ಕಷ್ಟಪಟ್ಟು ಮಾಡಿದ ಸಿನಿಮಾಕ್ಕೆ ಬುಕ್‌ ಮೈ ಶೋ ಇಟ್ಟ ಗುನ್ನಾ

ಒಳ್ಳೆಯ ವಿಮರ್ಶೆಯೇ ಸಿನಿಮಾಕ್ಕೆ ಸಿಕ್ಕಿತ್ತು: ವಿಕಾಸ್

ಒಳ್ಳೆಯ ಚಿತ್ರವೆಂಬ ವಿಮರ್ಶೆ ಎಲ್ಲೆಡೆಯಿಂದ ನಮ್ಮ ಚಿತ್ರಕ್ಕೆ ಸಿಕ್ಕಿತ್ತು, ಆದರೆ ಬುಕ್ ಮೈ ಶೋ 'ಕನ್ನಡವಿರೋಧಿ' ತನದಿಂದಾಗಿ ನಮ್ಮ ಚಿತ್ರಕ್ಕೆ ಬಹುದೊಡ್ಡ ಹೊಡೆತವಾಗಿತ್ತು. ಭಾನುವಾರದ ದಿನ ನಮ್ಮ ಚಿತ್ರಕ್ಕೆ ಕೇವಲ 24 ರೇಟಿಂಗ್ ನೀಡಿದ್ದರು. ಆದರೆ ಜಾಹೀರಾತು ನೀಡಿದ ಮೇಲೆ ಅದನ್ನು 64% ಮಾಡಿದರು ಎಂದು ಬುಕ್ ಮೈ ಶೋ ಕನ್ನಡ ಸಿನಿಮಾ ವಿರೋಧಿ ತಂತ್ರವನ್ನು ಬಯಲಿಗೆಳೆದರು.

ಆರು ವರ್ಷ ಈ ಸಿನಿಮಾಕ್ಕಾಗಿ ಕೆಲಸ ಮಾಡಿದ್ದೇನೆ: ವಿಕಾಸ್

ಸತತ ಆರು ವರ್ಷ ಈ ಸಿನಿಮಾಕ್ಕಾಗಿ ಕೆಲಸ ಮಾಡಿದ್ದೇನೆ. ನನ್ನೊಂದಿಗೆ ನನ್ನ ನಿರ್ದೇಶಕರು, ನಿರ್ಮಾಪಕರು, ಇತರ ನಟರುಗಳು ಕೆಲಸ ಮಾಡಿದ್ದಾರೆ. ಇಷ್ಟು ವರ್ಷದ ಶ್ರಮವನ್ನು ಸುಮ್ಮನೆ ಹೋಗಲು ಬಿಡುವುದಿಲ್ಲ ಎಂದು ಛಲದಿಂದ ಹೇಳಿದ ವಿಕಾಸ್, ಹಿಂದೆ ಚಿತ್ರೀಕರಿಸಿದ್ದ ಕೆಲವು ಹಾಸ್ಯ ದೃಶ್ಯಗಳನ್ನು ಸೇರಿಸಿ ಮರು ಬಿಡುಗಡೆ ಮಾಡುತ್ತಿದ್ದೀನಿ, ಈ ಬಾರಿ ಗೆದ್ದೇ ಗೆಲ್ಲುವ ವಿಶ್ವಾಸವಿದೆ'' ಎಂದು ವಿಕಾಸ್ ಹೇಳಿದರು.

ಕನ್ನಡ ಸಿನಿಮಾ ಬಗ್ಗೆ ಅಸಡ್ಡೆ

ಅಮೆಜಾನ್ ಫ್ರೈಂ, ನೆಟ್‌ಫ್ಲಿಕ್ಸ್‌ಗಳ ಮಾರುಕಟ್ಟೆ ತಂತ್ರದ ಬಗ್ಗೆಯೂ ಆಕ್ಷೇಪ ವ್ಯಕ್ತಪಡಿಸಿದ ವಿಕಾಸ್, 'ಅಮೆಜಾನ್ ನವರು ತಾವು ಬೆಳೆಯುವ ವರೆಗೂ ಸಿನಿಮಾಗಳನ್ನು ಕೊಂಡುಕೊಂಡು ಪ್ರದರ್ಶಿಸಿದರು, ಆದರೆ ಈಗ ಚಿತ್ರಮಂದಿರಗಳಲ್ಲಿ ಓಡಿರುವ ಸಿನಿಮಾಗಳನ್ನು ಮಾತ್ರವೇ ಕೊಳ್ಳುತ್ತಿದ್ದಾರೆ' ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

''ಪ್ರೇಕ್ಷಕರು, ಅಮೆಜಾನ್ ಪ್ರೈಂ ನಡುವೆ ಸಿನಿಮಾ ಮಂದಿ ಹೈರಾಣು''

''ಇನ್ನು ಜನರು ಯಾವುದೇ ಸಿನಿಮಾವಾದರೂ ಅಮೆಜಾನ್ ನಲ್ಲಿ ಬಂದಾಗ ನೋಡಿಕೊಳ್ಳೋಣ ಎಂದು ಕೊಳ್ಳುತ್ತಿದ್ದಾರೆ, ಆದರೆ ಅಮೆಜಾನ್ ಪ್ರೈಂ ನವರು, ಚಿತ್ರಮಂದಿರಗಳಲ್ಲಿ ಓಡಿದ ಸಿನಿಮಾ ಮಾತ್ರವೇ ಕೊಳ್ಳುತ್ತೇವೆ ಎನ್ನುತ್ತಿದ್ದಾರೆ. ಮಧ್ಯದಲ್ಲಿ ನಾವುಗಳು ಸಿಕ್ಕಿಕೊಂಡು ಒದ್ದಾಡುತ್ತಿದ್ದೇವೆ'' ಎಂದು ಹೇಳಿದರು.