ಸಿಸಿಬಿ ಅಧಿಕಾರಿಗಳಿಗೆ ಇಂದ್ರಜಿತ್ ಲಂಕೇಶ್ ಕೊಟ್ಟಿದ್ದು ಹೇಳಿಕೆ ಮಾತ್ರ, ಸಾಕ್ಷ್ಯ ಇಲ್ಲ

ಪೂರ್ಣ ಮಾಹಿತಿ ನೀಡಿಲ್ಲ

ಡ್ರಗ್ಸ್ ಜಾಲಕ್ಕೆ ಸಂಬಂಧಪಟ್ಟಂತೆ ಸಿನಿಮಾ ನಿರ್ದೇಶಕ ಇಂದ್ರಜಿತ್ ಲಂಕೇಶ್ ನಿನ್ನೆ ಸಿಸಿಬಿ ಕಚೇರಿಗೆ ಭೇಟಿ ನೀಡಿದ್ದರು. ಈ ವೇಳೆ ಕೆಲವರು ಹೆಸರು ಮಾತ್ರ ನೀಡಿದ್ದಾರೆ. ಅನುಮಾನದ ಹಿನ್ನೆಲೆ ಈ ಹೆಸರುಗಳನ್ನು ಪ್ರಸ್ತಾಪಿಸಿದ್ದಾರೆ. ಬೇರೆ ಯಾವ ಸಾಕ್ಷ್ಯವನ್ನು ನೀಡಿಲ್ಲ ಎಂದು ಸಿಸಿಬಿ ಅಧಿಕಾರಿ ಸಂದೀಪ್ ಪಾಟೀಲ್ ಮಾಹಿತಿ ನೀಡಿದ್ದಾರೆ.

ಫೋಟೋನೂ ಇಲ್ಲ, ವಿಡಿಯೋ ಇಲ್ಲ

ಸಿಸಿಬಿ ವಿಚಾರಣೆ ಮುಗಿಸಿ ಹೊರಬಂದ ಇಂದ್ರಜಿತ್ ಲಂಕೇಶ್ ಸೆಲೆಬ್ರಿಟಿಗಳ ಹೆಸರು, ವಿವರ, ಸ್ಥಳಗಳ ಬಗ್ಗೆ ಮಾಹಿತಿ ನೀಡಿದ್ದೇನೆ. ಹಾಗೂ ಅದಕ್ಕೆ ಸಂಬಂಧಪಟ್ಟಂತೆ ಕೆಲವು ಪಾರ್ಟಿಗಳ ಫೋಟೋ ಹಾಗೂ ವಿಡಿಯೋ ಸಹ ನೀಡಿದ್ದೇನೆ ಎಂದಿದ್ದರು.

ಇನ್ನೊಂದು ಅವಕಾಶ ನೀಡಲಾಗಿದೆ

ಸದ್ಯಕ್ಕೆ ಕೆಲವರ ಹೆಸರುಗಳನ್ನು ಇಂದ್ರಜಿತ್ ಲಂಕೇಶ್ ಪ್ರಸ್ತಾಪಿಸಿದ್ದಾರೆ. ಅದಕ್ಕೆ ಪೂರಕವಾದ ಸಾಕ್ಷ್ಯ ಅಥವಾ ಆಧಾರಗಳು ಇದ್ದಲ್ಲಿ ಮತ್ತೆ ಸಿಸಿಬಿ ಕಚೇರಿ ಬಂದು ನೀಡಿ ಎಂದು ಪೊಲೀಸರು ಸೂಚಿಸಿದ್ದಾರಂತೆ.

ಮುಂದೆ ಏನು.......?

ಇಷ್ಟು ದಿನ ನನ್ನಲ್ಲಿ ದಾಖಲೆ ಇದೆ, ಸಾಕ್ಷ್ಯ ಇದೆ, ಫೋಟೋ ಇದೆ, ವಿಡಿಯೋ ಇದೆ ಎಂದು ಹೇಳುತ್ತಿದ್ದ ಇಂದ್ರಜಿತ್ ಲಂಕೇಶ್ ಹಾಗಾದ್ರೆ ಸಿಸಿಬಿ ಮುಂದೆ ಏನೂ ನೀಡಿಲ್ವಾ? ಸಾಕ್ಷ್ಯ ಎನ್ನುವ ದಾಖಲೆಗಳು ಅವರ ಬಳಿ ಇದ್ಯಾ ಅಥವಾ ಇಲ್ಲದೆ ಸುಮ್ಮನೆ ಹೇಳುತ್ತಿದ್ದಾರಾ? ಸಿಸಿಬಿ ಕಚೇರಿಗೆ ಇಂದ್ರಜಿತ್ ಮತ್ತೆ ಭೇಟಿ ನೀಡುತ್ತಾರಾ? ಎಂಬ ಪ್ರಶ್ನೆಗಳು ಸಹಜವಾಗಿ ಕಾಡುತ್ತದೆ.