'ನನ್ನ ಹೊಡೆಯೋಕೆ 5 ಅಡಿಯ ಎಷ್ಟು ಹೀರೊಗಳು ಕಾಯ್ಕೊಂಡಿಲ್ಲ?'; ಬೇರೆ ಭಾಷೆಗಳಲ್ಲಿ ನಟಿಸೋರಿಗೆ ದಚ್ಚು ಗುನ್ನಾ!

ಬೇರೆ ಭಾಷೆಗೆ ನಾನೇಕೆ ಹೋಗಲಿ?

ಸಿನಿಬಜ್ ಎಂಬ ಕನ್ನಡದ ಯುಟ್ಯೂಬ್ ಚಾನೆಲನ್ ನಡೆಸಿದ ಕ್ರಾಂತಿ ಚಿತ್ರದ ಸಂದರ್ಶನದಲ್ಲಿ ಮಾತನಾಡಿದ ನಟ ದರ್ಶನ್ ತೆಲುಗು ಚಿತ್ರರಂಗದಲ್ಲಿ ಹಬ್ಬದ ಸಂದರ್ಭಗಳಲ್ಲಿ ತೆಲುಗು ಭಾಷೆಯ ಚಿತ್ರಗಳಿಗೆ ಮನ್ನಣೆ ನೀಡಬೇಕು, ಬೇರೆ ಭಾಷೆಯ ಚಿತ್ರಗಳಿಗೆ ಹೆಚ್ಚಿನ ಪ್ರಾಧಾನ್ಯತೆ ನೀಡಬಾರದು ಎಂದು ತೆಗೆದುಕೊಳ್ಳಲಾಗಿರುವ ನಿರ್ಧಾರದ ಬಗ್ಗೆ ಮಾತನಾಡಿದರು. ಅವರಿಗೆ ಇವಾಗ ತಳ ಸುಟ್ಟಿದೆ, ನಮಗೆ ಈ ಹಿಂದೆನೇ ಸುಟ್ಟಿತ್ತು ಹೀಗಾಗಿಯೇ ಈ ಹಿಂದೆಯೇ ನಮ್ಮ ರಾಜ್ಯದಲ್ಲಿ ಕನ್ನಡ ಚಿತ್ರಗಳಿಗೆ ಪ್ರಾಧಾನ್ಯತೆ ನೀಡಿ ನಮ್ಮ ನೆಲದಲ್ಲಿ ನಾವೇ ಕಿಂಗ್ ಎಂಬ ಹೇಳಿಕೆಯನ್ನು ತಾವು ನೀಡಿದ್ದಾಗಿ ದರ್ಶನ್ ಹೇಳಿದರು. ಅಷ್ಟೇ ಅಲ್ಲದೇ ನಮ್ಮ ರಾಜ್ಯದ ಜನರೇ ತನ್ನನ್ನು ರಾಜನಂತೆ ನೋಡಿಕೊಂಡಿರುವಾಗ, ಫುಟ್‌ಪಾತ್ ಮೇಲಿದ್ದ ತನ್ನನ್ನು ಮಾಲ್‌ಗಳಿಗೆ ತಂದು ಕೂರಿಸಿರುವಾಗ ನಾನೇಕೆ ಬೇರೆ ಭಾಷೆಗಳಿಗೆ ಹೋಗಿ ನಟಿಸಬೇಕು ಎಂದು ದರ್ಶನ್ ಹೇಳಿದ್ದಾರೆ.

ನನ್ನ ಹೊಡೆಯೋಕೆ 5 ಅಡಿಯ ಎಷ್ಟು ಹೀರೊಗಳು ಕಾಯ್ಕೊಂಡಿಲ್ಲ

ಇನ್ನೂ ಮುಂದುವರಿದು ಮಾತನಾಡಿದ ದರ್ಶನ್ ಕ್ರಾಂತಿ ನಿರ್ಮಾಪಕಿ ಶೈಲಜಾ ನಾಗ್ ಜತೆ ನಡೆದ ಮಾತುಕತೆ ಬಗ್ಗೆ ಕೂಡ ಹಂಚಿಕೊಂಡರು. "ಇವತ್ತು ನಾನು ಖಳನಟನಾಗಿ ಕೆಲಸ ಮಾಡ್ತೀನಿ ಎಂದರೆ 6 ಅಡಿ 3 ಇಂಚು ಇರೋ ನನ್ನ ಹೊಡೆಯೋಕೆ 5 ಅಡಿ ಇರುವ ಎಷ್ಟು ಜನ ಹೀರೊಗಳು ಕಾಯ್ಕೊಂಡಿಲ್ಲ. ಇವತ್ತು ನಟನಾಗಿ ತೆಗೆದುಕೊಳ್ಳುತ್ತಿರುವ ಸಂಭಾವನೆಗಿಂತ ಮೂರು ಪಟ್ಟು ಹೆಚ್ಚು ಸಂಭಾವನೆ ತೆಗೆದುಕೊಳ್ಳಬಹುದು. ಆದರೆ ಬೇಡ ನಮ್ಮ ಜನ ಹೀರೊ ಅಂತ ತಲೆ ಮೇಲೆ ಇಟ್ಟುಕೊಂಡಿದ್ದಾರೆ, ಹೆಗಲ ಮೇಲೆ ಕೂರಿಸಿಕೊಂಡಿದ್ದಾರೆ, ನನಗೆ ಆ ಬುದ್ಧಿ ಇಲ್ಲ" ಎಂದು ಶೈಲಜಾ ನಾಗ್ ಮೇಡಂ ಹೇಳುತ್ತಿದ್ದರು ಎಂದು ದರ್ಶನ್ ಹಂಚಿಕೊಂಡರು.

ಡಬಿಂಗ್ ಸಾಕು

ಇದೇ ವೇಳೆ ಬೇರೆ ಭಾಷೆಯಲ್ಲೂ ನಿಮಗೆ ಅಭಿಮಾನಿಗಳಿದ್ದಾರೆ, ನೀವೇಕೆ ಬೇರೆ ಭಾಷೆಗಳಲ್ಲೂ ನಟಿಸಿ ಮತ್ತಷ್ಟು ರೀಚ್ ಪಡೆಯಬಾರದು ಎಂಬ ಪ್ರಶ್ನೆಗೆ ಉತ್ತರಿಸಿದ ನಟ ದರ್ಶನ್ ಬೇರೆ ಭಾಷೆಗಳಿಗೆ ಡಬಿಂಗ್ ಮಾಡ್ತಾ ಇದ್ದೀವಲ್ಲ, ಅಷ್ಟೇ ಸಾಕು ಎಂದು ಉತ್ತರವನ್ನು ನೀಡುವ ಮೂಲಕ ಟಕ್ಕರ್ ನೀಡಿದರು ಹಾಗೂ ಪರಭಾಷೆಗಳಲ್ಲಿ ನಟಿಸುವುದರ ಬಗ್ಗೆ ಹಾಗೂ ನಟಿಸುವವರಿಗೆ ಪರೋಕ್ಷವಾಗಿ ನಟ ದರ್ಶನ್ ಗುನ್ನಾ ಇಟ್ಟಿದ್ದಾರೆ.