ವರಹ ರೂಪಂ ಮಾತ್ರವಲ್ಲ ಕಾಂತಾರದ 'ಸಿಂಗಾರ ಸಿರಿಯೇ' ಕೂಡ ಕದ್ದ ಮಾಲು ಎಂದ ನೆಟ್ಟಿಗರು!

ಅಪ್ಸರ ಆಲಿಯ ಕಾಪಿಯೇ ಸಿಂಗಾರ ಸಿರಿಯೇ ಎಂದ ನೆಟ್ಟಿಗರು

ಕೆಲ ನೆಟ್ಟಿಗರು ಕಾಂತಾರ ಚಿತ್ರದ ಸಿಂಗಾರ ಸಿರಿಯೇ ಟ್ಯೂನ್ ಅಪ್ಸರ್ ಆಲಿ ಹಾಡಿನ ಕಾಪಿ ಎನ್ನುತ್ತಿದ್ದಾರೆ. ಈ ಹಾಡಿನಲ್ಲಿ ಬರುವ ಮುದ್ದಾದ ಮಾಯಾವಿ ಸಾಲಿನ ಟ್ಯೂನ್ ಅನ್ನು ಮರಾಠಿಯ ನಟರಂಗ್ ಚಿತ್ರದ ಹಿಟ್ ಹಾಡು 'ಅಪ್ಸರ ಆಲಿ'ಯಿಂದ ಸಂಗೀತ ನಿರ್ದೇಶಕ ಅಜನೀಶ್ ಲೋಕನಾಥ್ ಕದ್ದಿದ್ದಾರೆ ಎಂದು ನೆಟ್ಟಿಗರು ಆರೋಪಿಸಿದ್ದಾರೆ. ಅಪ್ಸರ ಆಲಿ ಹಾಡು 2010ರಲ್ಲಿ ತೆರೆಕಂಡ ನಟರಂಗ್ ಚಿತ್ರದ ಹಾಡಾಗಿದ್ದು, ಈ ಹಾಡಿಗೆ ಅಜಯ್-ಅಟುಲ್ ಸಂಗೀತ ಸಂಯೋಜನೆ ಮಾಡಿದ್ದಾರೆ.

ಸಾಮ್ಯತೆ ಕಡಿಮೆ!

ಇನ್ನು ನೆಟ್ಟಿಗರು ಆರೋಪಿಸುತ್ತಿರುವ ಹಾಗೆ ಸಿಂಗಾರ ಸಿರಿಯೇ ಹಾಡನ್ನು ಅಪ್ಸರ ಆಲಿ ಹಾಡಿನಿಂದ ಕದ್ದು ಮಾಡಲಾಗಿದೆ ಎಂದು ಹೇಳುವುದು ಕಷ್ಟ. ಏಕೆಂದರೆ ಎರಡೂ ಹಾಡುಗಳ ಟ್ಯೂನ್‌ಗೂ ದೊಡ್ಡ ಮಟ್ಟದ ವ್ಯತ್ಯಾಸವಿದೆ. ಆದರೆ ಹಾಡಿನ 'ಮುದ್ದಾದ ಮಾಯಾವಿ' ಸಾಲಿನ ಟ್ಯೂನ್ ಅಪ್ಸರ ಆಲಿಯ ಹಾಡಿನ ಟ್ಯೂನ್‌ಗೂ ಸಾಮ್ಯತೆ ಇದ್ದು ಈ ಒಂದು ಕಾರಣದಿಂದ ನೆಟ್ಟಿಗರು ಹಾಡು ಕಾಪಿ ಎನ್ನುತ್ತಿದ್ದಾರೆ.

ವರಹ ರೂಪಂ ಕಾಪಿ ಎಂಬ ಆರೋಪ ತಳ್ಳಿ ಹಾಕಿದ ಅಜನೀಶ್

ಇನ್ನು ಕನ್ನಡ ಫಿಲ್ಮಿಬೀಟ್ ಜತೆ ಮಾತನಾಡಿದ ಕಾಂತಾರ ಚಿತ್ರದ ಸಂಗೀತ ನಿರ್ದೇಶಕ ಅಜನೀಶ್ ಲೋಕನಾಥ್ "ವರಹ ರೂಪಂ ಹಾಗೂ ನವರಸಂ. ಎರಡೂ ಹಾಡುಗಳ ಸಂಯೋಜನೆ ಬೇರೆ ಬೇರೆ. ಆ ರಾಕ್‌ಬ್ಯಾಂಡ್ ಸ್ಟೈಲ್‌ನಿಂದ ಇನ್‌ಸ್ಪೈರ್ ಆಗಿದ್ದೀವಿ. ಆದರೆ ಆದರೆ ನಮ್ಮ ಹಾಡಿನ ಸಂಯೋಜನೆಯೇ ಬೇರೆ. ಸ್ಟೈಲ್ ವಿಚಾರದಲ್ಲಿ 'ವರಹ ರೂಪಂ' ಸಾಂಗ್‌ ಕೇಳಿ ಇನ್‌ಸ್ಪೈರ್ ಆಗಿರೋದು ನಿಜ. ಅದು ಯಾವ ರೀತಿ ಅಂದರೆ ಬರೀ ಸ್ಟೈಲ್‌. ಅದು ಬಿಟ್ಟು ಅದಕ್ಕು ಇದಕ್ಕೂ ಯಾವುದೇ ಸಂಬಂಧ ಇಲ್ಲ." ಎಂದು ಹೇಳಿಕೆ ನೀಡುವ ಮೂಲಕ ವರಹ ರೂಪಂ ಕಾಪಿ ಎನ್ನುವ ಆರೋಪವನ್ನು ತಳ್ಳಿಹಾಕಿದ್ದರು.