ಕಬ್ಜದಲ್ಲಿ ಶಿವಣ್ಣ ನಟಿಸಿದ್ದಾರೆ ಎನ್ನುವುದು ನಿಜಾನಾ, ಸುಳ್ಳಾ? ಚಂದ್ರು ಕೊಟ್ರು ಕುತೂಹಲಕಾರಿ ಉತ್ತರ!

ಚಂದ್ರು ಹೇಳಿದ್ದಿಷ್ಟು

ನಿನ್ನೆ ( ಫೆಬ್ರವರಿ 7 ) ನಿರ್ದೇಶಕ ಆರ್ ಚಂದ್ರು ತಮ್ಮ ಹುಟ್ಟುಹಬ್ಬದ ಸಂಭ್ರಮದಲ್ಲಿ ಮಾಧ್ಯಮಗಳ ಮುಂದೆ ಬಂದಿದ್ದರು. ಈ ಸಂದರ್ಭದಲ್ಲಿ ತಮ್ಮ ಕಬ್ಜ ಚಿತ್ರದ ಕುರಿತು ವಿಶೇಷವಾಗಿ ಮಾತನಾಡಿದ ಚಂದ್ರು ಅವರಿಗೆ ಚಿತ್ರದಲ್ಲಿ ಶಿವ ರಾಜ್‌ಕುಮಾರ್ ಸಹ ನಟಿಸಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ, ಟೀಸರ್‌ನಲ್ಲೂ ಒಂದು ದೃಶ್ಯದಲ್ಲಿ ಶಿವ ರಾಜ್‌ಕುಮಾರ್ ಇದ್ದಂತೆ ಭಾಸವಾಗಿದೆ ಇದಕ್ಕೆ ಏನು ಹೇಳುತ್ತೀರ ಎಂಬ ಪ್ರಶ್ನೆಗಳು ಎದುರಾದವು. ಈ ಪ್ರಶ್ನೆಗೆ ಉತ್ತರಿಸಿದ ಚಂದ್ರು ಇದೊಂದು ಪ್ಯಾನ್ ಇಂಡಿಯಾ ಚಿತ್ರವಾಗಿರುವುದರಿಂದ ಚಿತ್ರದಲ್ಲಿ ಸಾಕಷ್ಟು ಕುತೂಹಲಗಳಿದೆ, ಅದನ್ನ ನಾನು ಈಗಲೇ ಬಿಚ್ಚಿಟ್ರೆ ನಿಮಗೆಲ್ಲಾ ಏನೂ ಗೊತ್ತಾಗಲ್ಲ, ಇನ್ನೂ ಯಾರಾರೆಲ್ಲಾ ಇದ್ದಾರೆ ಎಂಬುದನ್ನು ನೋಡಿದ್ರೆ ನೀವೇ ಓಹ್ ಇವರೆಲ್ಲಾ ಇದ್ದಾರಾ ಎಂದುಕೊಳ್ತೀರ, ಯಾರು ಇದ್ದಾರೆ ಎಂಬುದನ್ನು ನಾನು ಈಗಲೇ ಬಿಟ್ಟುಕೊಡಲು ಇಚ್ಛಿಸುವುದಿಲ್ಲ, ಸಿನಿಮಾ ನೋಡಿ, ಸರಿಯಾದ ಸಮಯದಲ್ಲಿ ಯಾರೆಲ್ಲಾ ಇದ್ದಾರೆ ಎಂಬ ಪಟ್ಟಿ ಬಿಡುಗಡೆ ಮಾಡ್ತೇನೆ ಎಂದು ಹೇಳಿಕೆ ನೀಡಿದರು.

ಶಿವಣ್ಣ ಇದ್ದಾರೆ ಎಂಬುದನ್ನು ಮೊದಲು ಬಿಚ್ಚಿಟ್ಟಿದ್ದು ಪ್ರಿಯಾಂಕಾ ಉಪೇಂದ್ರ

ಹೌದು, ಕಬ್ಜ ಚಿತ್ರದಲ್ಲಿ ಶಿವ ರಾಜ್‌ಕುಮಾರ್ ಇದ್ದಾರೆ ಎಂಬುದನ್ನು ಮೊದಲು ತಿಳಿಸಿದ್ದೇ ನಟಿ ಪ್ರಿಯಾಂಕಾ ಉಪೇಂದ್ರ. ಜೀ ಕನ್ನಡ ವಾಹಿನಿ ಜತೆ ಮಾತನಾಡುವಾಗ ಚಿತ್ರದ ಬಗ್ಗೆ ಪ್ರತಿಕ್ರಿಯಿಸಿದ್ದ ಪ್ರಿಯಾಂಕಾ ಉಪೇಂದ್ರ ಕಬ್ಜ ಚಿತ್ರದಲ್ಲಿ ಎಲ್ಲರೂ ವಿಭಿನ್ನವಾಗಿ ಚೆನ್ನಾಗಿ ಕಾಣಿಸುತ್ತಾರೆ ಎನ್ನುತ್ತಾ ಸಿನಿಮಾದಲ್ಲಿ ಶಿವ ರಾಜ್‌ಕುಮಾರ್ ಸಹ ಇದ್ದಾರೆ ಎಂಬ ಅಂಶವನ್ನು ತಿಳಿಸಿಬಿಟ್ಟಿದ್ದರು.

ಟೀಸರ್‌ನಲ್ಲೂ ಇದೆ ದೃಶ್ಯ!

ಇನ್ನು ಕಬ್ಜ ಚಿತ್ರದಲ್ಲಿ ಶಿವಣ್ಣ ಸಹ ಇರಲಿದ್ದಾರೆ ಎಂಬ ವಿಷಯವನ್ನು ನಟಿ ಪ್ರಿಯಾಂಕಾ ಉಪೇಂದ್ರ ತಿಳಿಸಿದ ಬೆನ್ನಲ್ಲೇ ಚಿತ್ರತಂಡ ಬಿಡುಗಡೆ ಮಾಡಿದ್ದ ಟೀಸರ್ ದೃಶ್ಯವೊಂದರಲ್ಲಿ ಉಪೇಂದ್ರ ಅಕ್ಕಪಕ್ಕ ಕಿಚ್ಚ ಸುದೀಪ್ ಹಾಗೂ ಶಿವರಾಜ್ ಕುಮಾರ್ ಸಹ ಇರುವಂತಿತ್ತು‌. ಈ ದೃಶ್ಯ ಹಿಂಬದಿಯ ದೃಶ್ಯವಾದ ಕಾರಣ ಈ ರೀತಿಯ ಅನುಮಾನ ಹಾಗೂ ಕುತೂಹಲ ಮೂಡಿದ್ದು, ಮುಂದಿನ ದಿನಗಳಲ್ಲಿ ಉತ್ತರ ಸಿಗಲಿದೆ.