ಆರ್ ಜನ ಹೀರೋಗಳ ಸಿನಿಮಾ ಬಗ್ಗೆ ಬಾಯ್ಬಿಟ್ರು ಪ್ರೇಮ್!

ಆರು ಜನ ಹೀರೋಗಳ ಸಿನಿಮಾ ಮಾಡುತ್ತೇನೆ

ಆರು ಜನ ಹೀರೋಗಳ ಸಿನಿಮಾ ಬಗ್ಗೆ ಮಾತನಾಡಿದ ಪ್ರೇಮ್ ಎಲ್ಲರೂ ಆರು ಜನ ಹೀರೋಗಳ ಸಿನಿಮಾ ಯಾವಾಗ ಮಾಡುತ್ತೀರಿ ಅಂತ ಕೇಳುತ್ತಿದ್ದಾರೆ. ಆ ಸಿನಿಮಾವನ್ನು ಮಾಡಿಯೇ ಮಾಡುತ್ತೇನೆ. ಅದು ನನ್ನ ಕನಸಿನ ಸಿನಿಮಾ. ಕನಸು ಕಾಣುವಾಗ ದೊಡ್ಡದಾಗಿ ಕಾಣಬೇಕು. ಬಳಿಕ ಅದನ್ನು ಸಾಧಿಸಬೇಕು. ಅದೇ ರೀತಿ ನಾನು ಈ ಸಿನಿಮಾವನ್ನು ಮಾಡುತ್ತೇನೆ ಎಂಬ ಭರವಸೆಯನ್ನು ಅಭಿಮಾನಿಗಳಿಗೆ ನೀಡಿದ್ದಾರೆ.

ಇದು 'ಕಲಿ' ಸಿನಿಮಾ

ಪ್ರೇಮ್ ಆರು ಜನ ಹೀರೋಗಳ ಸಿನಿಮಾ ಎಂದಿದ್ದು 'ಕಲಿ' ಚಿತ್ರದ ಬಗ್ಗೆಯಂತೆ. 'ಕಲಿ' ಸಿನಿಮಾದಲ್ಲಿಯೇ ಆರು ಜನ ದೊಡ್ಡ ಸ್ಟಾರ್ ಗಳು ಇರಲಿದ್ದಾರಂತೆ. ಈ ಸಿನಿಮಾ 'ದಿ ವಿಲನ್' ಸಿನಿಮಾಗೆ ಮುಂಚೆ ಮಾಡಬೇಕಿತ್ತು, ಆದರೆ, ಸ್ಟಾರ್ ಗಳ ಡೇಟ್ ಸಮಸ್ಯೆಯಿಂದ ಮುಂದಕ್ಕೆ ಹೋಯ್ತು ಎಂದು ಪ್ರೇಮ್ ತಿಳಿಸಿದ್ದಾರೆ.

'ಕಲಿ' ಲೇಟ್ ಆಗಿದ್ದಕ್ಕೆ 'ದಿ ವಿಲನ್' ಆರಂಭ

'ಕಲಿ' ಸಿನಿಮಾ ಲೇಟ್ ಆಗುತ್ತದೆ ಎನ್ನುವ ಕಾರಣಕ್ಕೆ ಕನ್ನಡದ ಇಬ್ಬರು ನಟರನ್ನು ಇಟ್ಟುಕೊಂಡು 'ದಿ ವಿಲನ್' ಸಿನಿಮಾವನ್ನು ಆರಂಭ ಮಾಡಿದ್ದರಂತೆ. ಮುಂದೆ 'ಕಲಿ' ಸಿನಿಮಾ ಕೂಡ ಪ್ರೇಮ್ ಹಾಗೂ ಸಿ ಆರ್ ಮನೋಹರ್ ಅವರ ಕಾಂಬಿನೇಶನ್ ನಲ್ಲಿ ಬರಲಿದೆಯಂತೆ.

ರಜನಿ, ಕಮಲ್ ಭೇಟಿ

ದಕ್ಷಿಣ ಭಾರತದ ಬಿಗ್ ಸ್ಟಾರ್ ಗಳು 'ಕಲಿ' ಚಿತ್ರದಲ್ಲಿ ಇರಲಿದ್ದು, ಈ ಚಿತ್ರದ ಬಗ್ಗೆ ರಜನಿಕಾಂತ್ ಹಾಗೂ ಕಮಲ್ ಹಾಸನ್ ಜೊತೆಗೆ ಮಾತುಕತೆ ಸಹ ನಡೆಸಿದ್ದಾರಂತೆ. ಮಹಾಭಾರತದ ಸ್ಫೂರ್ತಿ ಪಡೆದು ಈ ಸಿನಿಮಾ ಮಾಡುತ್ತಿದ್ದು, ಎರಡು ಪಾತ್ರಗಳ ಸುತ್ತ ಆರು ಪಾತ್ರಗಳು ಸುತ್ತುತ್ತದೆಯಂತೆ. ಆ ಪಾತ್ರಗಳಲ್ಲಿ ಆರು ಜನ ದೊಡ್ಡ ನಟರು ನಟಿಸಲಿದ್ದಾರೆ ಎಂದಿದ್ದಾರೆ ಪ್ರೇಮ್.

2020 ಕ್ಕೆ ಶುರು ಆಗಬಹುದು

'ಕಲಿ' ಸಿನಿಮಾದ ಪ್ಲಾನಿಂಗ್ ಸದ್ಯ ನಡೆಯುತ್ತಿದೆಯಂತೆ. ತುಂಬ ಪಾತ್ರಗಳು ಈ ಚಿತ್ರದಲ್ಲಿ ಬರಲಿದ್ದು, ಎಲ್ಲ ನಟರನ್ನು ಸೇರಿಸುವುದು ದೊಡ್ಡ ಚಾಲೆಂಜ್ ಆಗಿದೆಯಂತೆ. ಸದ್ಯಕ್ಕೆ, ಪತ್ನಿ ರಕ್ಷಿತ ಸಹೋದರನನ್ನು ಲಾಂಚ್ ಮಾಡುವ ತಯಾರಿ ನಡೆಯುತ್ತಿದ್ದು, ಆ ಚಿತ್ರದ ಬಳಿಕ ಅಂದರೆ, 2020ರ ವೇಳೆಗೆ 'ಕಲಿ' ಪ್ರಾರಂಭ ಆಗಬಹುದಂತೆ.