ಮಾಡೆಲಿಂಗ್ ಕ್ಷೇತ್ರಕ್ಕೆ ಬಲಗಾಲಿಟ್ಟು ಬಂದ ಪ್ರೇಮಾ

'ನಮ್ಮೂರ ಮಂದಾರೆ ಹೂವೆ' ಪ್ರೇಮಾ ಬಹಳ ದಿನಗಳ ಬಳಿಕ ಮತ್ತೆ ಬಣ್ಣ ಹಚ್ಚಿದ್ದಾರೆ. ಆದರೆ ಅವರು ಯಾವುದೇ ಸಿನಿಮಾಗಾಗಿ ಬಣ್ಣ ಹಚ್ಚುತ್ತಿಲ್ಲ, ಬದಲಾಗಿ ಮಾಡೆಲಿಂಗ್ ಕ್ಷೇತ್ರಕ್ಕೆ ಅಡಿಯಿಟ್ಟಿದ್ದಾರೆ. ಹಾಗಂತ ಅವರೇನು ಕ್ಯಾಟ್ ವಾಕ್ ಮಾಡುತ್ತಿಲ್ಲ.

'ಶಿಶಿರ' ಚಿತ್ರದ ಬಳಿಕ ಪ್ರೇಮಾ ಅವರು ಗಾಂಧಿನಗರದಿಂದ ಬಹುತೇಕ ಕಾಣೆಯಾಗಿದ್ದರು. ಆ ಚಿತ್ರದ ಬಳಿಕ ಅವರು ಯಾವ ಚಿತ್ರವನ್ನೂ ಒಪ್ಪಿಕೊಳ್ಳಲಿಲ್ಲ. ಈಗಿನವರಿಗೆ ಕ್ರಿಯಾಶೀಲತೆ ಇಲ್ಲ. ಒಂದೇ ರೀತಿಯ ಕಥೆಗಳನ್ನು ಕೇಳಿಕೇಳಿ ಸಾಕಾಗಿತ್ತು. ನನಗೂ ಬ್ರೇಕ್ ಬೇಕಾಗಿತ್ತು. ಹಾಗಾಗಿ ಯಾವುದೇ ಚಿತ್ರವನ್ನು ಒಪ್ಪಿಕೊಳ್ಳಲಿಲ್ಲ ಎನ್ನುತ್ತಾರೆ ಪ್ರೇಮಾ. [ನಟಿ ಪ್ರೇಮಾ ಮೇಲೆ ಹಾರಾಡಿದ ಗಾಸಿಪ್ ಗೂಬೆ]

ಈ ಮೂಲಕ ಇದೇ ಮೊದಲ ಬಾರಿಗೆ ಅವರು ವಿನ್ಯಾಸಕರೊಬ್ಬರ ಸಂಗ್ರಹಕ್ಕೆ ರಾಯಭಾರಿಯಾಗಿದ್ದಾರೆ. ನಂದಿಬೆಟ್ಟದಲ್ಲಿ ಅವರ ಸಂಗ್ರಹದ ವಸ್ತ್ರಗಳ ಶೂಟಿಂಗ್ ಮಾಡಲಾಗಿದ್ದು, ಮುಂಬೈನಿಂದಲೂ ಮಾಡೆಲ್ ಗಳನ್ನು ಕರೆಸಿ ಚಿತ್ರೀಕರಿಸಿಕೊಳ್ಳಲಾಗಿದೆ.

ನವೀನ ಹಾಗೂ ಸೃಜನಶೀಲ ವಿನ್ಯಾಸದ ವಸ್ತ್ರಗಳೆಂದರೆ ನನಗಿಷ್ಟ ಎನ್ನುವ ಪ್ರೇಮಾ ಅವರಿಗೆ ಗಿರೀಶ್ ಅವರ 'ಸರ್ಗಾ' ಸಂಗ್ರಹನದ ವರ್ಣ ಸಂಯೋಜನೆಗಳು ಸಖತ್ ಇಷ್ಟವಾಗಿವೆಯಂತೆ. ಕುಟುಂಬ ಸಮೇತ ನೋಡುವಂತ ಸಿನಿಮಾ ಮಾಡಬೇಕೆಂಬ ಆಸೆ ಇದೆ ಎನ್ನುವ ಪ್ರೇಮಾ ಅವರು ಸೆಕೆಂಡ್ ಇನ್ನಿಂಗ್ಸ್ ಗಾಗಿ ಕಾಯುತ್ತಿದ್ದಾರೆ.

‘ಓಂ'. ‘ನಮ್ಮೂರ ಮಂದಾರ ಹೂವೇ', ‘ಕನಸುಗಾರ', ‘ಉಪೇಂದ್ರ', ‘ಯಜಮಾನ', ‘ಆಪ್ತಮಿತ್ರ' ಚಿತ್ರಗಳು ಪ್ರೇಮಾ ಅವರಿಗೆ ಸಾಕಷ್ಟು ಹೆಸರನ್ನು ತಂದುಕೊಟ್ಟಂತಹವು. 'ಸರ್ಗಾ' ಸಂಗ್ರಹ ಪ್ರದರ್ಶನ ಇದೇ ಭಾನುವಾರ (ಡಿಸೆಂಬರ್ 21) ಕಲಾರಸ ಆರ್ಟ್ ಗ್ಯಾಲರಿಯಲ್ಲಿ ನಡೆಯಲಿದೆ. ಸ್ಥಳ: ಕಲಾರಸ ಆರ್ಟ್ ಗ್ಯಾಲರಿ, ಹೈ ಸ್ಟ್ರೀಟ್, 6ನೇ ಮಹಡಿ, 11ನೇ ಮುಖ್ಯರಸ್ತೆ, ಜಯನಗರ 4ನೇ ಬ್ಲಾಕ್. ಸಮಯ: ಸಂಜೆ 6.30.