KGF Vs 'ಕಾಂತಾರ'.. ತಮಿಳು ಪ್ರೇಕ್ಷಕರು ಏನಂದ್ರು? ಹೊರರಾಜ್ಯಗಳಲ್ಲಿ 'ಕಾಂತಾರ' ಕ್ರೇಜ್ ಹೇಗಿದೆ?

KGF Vs 'ಕಾಂತಾರ'

ಪ್ರಶಾಂತ್ ನೀಲ್ ನಿರ್ದೇಶನದ KGF ಸಿನಿಮಾ ಸೃಷ್ಟಿಸಿದ ಸಂಚಲನ ಹೇಗಿತ್ತು ಎನ್ನುವುದನ್ನು ಬಿಡಿಸಿ ಹೇಳುವುದು ಬೇಕಾಗಿಲ್ಲ. ರಾಕಿಂಗ್ ಸ್ಟಾರ್ ಯಶ್ ರಾಕಿಭಾಯ್ ಆಗಿ ನ್ಯಾಷನಲ್‌ ಸ್ಟಾರ್ ಪಟ್ಟಕ್ಕೇರಿದ್ದು ಗೊತ್ತೇಯಿದೆ. ಹೊರರಾಜ್ಯಗಳಲ್ಲೂ ಚಿತ್ರಕ್ಕೆ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿತ್ತು. KGF Vs 'ಕಾಂತಾರ' ಎನ್ನುವ ಪ್ರಶ್ನೆಗೆ KGF ಕ್ಲಾಸ್, 'ಕಾಂತಾರ' ಕ್ಲಾಸ್ ಜೊತೆಗೆ ಮಾಸ್ ಎನ್ನುವ ಉತ್ತರ ಬರ್ತಿದೆ. 'ಕಾಂತಾರ' ಚಿತ್ರದ ಕಂಟೆಂಟ್ ಹಾಗೂ ಕನ್ನಡ ಕಲ್ಚರ್‌ನ ತೋರಿಸಿರುವ ಪರಿ ಚೆನ್ನಾಗಿದೆ, ರಿಷಬ್ ಶೆಟ್ಟಿ ನಿರ್ದೇಶನ, ನಟನೆ ಸೂಪರ್ ಎಂದು ಕೊಂಡಾಡುತ್ತಿದ್ದಾರೆ.

ಟ್ರೈಲರ್ ನೋಡಿ ಸಿನಿಮಾ ನೋಡಲು ಬಂದೆ!

ಸೆಪ್ಟೆಂಬರ್ 5ಕ್ಕೆ ರಿಲೀಸ್ ಆಗಿದ್ದ 'ಕಾಂತಾರ' ಟ್ರೈಲರ್ ಧೂಳೆಬ್ಬಿಸಿತ್ತು. ಎರಡೂವರೆ ನಿಮಿಷದ ಸ್ಯಾಂಪಲ್ ನೋಡಿದವರು ಥ್ರಿಲ್ಲಾಗಿದ್ದರು. ಪರಭಾಷಿಕರು ಕೂಡ ಟ್ರೈಲರ್‌ಗೆ ಮೆಚ್ಚುಗೆ ಸೂಚಿಸಿದರು. ಬರೀ ಟ್ರೈಲರ್ ನೋಡಿ 'ಕಾಂತಾರ' ಸಿನಿಮಾ ನೋಡಲು ಥಿಯೇಟರ್‌ಗೆ ಬಂದಿದ್ದಾಗಿ ಕೆಲ ತಮಿಳು ಪ್ರೇಕ್ಷಕರು ಹೇಳುತ್ತಿದ್ದಾರೆ. ಒಂದು ಚಿತ್ರದ ನಿಜವಾದ ಸಕ್ಸಸ್ ಇದೇ ಅಲ್ಲವೇ.

ಹೊರರಾಜ್ಯಗಳಲ್ಲೂ ಹೆಚ್ಚಾಯ್ತು ಶೋಗಳು

ಡಿಮ್ಯಾಂಡ್ ನೋಡಿ ಎರಡನೇ ದಿನಕ್ಕೆ 'ಕಾಂತಾರ' ಚಿತ್ರದ 100 ಶೋಗಳನ್ನು ಹೆಚ್ಚಿಸಲಾಗಿತ್ತು. ಬರೀ ಕರ್ನಾಟಕ ಅಲ್ಲ, ಹೊರ ರಾಜ್ಯಗಳಲ್ಲೂ ಶೋಗಳ ಸಂಖ್ಯೆ ನಿಧಾನವಾಗಿ ಹೆಚ್ಚಾಗುತ್ತಿದೆ. ದೆಹಲಿಯಲ್ಲಿ ಶೋ ಹೆಚ್ಚಿಸಲು ಬೇಡಿಕೆ ಶುರುವಾಗಿದೆ. ಹೈದರಾಬಾದ್‌ನಲ್ಲಿ ರಿಲೀಸ್‌ ಆದ ದಿನ ಒಂದು ಶೋ ಇದ್ದ ಕಡೆ ಈಗ 4 ಶೋಗಳು ಪ್ರದರ್ಶನವಾಗುತ್ತಿದೆ. ಮತ್ತೊಂದ್ಕಡೆ ಪರಭಾಷಾ ವಿತರಕರು ಸಿನಿಮಾ ಡಬ್ ಮಾಡಿ ಕೊಡುವಂತೆ ಕೇಳುತ್ತಿರುವುದಾಗಿ ಸ್ವತಃ ರಿಷಬ್ ಶೆಟ್ಟಿ ಹೇಳಿದ್ದಾರೆ. ಈ ಬಗ್ಗೆ ಚಿತ್ರತಂಡ ಚಿಂತನೆ ನಡೆಸ್ತಿದೆ.

25 ಕೋಟಿ ಗಡಿ ದಾಟಿದ ಕಲೆಕ್ಷನ್

ಸತತ 5 ದಿನಗಳಿಂದ 'ಕಾಂತಾರ' ಸಿನಿಮಾ ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಿದೆ. ಶನಿವಾರಕ್ಕೆ ಹೋಲಿಸಿದರೆ ಸೋಮವಾರ, ಮಂಗಳವಾರ ಕಲೆಕ್ಷನ್ ಹೆಚ್ಚಾಗಿದೆ. ಅಂದಾಜು 16 ಕೋಟಿ ಬಜೆಟ್‌ನಲ್ಲಿ ನಿರ್ಮಾಣವಾಗಿದ್ದ ಸಿನಿಮಾ ಈಗ 25 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿ ಮುನ್ನುಗ್ಗುತ್ತಿದೆ. ಚಿತ್ರತಂಡ ಮಂಗಳೂರಿಗೆ ಭೇಟಿ ಕೊಟ್ಟು ಪ್ರೇಕ್ಷಕರಿಗೆ ಧನ್ಯವಾದ ತಿಳಿಸಿದೆ. ಈ ವರ್ಷದ ಮತ್ತೊಂದು ಬ್ಲಾಕ್‌ಬಸ್ಟರ್ ಹಿಟ್ ಆಗಿ 'ಕಾಂತಾರ' ಹೊರಹೊಮ್ಮಿದೆ.