James Piracy: 'ಜೇಮ್ಸ್'ಗೂ ಪೈರಸಿ ಕಾಟ: ಅಭಿಮಾನಿಗಳಿಂದ ಅಭಿಯಾನ!

'ಜೇಮ್ಸ್‌'ಗೂ ಎದುರಾಗುತ್ತಾ ಪೈರಸಿ ಕಾಟ?

'ಜೇಮ್ಸ್' ಸಿನಿಮಾ ಅದ್ದೂರಿಯಾಗಿ ರಿಲೀಸ್ ಆಗುತ್ತಿದೆ. ಅಭಿಮಾನಿಗಳು ಮತ್ತು ಪ್ರೇಕ್ಷಕರು ಸಿನಿಮಾವನ್ನು ಅದ್ದೂರಿಯಾಗಿ ಸ್ವಾಗತ ಮಾಡಲು ಸಿದ್ದರಾಗಿದ್ದಾರೆ. ಆದರೆ ಸಿನಿಮಾ ತಂಡಕ್ಕೆ ಈಗ ಹೊಸ ಟೆನ್ಷನ್ ಶುರುವಾಗಿದೆ. ಸಿನಿಮಾ ರಿಲೀಸ್ ಆಗುವ ಖುಷಿ ಒಂದು ಕಡೆ ಆದರೆ, ಸಿನಿಮಾ ಪೈರಸಿ ಆಗುವ ಆತಂಕ ಮತ್ತೊಂದು ಕಡೆಗೆ. ಹಾಗಾಗಿ ಚಿತ್ರ ರಿಲೀಸ್‌ಗೂ ಮೊದಲೆ ಸಿನಿಮಾವನ್ನು ಪೈರಸಿ ಮಾಡದಂತೆ ಮನವಿ ಮಾಡಲಾಗುತ್ತಿದೆ.

ಪೈರಸಿ ಮಾಡಬೇಡಿ ಎಂದ ಅಭಿಮಾನಿಗಳು!

'ಜೇಮ್ಸ್' ಸಿನಿಮಾ ಪೈರಸಿ ಮಾಡದಂತೆ ಪುನೀತ್ ರಾಜ್‌ಕುಮಾರ್ ಅಭಿಮಾನಿಗಳು ಮನವಿ ಮಾಡಿಕೊಂಡಿದ್ದಾರೆ. ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಅಭಿಯಾನ ಶುರು ಮಾಡಿದ್ದಾರೆ. 'ಜೇಮ್ಸ್' ಸಿನಿಮಾವನ್ನು ಪೈರಸಿ ಮಾಡಬೇಡಿ, ಈ ಚಿತ್ರವನ್ನು ಎಲ್ಲರೂ ಚಿತ್ರಮಂದಿರಗಳಲ್ಲಿ ಸಂಭ್ರಮಿಸೋಣ ಎಂದು ಕೇಳಿಕೊಂಡಿದ್ದಾರೆ. ಪುನೀತ್ ರಾಜ್‌ಕುಮಾರ್ ಅವರ ಮೇಲಿನ ಅಭಿಮಾನದಿಂದ ಈ ಚಿತ್ರವನ್ನು ಪೈರಸಿ ಮಾಡಬೇಡಿ ಎಂದಿದ್ದಾರೆ.

ಪೈರಸಿಗೆ ಬಲಿಯಾಗುತ್ತಿರುವ ಅನೇಕ ಚಿತ್ರಗಳು!

ಸಿನಿಮಾ ಪೈರಸಿ ಆದರೆ ಚಿತ್ರಮಂದಿರದಲ್ಲಿ ಪ್ರೇಕ್ಷಕರ ಸಂಖ್ಯೆ ಕಡಿಮೆ ಆಗುತ್ತದೆ. ಇದರಿಂದ ಚಿತ್ರದ ಗಳಿಕೆ ಮೇಲೆ ಹೊಡೆತ ಬೀಳುತ್ತದೆ. ಪೈರಸಿಯಿಂದ ಹಲವಾರು ಸಿನಿಮಾಗಳು ನಲುಗಿ ಹೋಗಿವೆ. ಇತ್ತೀಚೆಗೆ ಕನ್ನಡದಲ್ಲಿ ಬಂದ 'ಏಕ್‌ ಲವ್ ಯಾ' ಸಿನಿಮಾಗೂ ಪೈರಸಿ ಕಾಟ ಕೊಟ್ಟಿತ್ತು. ಈ ಬಗ್ಗೆ ಹೆಚ್ಚಿನ ಕ್ರಮ ಕೈಗೊಂಡಿತ್ತು ಚಿತ್ರತಂಡ. ಈ ವಿಚಾರದಲ್ಲಿ ನಿರ್ದೇಶಕ ಪ್ರೇಮ್ ಠಾಣೆ ಮೆಟ್ಟಿಲು ಕೂಡ ಏರಿದ್ದರು. ಆದರೆ ಅಷ್ಟರಲ್ಲಿ ಪೈರಸಿ ಆಗಿದ್ದ ಸಿನಿಮಾ ಪ್ರತಿ ಹಲವರಿಗೆ ತಲುಪಿ ಬಿಟ್ಟಿತ್ತು.

ಪೈರಸಿ ಕಾಟ ತಪ್ಪೋದು ಯಾವಾಗ?

ಸಿನಿಮಾಗಳಿಗೆ ಪೈರಸಿ ದೊಡ್ಡ ಪಿಡುಗಾಗಿ ಕಾಡುತ್ತಲಿದೆ. ಸಾಕಷ್ಟು ಸಿನಿಮಾಗಳು ಇದ್ದಕ್ಕೆ ಬಲಿಯಾಗಿವೆ. ತಮಿಳು, ತೆಲುಗು ಸಿನಿಮಾಗಳಿಗೂ ಇದು ದೊಡ್ಡ ತಲೆನೋವಾಗಿದೆ. ಆದರೆ ಸದ್ಯಕ್ಕೆ ಈ ಪೈರಸಿ ಕಾಟ ತಪ್ಪುವಂತೆ ಕಾಣುತ್ತಾ ಇಲ್ಲ. ಯಾಕೆಂದರೆ ಹಲವು ಬಾರಿ ಹಲವು ಸಿನಿಮಾ ತಂಡಗಳು ಈ ವಿಚಾರದಲ್ಲಿ ಸೈಬರ್ ಕ್ರೈಮ್ ಠಾಣೆಯ ಮೊರೆ ಹೋಗಿವೆ. ಆದರೂ ಕೂಡ ಯಾವುದೇ ಪ್ರಯೋಜನವಾಗಿಲ್ಲ. ಮತ್ತೆ ಮತ್ತೆ ಪೈರಸಿ ಕಾಟ ಎದುರಾಗುತ್ತಲೇ ಇದೆ. ಹಾಗಾಗಿ ಅಪ್ಪು ಅಭಿಮಾನಿಗಳು ಬಹಿರಂಗವಾಗಿ 'ಜೇಮ್ಸ್' ಪೈರಸಿ ಮಾಡಬೇಡಿ ಎಂದು ಕೇಳಿಕೊಳ್ಳುತ್ತಾ ಇದ್ದಾರೆ.