'ಮುತ್ತಣ್ಣ'ನಾಗಿ ಮತ್ತೆ ಚಿತ್ರಮಂದಿರಕ್ಕೆ ಬರ್ತಾರೆ ಶಿವಣ್ಣ

ಕೆಲವು ಸಿನಿಮಾಗಳು ಹಾಗೆ, ಕಾಲಗಳು ಉರುಳಿದರು ನೆನಪು ಮಾತ್ರ ಮಾಸಲ್ಲ. ಹಾಗಾಗಿಯೇ ಈ ಚಿತ್ರಗಳಿಗೆ ಹೊಸ ತಂತ್ರಜ್ಞಾನವನ್ನ ಅಳವಡಿಸಿ ಮತ್ತೆ ಮತ್ತೆ ತೆರೆಮೇಲೆ ತರಲಾಗುತ್ತೆ. ಇಂತಹ ಚಿತ್ರಗಳಲ್ಲಿ ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅಭಿನಯದ 'ಮುತ್ತಣ್ಣ' ಚಿತ್ರವೂ ಒಂದು.

90ರ ದಶಕದಲ್ಲಿ ಬಿಡುಗಡೆಯಾಗಿದ್ದ ಸೂಪರ್ ಹಿಟ್ ಚಿತ್ರ 'ಮುತ್ತಣ್ಣ' ಮತ್ತೆ ತೆರೆ ಮೇಲೆ ಬರಲಿದೆಯಂತೆ. 7.1 ಡಿಜಿಟಲ್ ಸೌಂಡ್, 4k HD ತಂತ್ರಜ್ಞಾನದೊಂದಿಗೆ ಮತ್ತೊಮ್ಮೆ ಬೆಳ್ಳಿತೆರೆಯಲ್ಲಿ ರಾರಾಜಿಸಲಿದೆ.

1994 ರಲ್ಲಿ ತೆರೆಕಂಡಿದ್ದ 'ಮುತ್ತಣ್ಣ' ಭರ್ಜರಿ ಯಶಸ್ಸು ಕಂಡಿತ್ತು. ಸೆಂಚುರಿಸ್ಟಾರ್ ಶಿವರಾಜ್ ಕುಮಾರ್ ಈ ಚಿತ್ರದಲ್ಲಿ ದ್ವಿಪಾತ್ರದಲ್ಲಿ ಅಭಿನಯಿಸಿದ್ದರು. ಎಂ.ಎಸ್.ರಾಜಶೇಖರ್ ಈ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದು, ಸೋಮಣ್ಣಗೌಡ ನಿರ್ಮಾಣ ಮಾಡಿದ್ದರು. ಹಂಸಲೇಖ ಅವರು ಮಧುರವಾದ ಸಂಗೀತ ಈ ಚಿತ್ರಕ್ಕಿತ್ತು.

ಉಳಿದಂತೆ ಚಿತ್ರದಲ್ಲಿ ಸುಪ್ರಿಯಾ, ಸ್ನೇಹ, ಶಶಿಕುಮಾರ್, ದೊಡ್ಡಣ್ಣ, ಸತ್ಯಜಿತ್, ಭವ್ಯಶ್ರೀ. ತೂಗುದೀಪ್ ಶ್ರೀನಿವಾಸ್, ಸೇರಿದಂತೆ ಹಲವರು ಕಾಣಿಸಿಕೊಂಡಿದ್ದರು. ಇನ್ನು ವಿಶೇಷ ಅಂದ್ರೆ ಶಿವರಾಜ್ ಕುಮಾರ್ ಅವರ ಮಗಳು ನಿರುಪಮಾ ಅವರು ಬಾಲನಟಿ ಆಗಿ ಅಭಿನಯಿಸಿದ್ದರು. ಈಗಾಗಲೇ ಮರು ಬಿಡುಗಡೆಯಾಗಲು ಸಿದ್ದವಾಗುತ್ತಿರುವ 'ಮುತ್ತಣ್ಣ' ಆಗಸ್ಟ್ ತಿಂಗಳಲ್ಲಿ ಗಾಂಧಿನಗರಕ್ಕೆ ಕಾಲಿಡಲಿದೆಯಂತೆ.