ಕಬ್ಜ ಬಳಿಕ ದರ್ಶನ್ ಜತೆ ಪ್ಯಾನ್ ಇಂಡಿಯಾ ಸಿನಿಮಾ; ಆರ್ ಚಂದ್ರು ಹೇಳಿದ್ದಿಷ್ಟು!

ದರ್ಶನ್ ಜತೆ ಸಿನಿಮಾ ಮಾಡುವ ಬಗ್ಗೆ ಹೇಳಿಕೆ

ನಿನ್ನೆ ( ಫೆಬ್ರವರಿ 7 ) ನಿರ್ದೇಶಕ ಆರ್ ಚಂದ್ರು ತಮ್ಮ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದರು. ಕಬ್ಜ ಚಿತ್ರದ ಪ್ರಚಾರ ಕಾರ್ಯಗಳಲ್ಲಿ ಬ್ಯುಸಿ ಇರುವ ಅವರ ಹುಟ್ಟುಹಬ್ಬವನ್ನು ಅವರ ಅಭಿಮಾನಿಗಳು ಹಾಗೂ ಸ್ನೇಹಿತರು ಅದ್ದೂರಿಯಾಗಿಯೇ ಆಚರಿಸಿದರು. ಇದೇ ಸಂದರ್ಭದಲ್ಲಿ ಮಾತನಾಡಿದ ಚಂದ್ರು ಅವರಿಗೆ ದರ್ಶನ್ ಹುಟ್ಟುಹಬ್ಬದ ಪ್ರಯುಕ್ತ ಕಬ್ಜ ಚಿತ್ರದ ಅಪ್‌ಡೇಟ್ ಏನಾದರೂ ಇರಲಿದೆಯಾ ಎಂಬ ಪ್ರಶ್ನೆ ಎದುರಾಯಿತು. ಈ ಪ್ರಶ್ನೆಗೆ ಉತ್ತರಿಸಿದ ಆರ್ ಚಂದ್ರು ದರ್ಶನ್ ಅವರ ಜತೆ ಒಡನಾಟ ಚೆನ್ನಾಗಿದೆ, ಖಂಡಿತ ನಾನೂ ಸಹ ದರ್ಶನ್ ಅವರಿಗೆ ಸಿನಿಮಾ ತೋರಿಸಬೇಕು, ಅವರಿಗೂ ಸಹ ಸಿನಿಮಾ ಮಾಡಬೇಕು, ಯಾರಿಗೆ ಆಸೆ ಇರುವುದಿಲ್ಲ ಹೇಳಿ ಎಂದರು. ಇದೇ ವೇಳೆ ಮುಂದಿನ ಸಿನಿಮಾವನ್ನು ದರ್ಶನ್ ಅವರ ಜತೆ ನಿರೀಕ್ಷಿಸಬಹುದಾ ಎಂಬ ಪ್ರಶ್ನೆಯನ್ನು ಕೇಳಲಾಯಿತು. ಇದಕ್ಕುತ್ತರಿಸಿದ ಚಂದ್ರು ಯಾಕಾಗಬಾರದು, ಎಲ್ಲರೂ ಫ್ಯಾನ್ಸ್ ಅಲ್ವಾ, ಎಲ್ರೂ ಒಟ್ಟಿಗೆ ಕೆಲಸ ಮಾಡಿದ್ದೇವೆ, ಇಂಡಸ್ಟ್ರಿಯಲ್ಲಿ ಯಾರೇ ಆಗಲಿ ನನಗಿಷ್ಟ ಎಂದೂ ಸಹ ಚಂದ್ರು ತಿಳಿಸಿದರು.

ಚಿತ್ರದಲ್ಲಿ ಶಿವಣ್ಣ ಇರುತ್ತಾರಾ?

ಇನ್ನು ಸದ್ಯ ಕಬ್ಜ ಚಿತ್ರದ ಕುರಿತಾಗಿ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡಮಟ್ಟದಲ್ಲಿ ಹರಿದಾಡುತ್ತಿರುವ ವಿಷಯವೆಂದರೆ ಚಿತ್ರದಲ್ಲಿ ಉಪೇಂದ್ರ ಹಾಗೂ ಕಿಚ್ಚ ಸುದೀಪ್ ಜತೆಗೆ ನಟ ಶಿವ ರಾಜ್‌ಕುಮಾರ್ ಸಹ ಇರಲಿದ್ದಾರಾ ಎಂಬುದು. ಹೌದು, ಪ್ರಿಯಾಂಕಾ ಉಪೇಂದ್ರ ಅವರು ಮಾಧ್ಯಮದ ಜತೆ ಮಾತನಾಡುವಾಗ ಚಿತ್ರದಲ್ಲಿ ಶಿವ ರಾಜ್‌ಕುಮಾರ್ ಸಹ ಇರಲಿದ್ದಾರೆ ಎಂಬ ಹೇಳಿಕೆ ನೀಡಿದ್ದರು. ಈ ಕುರಿತು ಪ್ರತಿಕ್ರಿಯಿಸಿದ ಆರ್ ಚಂದ್ರು ಈಗಲೇ ಈ ಕುರಿತು ಯಾವುದೇ ಮಾಹಿತಿಯನ್ನು ನಾನು ಬಿಟ್ಟುಕೊಡುವುದಿಲ್ಲ, ಚಿತ್ರಮಂದಿರಕ್ಕೆ ಬಂದು ಚಿತ್ರ ನೋಡಿ, ಇನ್ನೂ ಹಲವಾರು ಕಲಾವಿದರನ್ನು ನೋಡಿ ಇವರೆಲ್ಲಾ ಚಿತ್ರದಲ್ಲಿ ಇದ್ದಾರಾ ಎಂದು ಆಶ್ಚರ್ಯಪಡ್ತೀರ ಎಂದು ಹೇಳಿದರು.

ಫೆಬ್ರವರಿ 16ಕ್ಕೆ ಮುಂದಿನ ಹಾಡು

ಮೊನ್ನೆಯಷ್ಟೇ ಕಬ್ಜ ಚಿತ್ರತಂಡ ತನ್ನ ಮೊದಲ ಹಾಡನ್ನು ಹೈದರಾಬಾದ್‌ನಲ್ಲಿ ಬಿಡುಗಡೆ ಮಾಡಿ ಸದ್ದು ಮಾಡಿತ್ತು. ಟೈಟಲ್ ಹಾಡನ್ನು ಮೊದಲಿಗೆ ಬಿಡುಗಡೆ ಮಾಡಿದ್ದ ಚಿತ್ರತಂಡ ತನ್ನ ಎರಡನೇ ಹಾಡನ್ನು ಫೆಬ್ರವರಿ 16ರಂದು ಬಿಡುಗಡೆ ಮಾಡಲಿದೆ. ಇದೇ ದಿನದಂದು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಹುಟ್ಟುಹಬ್ಬವೂ ಸಹ ಇದೆ.