ಈ ಇಬ್ಬರು ನಟರೆಂದರೆ ನನಗಿಷ್ಟ, 'ಗಂಧದಗುಡಿ'ಯಿಂದಾಗಿ ನಟಿಯಾಗುವ ಅವಕಾಶ ಸಿಕ್ಕಿತು ಎಂದ ಅಮೃತಾ ಪ್ರೇಮ್

ಯಶ್ ನನ್ನ ಫೇವರಿಟ್

ಟಗರು ಪಲ್ಯ ಚಿತ್ರದ ಲಾಂಚ್ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅಮೃತಾ ಪ್ರೇಮ್ "ಎಲ್ಲಾ ನಟ ಹಾಗೂ ನಟಿಯರೆಂದರೂ ನನಗಿಷ್ಟ, ಅವರ ಚಿತ್ರಗಳಲ್ಲಿ ಅವರು ನೆಕ್ಸ್ಟ್ ಲೆವೆಲ್ ಇದ್ದಾರೆ. ನನಗೆ ತುಂಬಾ ಇಷ್ಟ ಎನ್ನುವುದಾದರೆ ಯಶ್ ಸರ್" ಎಂದು ಹೇಳಿಕೆ ನೀಡಿದರು. ಸದ್ಯ ಅಮೃತಾ ಪ್ರೇಮ್ ನೀಡಿದ ಈ ಹೇಳಿಕೆ ವಿಡಿಯೊವನ್ನು ಯಶ್ ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳುತ್ತಿದ್ದು, ನಮ್ಮ ನೆಚ್ಚಿನ ನಟನ ಅಭಿಮಾನಿಯ ಚಿತ್ರ ಗೆಲ್ಲಲಿ ಎಂದು ಟಗರು ಪಲ್ಯಗೆ ವಿಶ್ ಮಾಡುತ್ತಿದ್ದಾರೆ.

ಚಿಕ್ಕ ವಯಸ್ಸಿನಿಂದಲೂ ಅಪ್ಪು ಅಭಿಮಾನಿ, ಸಿನಿಮಾ ಅವಕಾಶ ಸಿಗಲು ಗಂಧದ ಗುಡಿ ಕಾರಣ!

ಇನ್ನೂ ಮುಂದುವರಿದು ಮಾತನಾಡಿದ ಅಮೃತಾ ಪ್ರೇಮ್ ತಾನು ಚಿಕ್ಕ ವಯಸ್ಸಿನಿಂದಲೂ ಸಹ ಪುನೀತ್ ರಾಜ್‌ಕುಮಾರ್ ಸರ್ ಅಭಿಮಾನಿ ಎಂದು ಹೇಳಿಕೊಂಡರು. ಅಷ್ಟೇ ಅಲ್ಲದೇ ಅಪ್ಪು ಅಭಿನಯದ ಕೊನೆಯ ಚಿತ್ರ ಗಂಧದ ಗುಡಿ ತನಗೆ ಟಗರು ಪಲ್ಯ ಚಿತ್ರದಲ್ಲಿ ಅವಕಾಶ ಲಭಿಸಲು ಕಾರಣ ಎಂದು ಹೇಳಿದರು. ಹೌದು, ಗಂಧದ ಗುಡಿ ಚಿತ್ರದ ಪ್ರೀಮಿಯರ್ ಶೋ ವೀಕ್ಷಿಸಲು ತೆರಳಿದ್ದ ಅಮೃತಾ ಪ್ರೇಮ್ ಅವರನ್ನು ನೋಡಿದ್ದ ನಿರ್ದೇಶಕ ಉಮೇಶ್ ಕೆ ಕೃಪ ಈಕೆಯನ್ನು ತನ್ನ ಟಗರು ಪಲ್ಯ ಚಿತ್ರದಲ್ಲಿ ನಾಯಕಿಯನ್ನಾಗಿ ಮಾಡಬೇಕೆಂದು ಧನಂಜಯ್ ಅವರ ಬಳಿ ಚರ್ಚಿಸಿದರಂತೆ. ಹೀಗಾಗಿ ತಾನು ಚಿತ್ರರಂಗ ಪ್ರವೇಶಿಸಲು ಪುನೀತ್ ರಾಜ್‌ಕುಮಾರ್ ಅವರ ಆಶೀರ್ವಾದವೇ ಕಾರಣ ಎನ್ನುತ್ತಾರೆ ಅಮೃತಾ ಪ್ರೇಮ್. ಇನ್ನು ಅಮೃತಾ ಹೇಳಿದಂತೆ ಆಕೆ ಅಪ್ಪು ಹಾಗೂ ಯಶ್ ಚಿತ್ರಗಳ ಪೋಸ್ಟರ್‌ಗಳನ್ನು ತಾನು ಸಂಗ್ರಹಿಸಿದ್ದನ್ನು ತನ್ನ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದರು.

ಪ್ರೇಮ್ ಮನೆಯ ಮೂವರು ಚಿತ್ರರಂಗಕ್ಕೆ

ಇನ್ನು ಅಮೃತಾ ಪ್ರೇಮ್ ಮೂಲಕ ನೆನಪಿರಲಿ ಪ್ರೇಮ್ ಮನೆಯಿಂದ ಮೂರನೇ ಸದಸ್ಯರ ಆಗಮನ ಚಿತ್ರರಂಗಕ್ಕೆ ಆಗಿದೆ. ಮೊದಲಿಗೆ ನೆನಪಿರಲಿ ಪ್ರೇಮ್, ನಂತರ 'ಗುರು ಶಿಷ್ಯರು' ಮೂಲಕ ಪ್ರೇಮ್ ಪುತ್ರ ಏಕಾಂತ್ ಪ್ರೇಮ್ ಹಾಗೂ ಇದೀಗ 'ಟಗರು ಪಲ್ಯ' ಮೂಲಕ ಅಮೃತಾ ಪ್ರೇಮ್ ಚಿತ್ರರಂಗಕ್ಕೆ ಬಂದಿದ್ದಾರೆ.