ಕನ್ನಡದಲ್ಲಿ 'ಡಿಯರ್ ಕಾಮ್ರೇಡ್' ರಿಲೀಸ್ ಆಗಿದ್ದು ಐದೇ ಚಿತ್ರಮಂದಿರದಲ್ಲಿ.!

200ಕ್ಕೂ ಅಧಿಕ ಸ್ಕ್ರೀನ್ ನಲ್ಲಿ ಕಾಮ್ರೇಡ್

ಡಿಯರ್ ಕಾಮ್ರೇಡ್ ಸಿನಿಮಾ ತೆಲುಗು, ತಮಿಳು, ಮಲಯಾಳಂ ಮತ್ತು ಕನ್ನಡದಲ್ಲೂ ಬಂದಿದೆ. ಕರ್ನಾಟಕದಲ್ಲಿ ಡಿಯರ್ ಕಾಮ್ರೇಡ್ ಚಿತ್ರವನ್ನ ಕನ್ನಡಕ್ಕಿಂತ ತೆಲುಗಿನಲ್ಲಿ ಹೆಚ್ಚು ರಿಲೀಸ್ ಮಾಡಲಾಗಿದೆ. ಹಾಗಿದ್ರೆ, ಕನ್ನಡದಲ್ಲಿ ಈ ಸಿನಿಮಾ ಯಾಕೆ ಡಬ್ ಮಾಡಿದ್ರು. ಸುಮ್ಮನೇ ತೆಲುಗಿನಲ್ಲಿ ಬಂದಿದ್ರೆ ಸಾಕಿತ್ತು. ಎಲ್ಲರೂ ಅದನ್ನೇ ನೋಡಿಕೊಳ್ಳುತ್ತಿದ್ದರು ಅಲ್ವಾ?

ಕನ್ನಡದ ಕಾಮ್ರೇಡ್ ಕೇವಲ 5 ಚಿತ್ರಮಂದಿರದಲ್ಲಿ.!

ಕನ್ನಡ ಭಾಷೆಯಲ್ಲಿ ಡಿಯರ್ ಕಾಮ್ರೇಡ್ ಸಿನಿಮಾ ಕರ್ನಾಟಕದಲ್ಲಿ ರಿಲೀಸ್ ಆಗಿರುವುದು ಕೇವಲ 5 ಚಿತ್ರಮಂದಿರದಲ್ಲಿ. 200 ಸ್ಕ್ರೀನ್ ನಲ್ಲಿ ತೆಲುಗು 5 ಚಿತ್ರಮಂದಿರದಲ್ಲಿ ಕನ್ನಡ. ಪೀಣ್ಯದ ಭಾರತಿ ಚಿತ್ರಮಂದಿರ (ಒಂದು ಶೋ), ಬನಶಂಕರಿಯ ಕಾಮಾಕ್ಯ (ಎರಡು ಶೋ), ಜಿಗಿಣಿಯ ನಂದೀಶ್ವರ (ಒಂದು ಶೋ), ಕೆಂಗೇರಿಯ ವೆಂಕಟೇಶ್ವರ (ಎರಡು ಶೋ) ಹಾಗೂ ಸಿಂಗಾಪುರದ ವೈನಿಧಿ (ಒಂದು ಶೋ) ಚಿತ್ರದಲ್ಲಿ ಕನ್ನಡ ಭಾಷೆಯಲ್ಲಿ ಕಾಮ್ರೇಡ್ ಪ್ರದರ್ಶನವಾಗ್ತಿದೆ.

ಕನ್ನಡದಲ್ಲಿ ನೋಡೋರು ಕಮ್ಮಿ ಅಂತಾನಾ?

ಕನ್ನಡ ಭಾಷೆಯಲ್ಲಿ ಸಿನಿಮಾ ನೋಡಲು ಜನ ಆಸಕ್ತಿ ತೋರುವುದಿಲ್ಲ, ಮೂಲ ಭಾಷೆಯಲ್ಲೇ ಚಿತ್ರ ವೀಕ್ಷಿಸಲು ಜನರು ಇಷ್ಟ ಪಡ್ತಾರೆ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ. ಆದರೆ, ಜನರು ನೋಡಬೇಕು ಎನಿಸಿದರೂ ಯಾವುದೋ ಒಂದೊಂದು ಚಿತ್ರಮಂದಿರದಲ್ಲಿ ಒಂದೊಂದು ಶೋ ಇದ್ದರೇ ಹೇಗೆ ನೋಡಲು ಸಾಧ್ಯ ಎಂಬುದನ್ನ ಯೋಚಿಸಬೇಕಾಗಿದೆ.

ಬಹುಶಃ ಹೀಗೆ ಮಾಡೋದು ಉತ್ತಮ

ಬೇರೆ ಭಾಷೆಯ ಚಿತ್ರಗಳನ್ನ ರೀಮೇಕ್ ಮಾಡುವ ಸಂಪ್ರದಾಯವಿದೆ. ಒಂದು ವೇಳೆ ಡಬ್ಬಿಂಗ್ ಮಾಡಿದ್ರೆ ರೀಮೇಕ್ ಮಾಡೋ ಟ್ರೆಂಡ್ ಕಮ್ಮಿಯಾಗಬಹುದು. ಡಬ್ಬಿಂಗ್ ಮಾಡಿ ರಿಲೀಸ್ ಮಾಡಿದ್ರೆ ಮೂಲ ಭಾಷೆಯ ಚಿತ್ರವನ್ನ ಕಡಿಮೆ ಚಿತ್ರಮಂದಿರಲ್ಲಿ ಬಿಡುಗಡೆ ಮಾಡಬೇಕು. ಅದರಿಂದ ಡಬ್ಬಿಂಗ್ ಚಿತ್ರಗಳನ್ನ ನೋಡುವ ಸಂಖ್ಯೆ ಹೆಚ್ಚಾಗಬಹುದು. ಡಬ್ಬಿಂಗ್ ಮಾಡಿ, ಮೂಲ ಸಿನಿಮಾವನ್ನು ಹೆಚ್ಚು ಚಿತ್ರಮಂದಿರದಲ್ಲಿ ಬಿಟ್ಟಾಗ ಅಥವಾ ಅದೂ ಬೇಕು, ಇದೂ ಬೇಕುಅಂದಾಗ ಸಮಸ್ಯೆಯಾಗುವುದು ಕನ್ನಡ ಚಿತ್ರಗಳಿಗೆ ಮಾತ್ರವೇ.