆಗಳಿಂದ ಬಳಲುತ್ತಿರುವ ಬಹಳಷ್ಟು ಜನರಿದ್ದಾರೆ. ಅವರ ದುಃಖಕರ ಸಂಗತಿ ಎಂದರೆ ಇಂತಹ ಕಾಯಿಲೆ ಹೊಂದಿರುವವರಲ್ಲಿ ಹೆಚ್ಚಿನವರಿಗೆ ಆ ಕಾಯಿಲೆ ಬಗ್ಗೆಯೇ ಸರಿಯಾದ ತಿಳುವಳಿಕೆ ಇಲ್ಲ. ಹೀಗಾಗಿ ಅವರು ವೈದ್ಯಕೀಯ ಚಿಕಿತ್ಸೆ ಪಡೆಯುವುದಿಲ್ಲ. ಜಂಟಲ್ ಮ್ಯಾನ್ ಚಿತ್ರ ಈ ಬಗ್ಗೆ ಜಾಗೃತಿ ಮೂಡಿಸುವಲ್ಲಿ ಸಹಕಾರಿ ಆಗುತ್ತೆಂದು ನನ್ನ ನಂಬಿಕೆ," ಎಂದು ರಾಜೀವ್ ಭಾಸಿನ್ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.

ಕಾಯಿಲೆ ಕುರಿತು ರಾಜೀವ್ ಹೇಳಿದ್ದೇನು?

"ಪ್ರತಿಬಾರಿಯೂ ಕಾಯಿಲೆ ಮರುಕಳಿಸಿದಾಗ 4 to 10 ವಾರಗಳವರೆಗೆ ಇರುತ್ತದೆ. ಸದ್ಯಕ್ಕೆ 16 ವಾರಗಳವರೆಗೆ ನನ್ನನು ಕಾಡುತ್ತಿದೆ. ಒಮ್ಮೊಮ್ಮೆ ಸುಮಾರು 15-16 ಗಂಟೆ ಮಲಗುತ್ತೇನೆ. ಹಿಂದೆ ಸುಮಾರು 20 ಗಂಟೆಗಳ ಕಾಲ ಮಲಗಿದ್ದೆ "ಎಂದು ರಾಜೀವ್ ಹಂಚಿಕೊಂಡಿದ್ದಾರೆ.

ನಿರ್ದೇಶಕರಿಗೆ ಫೋನ್ ಮಾಡಿದ ರಾಜೀವ್

ರಾಜೀವ್ ಭಾಸಿನ್ ಅವರು ಮುಂಬೈನಿಂದ ದೂರವಾಣಿ ಮೂಲಕ ಗುರುದೇಶಪಾಂಡೆ ಅವರನ್ನು ಸಂಪರ್ಕಿಸಿದ್ದಾರೆ. ಈ ಚಿತ್ರದ ಬಗ್ಗೆ ಮೆಚ್ಚುಗೆಯ ಮಾತಾಡಿದ್ದಾರೆ. ತಮ್ಮ ಅನುಭವಗಳನ್ನು ಸಹ ಹಂಚಿಕೊಂಡರು. ರಾಜೀವ್ ಅವರು ಜಂಟಲ್ ಮ್ಯಾನ್ ಅನ್ನು ವೀಕ್ಷಿಸುವುದಾಗಿ ಹೇಳಿದ್ದಾರೆ ಎಂದು ಗುರು ದೇಶಪಾಂಡೆ ತಿಳಿಸಿದ್ದಾರೆ.