ಕೆಲಸ ಮಾಡ್ತಿದ್ದ ಕಂಪೆನಿಯಲ್ಲಿ ರಜೆ ಕೊಡಲ್ಲ ಅಂದಿದ್ದಕ್ಕೆ ರಾಜೀನಾಮೆ ನೀಡಿದ್ರು ಕ್ರಾಂತಿ 'ಪುಷ್ಟವತಿ'!

ಎಂಜಿನಿಯರ್ ಕೆಲಸಕ್ಕೆ ರಾಜೀನಾಮೆ ಸಲ್ಲಿಸಿದ್ದ ನಿಮಿಕಾ

ಇನ್ನು ನಿಮಿಕಾ ರತ್ನಾಕರ್ ಮಾಡೆಲ್ ಎಂಬುದು ಸದ್ಯ ಸಿನಿ ರಸಿಕರಿಗೆ ತಿಳಿದಿರುವ ವಿಷಯವೇ. ಆದರೆ ಮಾಡೆಲ್ ಆಗುವುದಕ್ಕೂ ಮುನ್ನ ನಿಮಿಕಾ ಖಾಸಗಿ ಕಂಪೆನಿಯೊಂದರಲ್ಲಿ ಎಂಜಿನಿಯರ್ ಆಗಿ ಕೆಲಸ ನಿರ್ವಹಿಸಿದ್ದರು. 2017ರಲ್ಲಿ ನಡೆದ ಫ್ಯಾಷನ್ ಶೋ ಕಾಂಪಿಟಿಷನ್‌ನಲ್ಲಿ ಭಾಗವಹಿಸಿದ್ದ ನಿಮಿಕಾ ಗೆಲುವು ಕಂಡಿದ್ದರು. ಇದಾದ ಬಳಿಕ ಕೊರಿಯಾಗೆ ಹೋಗಬೇಕಾದ ಅನಿವಾರ್ಯ ನಿಮಿಕಾಗೆ ಎದುರಾಗಿತ್ತು. ಇದಕ್ಕಾಗಿ 22 ದಿನಗಳ ರಜೆ ಸಹ ನಿಮಿಕಾಗೆ ಅಗತ್ಯವಿತ್ತು. ಆದರೆ ಕಂಪೆನಿಯಲ್ಲಿ ರಜೆ ನೀಡಲಿಲ್ಲ ಹಾಗೂ ತಾನು ಕೆಲಸಕ್ಕೆ ರಾಜೀನಾಮೆ ಸಲ್ಲಿಸಿ ಕೊರಿಯಾಗೆ ಹಾರಿದ್ದೆ ಎಂದು ನಿಮಿಕಾ ರತ್ನಾಕರ್ ಹೇಳಿಕೊಂಡಿದ್ದಾರೆ.

ಕೊರಿಯಾದಿಂದ ಬಂದಮೇಲೆ ಕೈಯಲ್ಲಿ ಕೆಲಸ ಇಲ್ಲ

ಹೀಗೆ ರಜೆ ನೀಡದ ಕಾರಣ ಕೆಲಸಕ್ಕೆ ರಾಜೀನಾಮೆ ಸಲ್ಲಿಸಿ ಕೊರಿಯಾಗೆ ಹಾರಿದ್ದ ನಿಮಿಕಾ ಬೆಂಗಳೂರಿಗೆ ವಾಪಸ್ ಆದ ನಂತರ ಕೆಲಸವಿಲ್ಲದೇ, ಕೈನಲ್ಲಿ ಹಣವಿಲ್ಲದೇ ಏನು ಮಾಡಬೇಕು ಎಂದು ತಿಳಿಯದೇ ಚಿಂತೆಗೊಳಗಾಗಿದ್ದರಂತೆ. ಇದೇ ಸಮಯಕ್ಕೆ ರಾಮಧಾನ್ಯ ಎಂಬ ಚಿತ್ರದ ಆಫರ್ ನಿಮಿಕಾ ರತ್ನಾಕರ್ ಅವರನ್ನು ಹುಡುಕಿಕೊಂಡು ಬಂದಿತ್ತು. ಸಿಕ್ಕ ಅವಕಾಶವನ್ನು ಬಿಡದ ನಿಮಿಕಾ ರತ್ನಾಕರ್ ಈ ಚಿತ್ರದಲ್ಲಿ ನಟಿಸಿದರು ಹಾಗೂ ಪ್ರಜ್ವಲ್ ದೇವರಾಜ್ ನಟನೆಯ ಅಬ್ಬರ ಚಿತ್ರದಲ್ಲೂ ಸಹ ನಟಿಸಿದರು. ಅಲ್ಲದೇ ತ್ರಿಶೂಲಂ ಎಂಬ ಚಿತ್ರದಲ್ಲಿಯೂ ಸಹ ನಿಮಿಕಾ ಬಣ್ಣ ಹಚ್ಚಿದ್ದಾರೆ.

ನಿಮಿಕಾ ಮೂಲತಃ ಮಂಗಳೂರಿನವರು

ಇನ್ನು ತಮ್ಮ ಫ್ಯಾಮಿಲಿ ಕುರಿತು ಮಾಹಿತಿ ಹಂಚಿಕೊಂಡ ನಿಮಿಕಾ ರತ್ನಾಕರ್ ತಾನು ಮೂಲತಃ ಮಂಗಳೂರಿನವಳು, ಅಪ್ಪ ಹಾಗೂ ಅಮ್ಮ ಮಂಗಳೂರಿನಲ್ಲಿಯೇ ಇದ್ದಾರೆ ಎಂದು ಹೇಳಿಕೊಂಡರು. ಅಪ್ಪ ಇಂಟೀರಿಯರ್ ಡಿಸೈನರ್ ಹಾಗೂ ಅಮ್ಮ ಗೃಹಿಣಿಯಾಗಿದ್ದಾರೆ ಎಂದ ನಿಮಿಕಾ ರತ್ನಾಕರ್ ತನ್ನ ಸೋದರ ಇಟಲಿಯಲ್ಲಿ ಆರ್ಕಿಟೆಕ್ಟ್ ಎಂದು ತಿಳಿಸಿದರು. ಇನ್ನು ತಮ್ಮ ತಂದೆ ಈ ಹಿಂದೆ ನಿರ್ಮಾಪಕ ಹಾಗೂ ನಿರ್ದೇಶಕನಾಗಿ 'ಅಣ್ಣಾಜಿ' ಎಂಬ ಚಿತ್ರವನ್ನು ಮಾಡಿದ್ದರು ಎಂದು ಸಹ ಹೇಳಿಕೊಂಡರು.