"ಅಣ್ಣಾವ್ರ ಕುಟುಂಬ ಇರೋದು ಉರಿಸೋಕೆ ಅಲ್ಲ.. ಉಳಿಸೋಕೆ, ಬೆಳೆಸೋಕೆ" ಕರವೇ ಶಿವರಾಮೇಗೌಡ!

'ಉರಿಸೋಕೆ ಬರೋರು ಸುಟ್ಟು ಭಸ್ಮ ಆಗುತ್ತಾರೆ'

"ರಾಜ್‌ಕುಮಾರ್ ಅವರ ಕುಟುಂಬದ ಮೇಲೆ ತೇಜೋವಧೆ ಮಾಡಿದ್ರೆ, ದೊಡ್ಡರಾಗಿಬಿಡ್ತೀನಿ ಅಂದ್ಕೊಂಡ್ರಾ? ಭ್ರಮೆಯೊಳಗೆ ಬದುಕುತ್ತೀರಾ ನೀವೆಲ್ಲ, ಸರ್ವನಾಶ ಆಗಿಬಿಡುತ್ತೀರ. ಕೊನೆಯದಾಗಿ ಹೇಳ್ತೀನಿ ಕೇಳಿ, ಅಣ್ಣಾವ್ರ ಕುಟುಂಬ ಇರೋದು ಉರಿಸೋಕೆ ಅಲ್ಲ. ಉಳಿಸೋಕೆ ಬೆಳೆಸೋಕೆ. ಯಾರು ಉರಿಸೋಕೆ ಬರುತ್ತಾರೆ, ಅವರು ಸುಟ್ಟು ಭಸ್ಮ ಆಗುತ್ತಾರೆ. ಅಣ್ಣಾವ್ರನ್ನು ಟಚ್ ಮಾಡೋಕೆ ಹೋದವರು ಏನೇನಾಗಿದ್ದಾರೆ ಅನ್ನೋದನ್ನು ಊಹಿಸಿಕೊಳ್ಳಿ ಸಾಕು." ಎಂದು ಶಿವರಾಮೇ ಗೌಡ ಕಿಡಿಕಾರಿದ್ದಾರೆ.

'ರಾಜ್‌ಕುಮಾರ್ ಭಕ್ತರು ಅಂತ ಮಾತಾಡುತ್ತಿಲ್ಲ'

"ಅಣ್ಣಾವ್ರ ಕುಟುಂಬ ಅಂದ್ರೆ ಉತ್ಪ್ರೇಕ್ಷಗೆ ರಾಜ್‌ಕುಮಾರ್ ಭಕ್ತರು ಅಂತ ಮಾತಾಡುತ್ತಿಲ್ಲ. ನಾನು ಯಾವತ್ತೂ ಯಾವ ಅಭಿಮಾನಿ ಸಂಘದಲ್ಲೂ ಗುರುತಿಸಿಕೊಂಡವನಲ್ಲ. ರಾಜ್‌ಕುಮಾರ್ ಅಭಿಮಾನಿಯಾಗಿ ಎಲ್ಲಾ ಕಡೆ ಗುರುತಿಸಿಕೊಂಡಿದ್ದೇನೆ. ಯಾರು ಅಣ್ಣಾವ್ರ ಕೆಲಸ ಮಾಡುತ್ತಾರೋ ಅಲೆಲ್ಲಾ ಗುರುತಿಸಿಕೊಂಡಿದ್ದೀನಿ. ಅಭಿಮಾನಿಗಳು ಅಂತ ಹೀಗಿರಬೇಕು ಅಂದುಕೊಳ್ಳುವಂತಹವರು ನಾಯಕ ನಟರು ಯೋಗ್ಯವಾಗಿದ್ದರೆ, ಅಭಿಮಾನಿಗಳನ್ನೂ ಯೋಗ್ಯವಾದ ರೀತಿಯಲ್ಲಿ ತೆಗೆದುಕೊಂಡು ಹೋಗುತ್ತಾರೆ. ನಾಯಕ ನಟನೇ ಯೋಗ್ಯವಾಗಿಲ್ಲ ಅಂದ್ರೆ, ಅವನ ಅಭಿಮಾನಿಗಲು ಅದೇ ರೀತಿ ಇರುತ್ತಾರೆ."

'ಅಣ್ಣಾವ್ರ ಸಿನಿಮಾ ಪ್ರಭಾವ ಬೀರುತ್ತಿತ್ತು'

"ಆಗಿನ ಚಿತ್ರರಂಗ ಅಂದ್ರೆ, ಜನಸಾಮಾನ್ಯರ ಮೇಲೆ ಪ್ರಭಾವ ಬೀರುವ ಚಿತ್ರರಂಗ. ಒಂದು ಬಂಗಾರದ ಮನುಷ್ಯ ಸಿನಿಮಾ ನೋಡಿ ಅನೇಕ ಸರ್ಕಾರಿ ಅಧಿಕಾರಿಗಳು ತಮ್ಮ ಹುದ್ದೆಯನ್ನು ತ್ಯಜಿಸಿ, ರೈತರಾದಂತಹ ಉದಾಹರಣೆ ಇದೆ. ಒಂದು ಸತ್ಯಹರಿಶ್ಚಂದ್ರ ಸಿನಿಮಾವನ್ನು ನೋಡಿ ಸತ್ಯಕ್ಕೆ ಏನು ಮಹತ್ವವಿದೆ ಅನ್ನೋದನ್ನು ತಿಳಿದುಕೊಂಡಿದ್ದಾರೆ."

'ಪುನೀತ್ ಬಗ್ಗೆ ಮಾತಾಡಿದರೆ ತಪ್ಪಾಗುತ್ತೆ'

" ಪುನೀತ್ ಅವರ ವ್ಯಕ್ತಿತ್ವದ ಬಗ್ಗೆ ನಾನು ಹೇಳಿದರೆ ತಪ್ಪಾಗುತ್ತೆ. ಪುನೀತ್ ಅವರ ವ್ಯಕ್ತಿತ್ವದ ಬಗ್ಗೆ ಅವರ ಸಾಧನೆಗಳು, ಅವರಿಗೆ ಸಲ್ಲಿಸಿದಂತಹ ಕೀರ್ತಿಗಳು ಇವೆಲ್ಲವೂ ಸಾಕು ಅವರ ಸಾಧನೆ ಬಗ್ಗೆ ಹೇಳೋಕೆ. ಪುನೀತ್ ಅವರ ಅಭಿಮಾನಿಗಳು ಆ ದಿಕ್ಕಿನಲ್ಲಿಯೇ ಇರುತ್ತಾರೆ." ಎಂದು ಕರ್ನಾಟಕ ರಕ್ಷಣಾ ವೇದಿಕೆಯ ರಾಜ್ಯಾಧ್ಯಕ್ಷ ಶಿವರಾಮೇ ಗೌಡ ಸಂದರ್ಶನದಲ್ಲಿ ಮಾತಾಡಿದ್ದಾರೆ.