ಬೇಸರದಲ್ಲಿದ್ದ ಜಗ್ಗೇಶ್‌ಗೆ ಸಂತೋಷ ತಂದ ಅಭಿಮಾನಿಯ ಉಡುಗೊರೆ

ಮಹಾಭಾರತ ವಿಮರ್ಶಾ ಕೃತಿ ಸಮರ್ಪಣೆ

ಜಗ್ಗೇಶ್ ಅವರ ಅಭಿಮಾನಿಯೊಬ್ಬರು, ಮಹಾಭಾರತ ಕುರಿತ ವಿಮರ್ಶಾತ್ಮಕ ಕೃತಿಯೊಂದನ್ನು ರಚಿಸಿದ್ದು, ಆ ಕೃತಿಯನ್ನು ಜಗ್ಗೇಶ್ ಅವರಿಗೆ ಅರ್ಪಿಸಿದ್ದಾರೆ. ಇದು ಜಗ್ಗೇಶ್ ಅವರಿಗೆ ಸಂತೋಷ ತಂದಿದೆ. ಈ ಬಗ್ಗೆ ಟ್ವಿಟ್ಟರ್‌ನಲ್ಲಿ ಜಗ್ಗೇಶ್ ಪ್ರಕಟಿಸಿದ್ದಾರೆ.

'ಕುರುಕ್ಷೇತ್ರ ಮಹಾಯುದ್ಧದಲ್ಲಿ ಭಗವದ್ಗೀತೆ ಏಕೆ ಸೇರ್ಪಡೆಯಾಯಿತು?'

'ಕುರುಕ್ಷೇತ್ರ ಮಹಾಯುದ್ಧದಲ್ಲಿ ಭಗವದ್ಗೀತೆ ಏಕೆ ಸೇರ್ಪಡೆಯಾಯಿತು?' ಎಂಬುದು ಪುಸ್ತಕದ ಹೆಸರಾಗಿದ್ದು, ಇದನ್ನು ವಿಜ್ಞಾನ ಲೇಖಕ ಎಂದು ತಮ್ಮನ್ನು ಕರೆದುಕೊಂಡಿರುವ ಜಿ.ನಾಗೇಂದ್ರನ್ ಅವರು ರಚಿಸಿದ್ದಾರೆ. ಇದೇ ಪುಸ್ತಕವನ್ನು ಜಗ್ಗೇಶ್ ಅವರಿಗೆ ಅರ್ಪಿಸಲಾಗಿದೆ.

ಜಗ್ಗೇಶ್ ಅನ್ನು ದ್ರೋಣರಿಗೆ ಹೋಲಿಸಿದ ಲೇಖಕ

'ಸತ್ಯವಾಗಿ ನಾನೇ ಬರೆದ ಈ ಕೃತಿಯನ್ನು ದ್ರೋಣರಂತೆ ಕೌರವರ ಕಡೆಯಿದ್ದರೂ ಪಾಂಡವರಿಗೆ ಕೆಟ್ಟದ್ದನ್ನು ಬಯಸದ ಹಿರಿಯ ಆಚಾರ್ಯರಿಗೆ ಸಮನಾದ ತಮಗೆ ನನ್ನ ಆತ್ಮ ಸಂತೃಪ್ತಿಗಾಗಿ ಸಮರ್ಪಿಸುತ್ತಿದ್ದೇನೆ' ಎಂದು ಲೇಖಕ ನಾಗೇಂದ್ರನ್ ಬರೆದಿದ್ದಾರೆ.

ಹೃದಯ ಸೇರಿದಿರಿ ಎಂದ ನಟ ಜಗ್ಗೇಶ್

ನಾಗೇಂದ್ರನ್ ಅವರ ಅಭಿಮಾನಕ್ಕೆ ಪ್ರತಿಯಾಗಿ 'ಯಾರೋ ಸ್ವಾರ್ಥಿಗೆ ನನ್ನ ಶ್ರಮ ದೇಣಿಗೆ ನೀಡಿದೆ ಎಂದು ಕೊರಗಿದಾಗ ರಾಯರು ಇನ್ನೊಂದು ರೂಪದಲ್ಲಿ ನನಗೆ ಸಾಂತ್ವನ ಹೇಳಿದ ಬಗೆ. ಇಷ್ಟು ಅದ್ಭುತ ಭಗವದ್ಗೀತ ಸಂಶೋಧನೆ ನನಗೆ ಅರ್ಪಿಸಿದ ಅಭಿಮಾನಿಕಂಡು ಕೃತಾರ್ಥನಾದೆ. ಹೌದು, ಜಗದಲ್ಲಿ ಎಲ್ಲಾ ಗುಣ ಇರುತ್ತದೆ ಅದ ಪರಮಾರ್ಶಿಸಿ ಒಪ್ಪುವ ಜ್ಞಾನ ನಮಗಿರಬೇಕು. ಧನ್ಯವಾದ ನಾಗೇಂದ್ರ ನನ್ನ ಹೃದಯ ಸೇರಿದಿರಿ' ಎಂದು ಟ್ವಿಟ್ಟರ್‌ನಲ್ಲಿ ಬರೆದುಕೊಂಡಿದ್ದಾರೆ.