2022 ಕನ್ನಡ ಚಿತ್ರರಂಗಕ್ಕೆ ಗೋಲ್ಡನ್ ಇಯರ್ ಎಂದು ಹೇಳಲು ಇಲ್ಲಿವೆ ಐದು ಕಾರಣಗಳು

1. ನೂರು ಕೋಟಿಯ ಐದು ಚಿತ್ರಗಳು

ಈ ಹಿಂದೆ ಕನ್ನಡ ಚಿತ್ರಗಳು ನೂರು ಕೋಟಿ ಕ್ಲಬ್ ಸೇರುವುದು ಕಷ್ಟ ಎಂಬ ಅಭಿಪ್ರಾಯವಿತ್ತು ಹಾಗೂ ಈ ಕುರಿತು ಪರಭಾಷಾ ಅಭಿಮಾನಿಗಳು ಗೇಲಿಯನ್ನೂ ಸಹ ಮಾಡುತ್ತಿದ್ದರು. ಆದರೆ ಈ ವರ್ಷ ಕನ್ನಡ ಚಿತ್ರರಂಗ ಒಟ್ಟು ಐದು ನೂರು ಕೋಟಿ ಚಿತ್ರಗಳನ್ನು ನೀಡುವುದರ ಮೂಲಕ ಅಬ್ಬರಿಸಿದೆ. ಮೊದಲಿಗೆ ಪುನೀತ್ ರಾಜ್‌ಕುಮಾರ್ ನಟನೆಯ ಜೇಮ್ಸ್ ಮೂಲಕ ವರ್ಷದ ಮೊದಲ ಶತಕ ಬಾರಿಸಿದ ಕನ್ನಡ ಚಿತ್ರರಂಗ ನಂತರ ಕೆಜಿಎಫ್ ಚಾಪ್ಟರ್ 2, 777 ಚಾರ್ಲಿ, ವಿಕ್ರಾಂತ್ ರೋಣ ಹಾಗೂ ಕಾಂತಾರ ಚಿತ್ರಗಳು ಸಹ ನೂರು ಕೋಟಿಗಿಂತ ಹೆಚ್ಚು ಗಳಿಸುವಲ್ಲಿ ಯಶಸ್ವಿಯಾದವು.

2. ಸಾವಿರ ಕೋಟಿ ಕಲೆಕ್ಷನ್!

ಮೊದಲೇ ಹೇಳಿದಂತೆ ಕನ್ನಡ ಚಿತ್ರಗಳು ನೂರು ಕೋಟಿ ಗಳಿಸುವುದೂ ಸಹ ಕಷ್ಟ ಎಂಬ ಅಭಿಪ್ರಾಯವಿತ್ತು. ಕೆಜಿಎಫ್ ಚಾಪ್ಟರ್ 2 ಬರೋಬ್ಬರಿ 1250 ಕೋಟಿ ಗಳಿಸುವ ಮೂಲಕ ಈ ವರ್ಷ ಭಾರತದಲ್ಲ ಅತಿಹೆಚ್ಚು ಗಳಿಸಿದ ಚಿತ್ರ ಎನಿಸಿಕೊಂಡು ಟೀಕಾಕಾರರೂ ಸಹ ಕನ್ನಡ ಚಿತ್ರರಂಗದ ಬೆಳವಣಿಗೆಯನ್ನು ಹೊಗಳುವಂತೆ ಮಾಡಿದೆ.

3. ಐಎಂಡಿಬಿ ಜನಪ್ರಿಯ ಚಿತ್ರಗಳ ಪಟ್ಟಿಯಲ್ಲಿ ಕನ್ನಡದ ಮೇಲುಗೈ

ಇನ್ನು ಐಎಂಡಿಬಿ ಬಿಡುಗಡೆಗೊಳಿಸಿದ ವರ್ಷದ ಜನಪ್ರಿಯ ಚಿತ್ರಗಳ ಟಾಪ್ 10 ಪಟ್ಟಿಯಲ್ಲಿ ಕನ್ನಡದ ಕೆಜಿಎಫ್ ಚಾಪ್ಟರ್ 2, ಕಾಂತಾರ ಹಾಗೂ 777 ಚಾರ್ಲಿ ಚಿತ್ರಗಳು ಸ್ಥಾನ ಗಿಟ್ಟಿಸಿಕೊಂಡಿವೆ. ಈ ಮೂಲಕ ಈ ವರ್ಷ ಈ ಪ್ರತಿಷ್ಠಿತ ಪಟ್ಟಿಯಲ್ಲಿ ಅತಿಹೆಚ್ಚು ಸ್ಥಾನಗಳನ್ನು ಗಿಟ್ಟಿಸಿಕೊಂಡ ಚಿತ್ರರಂಗ ಎಂಬ ದಾಖಲೆಯನ್ನು ಕನ್ನಡ ಚಿತ್ರರಂಗ ಬರೆದಿದೆ.

4. ಅತಿಹೆಚ್ಚು ಜನರಿಂದ ವೀಕ್ಷಣೆ

ಇನ್ನು ಈ ವರ್ಷ ಬಿಡುಗಡೆಯಾದ ಚಿತ್ರಗಳ ಪೈಕಿ ಅತಿಹೆಚ್ಚು ಟಿಕೆಟ್ ಮಾರಾಟವಾದದ್ದು ಕನ್ನಡ ಚಿತ್ರಗಳದ್ದು. ಕೆಜಿಎಫ್ ಚಾಪ್ಟರ್ 2 ಹಾಗೂ ಕಾಂತಾರ ಚಿತ್ರಗಳ ಟಿಕೆಟ್‌ಗಳು ಹೆಚ್ಚೆಚ್ಚು ಮಾರಾಟವಾಗಿ ದಾಖಲೆಗೆ ಕಾರಣವಾಗಿವೆ.

5. ಕಿಚ್ಚ - ದರ್ಶನ್ ಒಂದಾಗಿದ್ದು

ಬಾಕ್ಸ್ ಆಫೀಸ್, ಚಿತ್ರಗಳ ಯಶಸ್ಸು ಮಾತ್ರವಲ್ಲದೇ ಕಿಚ್ಚ ಸುದೀಪ್ ಹಾಗೂ ದರ್ಶನ್ ಇಬ್ಬರು ಸಹ ಹಲವು ವರ್ಷಗಳ ಬಳಿಕ ಮಾತನಾಡಿದ್ದು ಈ ವರ್ಷದ ಮತ್ತೊಂದು ಖುಷಿಯ ಸಂಗತಿ ಎನ್ನಬಹುದು. ಹೊಸಪೇಟೆಯಲ್ಲಿ ದರ್ಶನ್ ಮೇಲೆ ಚಪ್ಪಲಿ ಎಸೆದದ್ದರ ಬಗ್ಗೆ ಟ್ವೀಟ್ ಮಾಡಿದ್ದ ಸುದೀಪ್ ದರ್ಶನ್ ಪರ ಮಾತನಾಡಿದ್ದರು ಹಾಗೂ ಇದಕ್ಕೆ ದರ್ಶನ್ ಪ್ರತಿಕ್ರಿಯಿಸಿದ್ದರು. ಹೀಗೆ ಇಬ್ಬರೂ ಹಲವಾರು ವರ್ಷಗಳ ಬಳಿಕ ಸಾಮಾಜಿಕ ಜಾಲತಾಣದಲ್ಲಿ ಮಾತನಾಡಿದ್ದನ್ನು ಕಂಡ ಸಿನಿ ರಸಿಕರು ಹಾಗೂ ಅಭಿಮಾನಿಗಳು ಹರ್ಷ ವ್ಯಕ್ತಪಡಿಸಿ 2022 ನಿಜಕ್ಕೂ ಗೋಲ್ಡನ್ ಇಯರ್ ಎಂದಿದ್ದರು.