ರೊಚ್ಚಿಗೆದ್ದ ಜಗ್ಗೇಶ್: ನಕಲಿ ಖಾತೆ ಮಾಡಿದವರಿಗೆ ಮುಂದೈತೆ ಮಾರಿಹಬ್ಬ

Recommended Video

ತಮ್ಮ ಹೆಸರಿನಲ್ಲಿ ನಕಲಿ ಟ್ವಿಟ್ಟರ್ ಖಾತೆ ಸೃಷ್ಟಿಸಿ ದುರ್ಬಳಕೆ ಮಾಡುತ್ತಿರುವವರ ವಿರುದ್ಧ ನಟ ನವರಸ ನಾಯಕ ಜಗ್ಗೇಶ್ ಆಕ್ರೋಶಗೊಂಡಿದ್ದಾರೆ. ದುರ್ಬಳಕೆ ಮಾಡುತ್ತಿರುವ ದುಷ್ಟರ ವಿರುದ್ಧ ಕ್ರಮ ಜರುಗಿಸುವಂತೆ ಮಲ್ಲೇಶ್ವರಂ ಪೊಲೀಸ್ ಠಾಣೆ ಮತ್ತು ಸೈಬರ್ ಪೊಲೀಸರಿಗೆ ದೂರು ನೀಡಿರುವುದಾಗಿ ತಿಳಿಸಿದ್ದಾರೆ.

ಇತ್ತೀಚಿಗಷ್ಟೆ ನಟ ಜಗ್ಗೇಶ್ ಹೆಸರಿನಲ್ಲಿ ರಫೇಲ್ ಹಗರಣಕ್ಕೆ ಸಂಬಂಧಸಿದಂತೆ ಮಾಡಲಾಗಿದ್ದ ಟ್ವೀಟ್ ವೊಂದು ವೈರಲ್ ಆಗಿತ್ತು. ರಫೇಲ್ ಹಗರಣಕ್ಕೆ ಸಂಬಂಧಿಸಿದಂತೆ ಕೇಂದ್ರ ರಕ್ಷಣಾ ಇಲಾಖೆಯಲ್ಲಿದ್ದ ದಾಖಲೆಗಳು ಕಳ್ಳತನವಾಗಿದೆ ಎಂದು ವರದಿಯಾಗಿತ್ತು.

ಇದಕ್ಕೆ ಜಗ್ಗೇಶ್ ಪ್ರತಿಕ್ರಿಯೆ ನೀಡಿರುವಂತಿಂದ್ದ ಟ್ವೀಟ್ ನಲ್ಲಿ ''ರಫೇಲ್ ಹಗರಣದ ದಾಖಲೆಗಳು ಕಳ್ಳತನವಾಗಿದೆ ಎಂದು ಸರ್ಕಾರ ಹೇಳಿದೆ. ರಾಜ್ಯ ಮೈತ್ರಿ ಸರ್ಕಾರಕ್ಕೆ ಒಂದು ಕಡತವನ್ನ ರಕ್ಷಣೆ ಮಾಡಲು ಸಾಧ್ಯವಾಗದೇ ಇದ್ದರೇ ಜನರ ರಕ್ಷಣೆಯನ್ನ ಹೇಗೆ ಮಾಡ್ತಾರೆ?'' ಎಂದು ಪ್ರಶ್ನಿಸಿರುವಂತಹ ಟ್ವೀಟ್ ವೈರಲ್ ಆಗಿತ್ತು.

ಇದನ್ನ ನೋಡಿ ಜನರು ಜಗ್ಗೇಶ್ ಅವರಿಗೆ ಟೀಕಿಸಿದ್ದರು. ''ರಫೇಲ್ ಹಗರಣ ಕೇಂದ್ರ ಸರ್ಕಾರದ್ದು, ರಾಜ್ಯ ಸರ್ಕಾರದಲ್ಲ'' ಎಂದು ವ್ಯಂಗ್ಯ ಮಾಡಿದ್ದರು. ಜಗ್ಗೇಶ್ ವಿರುದ್ಧ ನೆಟ್ಟರಿಗರು ಕಿಡಿಕಾರಿದ್ದರು. ಇದನ್ನ ಗಮನಿಸಿದ ಜಗ್ಗೇಶ್ ಈಗ ಪೊಲೀಸ್ ದೂರು ನೀಡಿ, ತಮ್ಮ ಟ್ವಿಟ್ಟರ್ ಖಾತೆ ದುರ್ಬಳಕೆ ಮಾಡುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.