'ನೀರ್ ದೋಸೆ'ಗೆ ಬಂಪರ್ ಹೊಡೆದ್ಹಾಗೆ 'ಮುಂಗಾರು ಮಳೆ-2'ಗಾಗೋದು ಡೌಟು!

'ಕರ್ನಾಟಕ ಬಂದ್' ಯಾಕೆ?

ಮುಂದಿನ ಹತ್ತು ದಿನಗಳ ಅವಧಿಯಲ್ಲಿ ಪ್ರತಿದಿನ 15 ಸಾವಿರ ಕ್ಯೂಸೆಕ್ಸ್ ನೀರನ್ನು ತಮಿಳುನಾಡಿಗೆ ಹರಿಸಬೇಕು ಎಂದು ಸುಪ್ರೀಂ ಕೋರ್ಟ್ ಆದೇಶ ನೀಡಿರುವ ಹಿನ್ನಲೆಯಲ್ಲಿ ವಿವಿಧ ಕನ್ನಡ ಪರ ಸಂಘಟನೆಗಳು ಸೆಪ್ಟೆಂಬರ್ 9 ರಂದು (ಶುಕ್ರವಾರ) ಕರ್ನಾಟಕ ಬಂದ್ ಗೆ ಕರೆ ನೀಡಿವೆ. [ಕಾವೇರಿ ವಿವಾದ : ಸೆಪ್ಟೆಂಬರ್ 9ರಂದು ಕರ್ನಾಟಕ ಬಂದ್]

ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಬೆಂಬಲ

ಕನ್ನಡ ಪರ ಹೋರಾಟಗಾರ ವಾಟಾಳ್ ನಾಗರಾಜ್ ಸೇರಿದಂತೆ ಕನ್ನಡ ಸಂಘಟನೆಗಳು ಕರೆ ನೀಡಿರುವ 'ಕರ್ನಾಟಕ ಬಂದ್'ಗೆ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಸಾ.ರಾ.ಗೋವಿಂದು ಕೂಡ ಬೆಂಬಲ ನೀಡಿದ್ದಾರೆ.

ಸೆಪ್ಟೆಂಬರ್ 9 ರಂದು ಚಿತ್ರೋದ್ಯಮ ಬಂದ್?

ಕರ್ನಾಟಕ ಬಂದ್ ಪರಿಣಾಮ ಸೆಪ್ಟೆಂಬರ್ 9 ರಂದು ಕನ್ನಡ ಚಿತ್ರೋದ್ಯಮದ ಎಲ್ಲಾ ಕಾರ್ಯ ಚಟುವಟಿಕೆಗಳು ಬಂದ್ ಆಗುವ ಸಾಧ್ಯತೆ ಇದೆ.

ಶೂಟಿಂಗ್ ಇಲ್ಲ, ರಿಲೀಸ್ ಕೂಡ ಇಲ್ಲ.!

ಬಂದ್ ನಿಂದಾಗಿ ಸೆಪ್ಟೆಂಬರ್ 9 ರಂದು ಯಾವುದೇ ಚಿತ್ರದ ಶೂಟಿಂಗ್ ನಡೆಯುವುದಿಲ್ಲ. ಹಾಗೆ, ಯಾವ ಚಿತ್ರ ಕೂಡ ಬಿಡುಗಡೆ ಆಗಲ್ಲ ಅಂತ ಹೇಳಲಾಗಿದೆ.

'ಮುಂಗಾರು ಮಳೆ-2' ಗತಿ ಏನು?

ಸ್ಯಾಂಡಲ್ ವುಡ್ ಅಂಗಳದಲ್ಲಿ ಭಾರಿ ಕುತೂಹಲ ಮೂಡಿಸಿರುವ 'ಮುಂಗಾರು ಮಳೆ-2' ಚಿತ್ರದ ಬಿಡುಗಡೆ ದಿನಾಂಕ ಸೆಪ್ಟೆಂಬರ್ 9 ರಂದು ನಿಗದಿ ಆಗಿದೆ. ಆದ್ರೀಗ, 'ಮುಂಗಾರು ಮಳೆ-2' ಈ ಶುಕ್ರವಾರ ಬಿಡುಗಡೆ ಆಗುವುದು ಬಹುತೇಕ ಅನುಮಾನ.

ನಾಡು, ನುಡಿ, ಜಲ ಅಂದ್ರೆ ಎಲ್ಲರೂ ಒಂದಾಗ್ತಾರೆ.!

ನಾಡು, ನುಡಿ, ಜಲ ವಿಷಯದಲ್ಲಿ ಕನ್ನಡ ಚಿತ್ರರಂಗ ಎಂದೂ ನಿರ್ಲಕ್ಷ್ಯ ತೋರಿಲ್ಲ. ಕಾವೇರಿ ನದಿ ನೀರು ಹಂಚಿಕೆ ವಿವಾದಕ್ಕೆ ಸಂಬಂಧಿಸಿದಂತೆ 'ಕರ್ನಾಟಕ ಬಂದ್'ಗೆ ಕರೆ ನೀಡಿರುವುದರಿಂದ 'ಮುಂಗಾರು ಮಳೆ-2' ಚಿತ್ರತಂಡ ಕೂಡ ಬಂದ್ ಗೆ ಕೈ ಜೋಡಿಸುವುದರಲ್ಲಿ ಡೌಟ್ ಬೇಡ.

ಹಾಗಾದ್ರೆ ಚಿತ್ರ ಬಿಡುಗಡೆ ಯಾವಾಗ?

ಸಾಮಾನ್ಯವಾಗಿ ಚಿತ್ರಗಳು ತೆರೆ ಕಾಣುವುದು ಶುಕ್ರವಾರ ಅಥವಾ ಗುರುವಾರ. ಈಗಾಗಲೇ 'ಮುಂಗಾರು ಮಳೆ-2' ಚಿತ್ರ ಬಿಡುಗಡೆ ಶುಕ್ರವಾರ ಅಂತ ಅನೌನ್ಸ್ ಆಗಿರುವ ಕಾರಣ ಗುರುವಾರ ಥಿಯೇಟರ್ ಸಿಗಲ್ಲ. ಹೀಗಾಗಿ ಶನಿವಾರ ಬಿಡುಗಡೆ ಆಗುವ ಸಾಧ್ಯತೆ ಇದೆ.

'ಗೋಲಿಸೋಡ' ಚಿತ್ರ ಕೂಡ ಲಿಸ್ಟ್ ನಲ್ಲಿದೆ.!

ಗಾಂಧಿನಗರದ ಅಂಗಳದಲ್ಲಿ ಸದ್ದು ಮಾಡಿರುವ ಹೊಸಬರ ಸಿನಿಮಾ 'ಗೋಲಿಸೋಡ' ಚಿತ್ರ ಕೂಡ ಸೆಪ್ಟೆಂಬರ್ 9 ರಂದು ರಿಲೀಸ್ ಆಗ್ಬೇಕಿತ್ತು. ಈಗ ಆ ಚಿತ್ರ ಕೂಡ ಶನಿವಾರ ಬಿಡುಗಡೆ ಆಗ್ಬಹುದು.

ಸಂಜೆ ವೇಳೆ ಸಂಪೂರ್ಣ ಚಿತ್ರಣ

ಸೆಪ್ಟೆಂಬರ್ 9 ರಂದು ನಡೆಸಲು ಕರೆ ನೀಡಿರುವ 'ಕರ್ನಾಟಕ ಬಂದ್'ನಲ್ಲಿ ಕನ್ನಡ ಚಿತ್ರೋದ್ಯಮದ ಕಾರ್ಯ ಚಟುವಟಿಕೆಗಳ ಕುರಿತು ಇಂದು (ಸೆಪ್ಟೆಂಬರ್ 6) ಸಂಜೆ ಹೊತ್ತಿಗೆ ಕ್ಲಾರಿಟಿ ಸಿಗಲಿದೆ.