ತೆರೆಗೆ ಬರಲು ಸಜ್ಜಾಗಿದೆ ಹೊಸಬರ 'ಇದಂ ಪ್ರೇಮಂ ಜೀವನಂ'

ಟೈಟಲ್ ನಿಂದಲೇ ಹೆಚ್ಚು ಗಮನ ಸೆಳೆಯುತ್ತಿರುವ 'ಇದಂ ಪ್ರೇಮಂ ಜೀವನಂ' ಸಿನಿಮಾ ಚಿತ್ರೀಕರಣ ಮುಗಿಸಿ ಬಿಡುಗಡೆಗೆ ಸಿದ್ದವಾಗಿದೆ. ಈ ಟೈಟಲ್ ಕೇಳಿದ ತಕ್ಷಣ ಇದ್ಯಾವುದೋ ತೆಲುಗು ಸಿನಿಮಾ ಇರಬೇಕು ಅಂದುಕೊಂಡವರೇ ಹೆಚ್ಚು. ಆದ್ರೆ, ಇದು ಅಪ್ಪಟ ಕನ್ನಡ ಸಿನಿಮಾ.

ಜೀವನದಲ್ಲಿ ಪ್ರೀತಿ ಎಷ್ಟು ಮುಖ್ಯ ಎಂಬುದನ್ನ ಹೊಸ ರೀತಿಯಲ್ಲಿ ಹೇಳಲು ಹೊರಟಿದೆ ಈ ಚಿತ್ರತಂಡ. ಜಗತ್ತಿನಲ್ಲಿ ತಂದೆ-ತಾಯಿಗಿಂತ ದೊಡ್ಡ ಪ್ರೀತಿ ಬೇರೆ ಯಾವುದು ಇಲ್ಲ ಎಂಬುದನ್ನ ಕಮರ್ಷಿಯಲ್ ಆಗಿ ತೋರಿಸಲು ಮುಂದಾಗಿದೆ.

ಈಗಾಗಲೇ ಚಿತ್ರದ ಟ್ರೈಲರ್ ಮತ್ತು ಹಾಡುಗಳು ರಿಲೀಸ್ ಆಗಿದ್ದು ಪ್ರೇಕ್ಷಕರ ಗಮನ ಸೆಳೆದಿದೆ. ಎಲ್ಲ ಹೊಸ ಕಲಾವಿದರೇ ಸೇರಿ ಮಾಡಿರುವ ಈ ಚಿತ್ರದಲ್ಲಿ ಹೊಸ ಭರವಸೆ ಮೂಡಿದೆ. ಫ್ಯಾಮಿಲಿ, ಫ್ರೆಂಡ್ಸ್, ಜರ್ನಿ, ಲವ್, ಬ್ರೇಕ್ ಅಪ್, ಆಕ್ಷನ್.....ಹೀಗೆ ಈ ಎಲ್ಲ ಅಂಶಗಳ ಜೊತೆಗೆ ಸಮಾಜಕ್ಕೊಂದು ಸಂದೇಶ ನೀಡಲಿದೆಯಂತೆ 'ಇದಂ ಪ್ರೇಮಂ ಜೀವನಂ'

ಈ ಹಿಂದೆ ಗಣಿತ ಉಪನಾಸ್ಯಕರಾಗಿದ್ದ ರಾಘವಾಂಕ ಪ್ರಭು ಅವರು ಈ ಚಿತ್ರವನ್ನ ನಿರ್ದೇಶನ ಮಾಡಿದ್ದಾರೆ. ಸನತ್, ಶನಾಯ ಚಿತ್ರದಲ್ಲಿ ನಾಯಕ ಹಾಗೂ ನಾಯಕಿಯಾಗಿ ಅಭಿನಯಿಸಿದ್ದಾರೆ. ಅವಿನಾಶ್ ಮತ್ತು ಮಾಳವಿಕ ಚಿತ್ರದ ತಂದೆ-ತಾಯಿ ಪಾತ್ರವನ್ನ ನಿರ್ವಹಿಸಿದ್ದಾರೆ.

ಇನ್ನುಳಿದಂತೆ ಜುಡಾ ಸ್ಯಾಂಡಿ ಈ ಚಿತ್ರಕ್ಕೆ ಸಂಗೀತ ಒದಗಿಸಿದ್ದಾರೆ. ನವೀನ್ ಪಂಚಾಕ್ಷರಿ ಛಾಯಾಗ್ರಹಣ ಚಿತ್ರಕ್ಕಿದೆ. ಕೆ.ಆರ್.ಜೆ ಸ್ಟುಡಿಯೋ ಕಾರ್ತಿಕ್ ಗೌಡ ಅವರು ಈ ಚಿತ್ರವನ್ನ ರಾಜ್ಯಾದ್ಯಂತ ಹಂಚಿಕೆ ಮಾಡುತ್ತಿದ್ದಾರೆ. ರಿಯೋನೋ ಪ್ರೊಡಕ್ಷನ್ ಹೌಸ್ ಮೂಲಕ ಈ ಸಿನಿಮಾ ನಿರ್ಮಾಣವಾಗಿದ್ದು, ಗೋಕುಲ್ ಎನ್.ಕೆ, ನವೀನ್ ಕುಮಾರ್ ಜೆಪಿ ಬಂಡವಾಳ ಹಾಕಿದ್ದಾರೆ.