ಕಹಿ ಘಟನೆಯನ್ನು ಬಹಿರಂಗ ಪಡಿಸಿದ ನಟಿ ಫ್ಲೋರಾ ಸೈನಿ

2007 ರಲ್ಲಿ ನಡೆದ ಘಟನೆ

''ಆ ಫೋಟೋದಲ್ಲಿ ಇರುವುದು ನಾನೇ. 2007 ರ ವ್ಯಾಲೆಂಟೈನ್ಸ್ ಡೇ ದಿನ ಖ್ಯಾತ ನಿರ್ಮಾಪಕ ಗೌರಂಗ್ ದೋಷಿ ನನ್ನ ಮೇಲೆ ಹಲ್ಲೆ ನಡೆಸಿದ ಮೇಲೆ ತೆಗೆದ ಫೋಟೋ ಅದು. ಅಂದು ಗೌರಂಗ್ ನ ನಾನು ಪ್ರೀತಿಸುತ್ತಿದ್ದೆ. ಒಂದು ವರ್ಷ ನರಕ ಅನುಭವಿಸಿದೆ. ಅವತ್ತೇ ನಾನು ಈ ಘಟನೆ ಬಗ್ಗೆ ಮಾತನಾಡಿದ್ದರೆ, ಯಾರೂ ನನ್ನನ್ನು ನಂಬುತ್ತಿರಲಿಲ್ಲ. ಯಾಕಂದ್ರೆ, ಆತ ಅಷ್ಟು ಪ್ರಭಾವಿ, ನಾನು ಚಿತ್ರರಂಗಕ್ಕೆ ಹೊಸಬಳು'' - ಫ್ಲೋರಾ ಸೈನಿ, ನಟಿ

ಬೆದರಿಕೆ ಹಾಕಿದ್ದ.!

''ನನಗೆ ಸಿನಿಮಾ ಅವಕಾಶಗಳು ಸಿಗದಂತೆ ಮಾಡುವೆ ಎಂದು ಆತ ಅನೇಕ ಬಾರಿ ಬೆದರಿಕೆ ಹಾಕಿದ್ದ. ಕೆಲವು ಸಿನಿಮಾಗಳಲ್ಲಿ ನನ್ನ ಬದಲು ಬೇರೆ ನಟಿಯನ್ನ ಆಯ್ಕೆ ಮಾಡಿದ್ದೂ ಇದೆ. ಯಾರೂ ನನ್ನನ್ನ ಆಡಿಷನ್ ಗೂ ಕರೆಯುತ್ತಿರಲಿಲ್ಲ. ನಾನು ತಪ್ಪು ಮಾಡಿದೆ. ನಾನು ಸುಮ್ಮನೆ ಇರಬೇಕಿತ್ತು ಅಂತ ಎಷ್ಟೋ ಬಾರಿ ಅಂದುಕೊಂಡೆ'' - ಫ್ಲೋರಾ ಸೈನಿ, ನಟಿ

ನನ್ನ ತಪ್ಪಿಲ್ಲ

''ನನ್ನ ತಪ್ಪಿಲ್ಲದೇ ಇದ್ದರೂ ಗೌರಂಗ್ ದೋಷಿಯಿಂದ ನಾನು ದೌರ್ಜನ್ಯಕ್ಕೆ ಒಳಗಾದೆ. ನಾನು ಮಾತ್ರ ಅಲ್ಲ, ನನ್ನ ನಂತರ ಹಲವು ಹುಡುಗಿಯರು ಕೂಡ ಗೌರಂಗ್ ನಿಂದ ಕಿರುಕುಳ ಅನುಭವಿಸಿದರು. ಆದರೆ, ಯಾರೂ ಬಹಿರಂಗ ಪಡಿಸುವ ಧೈರ್ಯ ಹೊಂದಿರಲಿಲ್ಲ'' - ಫ್ಲೋರಾ ಸೈನಿ, ನಟಿ

ನನ್ನ ಸೂಪರ್ ಹೀರೋಗಳು

''ತಮ್ಮ ಮೇಲೆ ಆಗಿರುವ ದೌರ್ಜನ್ಯ, ಕಿರುಕುಳವನ್ನ ಹೊರಹಾಕುತ್ತಿರುವ ಎಲ್ಲಾ ಮಹಿಳೆಯರಿಗಾಗಿ ನಾನು ಈ ಪೋಸ್ಟ್ ಹಾಕುತ್ತಿದ್ದೇನೆ. ದೌರ್ಜನ್ಯ ಎಸಗಿರುವವರು ಮರೆತು ಹೋಗಿರಬಹುದು. ಆದ್ರೆ, ಕಿರುಕುಳ ಅನುಭವಿಸಿದವರಿಗೆ ಅದು ಸಾಧ್ಯವಿಲ್ಲ. ಇಂದು ಧೈರ್ಯದಿಂದ ಮಾತನಾಡುತ್ತಿರುವ ಹೆಣ್ಮಕ್ಕಳೇ ನನ್ನ ಸೂಪರ್ ಹೀರೋಗಳು'' ಅಂತಾರೆ ನಟಿ ಫ್ಲೋರಾ ಸೈನಿ