'ಅಂಬಿ' ಬಗ್ಗೆ ಪ್ರೀತಿಯ ಪತ್ರ ಬರೆದ ಕಿಚ್ಚ ಸುದೀಪ್

ಯಾವುದೂ ಸುಲಭ ಅಲ್ಲ

ಅಂಬಿ..

ರೆಬೆಲ್​ ಸ್ಟಾರ್​ ಅಂಬರೀಶ್​ ವಿಷಯದಲ್ಲಿ ಯಾವುದೂ ಸುಲಭ ಅಲ್ಲ, ಯಾವುದೂ ಸುಲಭವಾಗಿ ಆಗೋದಿಲ್ಲ.! ನಾನು ಇದನ್ನ ಹೇಳ್ತಾ ಇರೋದು ಅವರ ವೃತ್ತಿ ಬದುಕಿನ ಬಗ್ಗೆ ಅಲ್ಲ, ಬದಲಾಗಿ ಅವರ ವ್ಯಕ್ತಿತ್ವದ ಬಗ್ಗೆ ಮಾತ್ರ.

ಅವರಿಗೆ ಹೇಗೆ ಬೇಕೋ ಹಾಗೆ ಜೀವನ ಸಾಗಿಸಿದ್ದಾರೆ. ಎಲ್ಲಾ ನಿರ್ಧಾರಗಳನ್ನು ಅವರೇ ತೆಗೆದುಕೊಂಡಿದ್ದಾರೆ. ಯಾವುದೇ ತೊಂದರೆಗೆ ಅವರು ಸಿಕ್ಕಿ ಹಾಕೊಂಡಿಲ್ಲ, ಬೇರೆಯವರಿಗೆ ತೊಂದರೆ ಕೊಟ್ಟಿದ್ದೂ ಇಲ್ಲ.

ಅಂಬಿ ವ್ಯಕ್ತಿತ್ವ

ಅವರ ಮಾತು ಅಷ್ಟು ನಯವಾಗಿ, ಮೃದುವಾಗಿ ಇರೋದಿಲ್ಲ, ಅವರ ಹಾವ ಭಾವ ಕೂಡ ಅಷ್ಟು ನಾಜೂಕಾಗಿ ಇರೋದಿಲ್ಲ. ಅದ್ರೆ ಅವ್ರೊಳಗೊಬ್ಬ ತದ್ವಿರುದ್ಧ ವ್ಯಕ್ತಿ ಇದ್ದಾನೆ. ಸಹಾಯ ಮಾಡುವ, ಪ್ರೀತಿ ಮಾಡುವ, ಹಾರೈಕೆ ಮಾಡುವ ಆ ವ್ಯಕ್ತಿಯ ಬಗ್ಗೆ ನಾನು ಹೇಳುತ್ತಾ ಇದ್ದೇನೆ.

ನಿರ್ಲಕ್ಷ್ಯ ಮಾಡುವ ವ್ಯಕ್ತಿತ್ವ ಅಲ್ಲ

ಅವ್ರನ್ನ ಸಂಪೂರ್ಣವಾಗಿ ಅರ್ಥ ಮಾಡಿಕೊಂಡವರಿಲ್ಲ. ಆದ್ರೆ ಯಾರೂ ಅಂಬಿ ಬಗ್ಗೆ ನಂಗೆ ಗೊತ್ತಿಲ್ಲ ಅಂತ ಹೇಳೋದೂ ಇಲ್ಲ. ಅದು ನಮ್ಮೊಳಗಿನ ಗೊಂದಲ ಅಷ್ಟೇ. ಯಾರು ಅವರ ಬಗ್ಗೆ ಏನೇ ಅಂದುಕೊಂಡರೂ, ಅವರದ್ದು ನಿರ್ಲಕ್ಷ್ಯ ಮಾಡುವ ವ್ಯಕ್ತಿತ್ವ ಅಲ್ಲ.

ಟಾಸ್ಕ್ ಆಗಿತ್ತು

ಅವರ ಈ ಎಲ್ಲಾ ಗುಣಗಳನ್ನ ಅಂಬಿ ನಿಂಗ್​ ವಯಸ್ಸಾಯ್ತು ಸಿನಿಮಾದ ಪಾತ್ರಕ್ಕೆ ಅಳವಡಿಸೋದು ಒಂದು ಟಾಸ್ಕ್ ಆಗಿತ್ತು​​​​. ಇದನ್ನ ಇಡೀ ಚಿತ್ರತಂಡ ಯಶಸ್ವಿಯಾಗಿ ಮಾಡಿದೆ. ತೆರೆಮೇಲೆ ಅವರ ವ್ಯಕ್ತಿತ್ವವನ್ನು ಬಿಂಬಿಸುವ ಪ್ರಯತ್ನ ಮಾಡಿದ್ವಿ. ಬಹುಶಃ ಅವರು ಮಾಡಿರೋ ಪಾತ್ರ, ಅವ್ರ ನಿಜ ಜೀವನಕ್ಕೆ ತುಂಬಾ ಸಾಮ್ಯತೆಯಿಂದ ಕೂಡಿರುವ ಕಾರಣ, ಅವರು ಅಷ್ಟು ಲೀಲಾಜಾಲವಾಗಿ ನಟಿಸಿದ್ದಾರೆ. ಇದು ನಿಮ್ಮನ್ನ ಖುಷಿಯಿಂದ ಥಿಯೇಟರ್​ನಿಂದ ಹೊರಬರುವಂತೆ ಮಾಡ್ತಿದೆ. ಸಿನಿಮಾವನ್ನ ಸುಲಭಯಾಗಿ ಚೆನ್ನಾಗಿ ಮಾಡಿಕೊಟ್ಟ ಅವ್ರ ಡೆಡಿಕೇಷನ್​​​, ಎಫರ್ಟ್ ​​​ಗೆ ನನ್ನ ಸಲ್ಯೂಟ್​.

ಯಾರೂ ಮಿಸ್ ಮಾಡಬೇಡಿ

ಅಂಬಿ ನಿಂಗ್​ ವಯಸ್ಸಾಯ್ತೋ ಸಿನಿಮಾ ಯಾರೂ ಕೂಡ ಮಿಸ್​ ಮಾಡುವಂಥದ್ದಲ್ಲ. ನಾನು ಈ ಸಿನಿಮಾದ ಭಾಗವಾಗಿದ್ದೇನೆ ಅಂತ ಈ ಮಾತನ್ನ ಹೇಳ್ತಾ ಇಲ್ಲ. ಇದರಲ್ಲಿ ನಮ್ಮೆಲ್ಲ ಭಾವನೆಗಳು ಅಡಗಿವೆ.

ಇಂತಿ ನಿಮ್ಮ ಪ್ರೀತಿಯ ಕಿಚ್ಚ ಸುದೀಪ್