'ಕೆಜಿಎಫ್ 2' ಟ್ರೇಲರ್‌: ಸುಳ್ಳು ಸುದ್ದಿ ನಂಬಬೇಡಿ ಎಂದ ಚಿತ್ರತಂಡ

'ಕೆಜಿಎಫ್ 2' ಬಗ್ಗೆ ಸುಳ್ಳು ಸುದ್ದಿ

'ಕೆಜಿಎಫ್ 2' ಸಿನಿಮಾದ ಟ್ರೇಲರ್ ಮಾರ್ಚ್ 08 ರಂದು ಸಂಜೆ 6:12 ಕ್ಕೆ ಬಿಡುಗಡೆ ಆಗುತ್ತದೆ ಎಂದು ಹಲವು ಸಾಮಾಜಿಕ ಜಾಲತಾಣದಲ್ಲಿ ಸುದ್ದಿ ಹರಿದಾಡುತ್ತಿದೆ. ಆದರೆ ಈ ಸುದ್ದಿ ಸುಳ್ಳೆಂದು ಚಿತ್ರತಂಡ ಸ್ಪಷ್ಟಪಡಿಸಿದೆ. 'ಕೆಜಿಎಫ್ 2' ಟ್ರೇಲರ್ ಬಿಡುಗಡೆ ಬಗ್ಗೆ ಟ್ವೀಟ್ ಮಾಡಿರುವ ಸಿನಿಮಾದ ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್ ಗೌಡ, ''ಕೆಜಿಫ್ 2' ಟ್ರೇಲರ್‌ ಬಗ್ಗೆ ಯಾವುದೇ ಸುಳ್ಳು ಸುದ್ದಿಗಳನ್ನು ನಂಬಬೇಡಿ, ಸಿನಿಮಾದ ಕುರಿತಾದ ಸುದ್ದಿಗಳು ಅಧಿಕೃತ ಖಾತೆಗಳಿಂದಷ್ಟೆ ಬರುತ್ತವೆ'' ಎಂದಿದ್ದಾರೆ.

ಟೀಸರ್ ಸೋರಿಕೆ ಆಗಿತ್ತು

''ಕೆಜಿಎಫ್ 2' ಸಿನಿಮಾದ ಟೀಸರ್ ಕಳೆದ ವರ್ಷ ಬಿಡುಗಡೆ ಆಗಿತ್ತು, ಆದರೆ ಆಗ ಚಿತ್ರತಂಡವು ಅಧಿಕೃತವಾಗಿ ಟೀಸರ್ ಬಿಡುಗಡೆ ಮಾಡುವ ಮುನ್ನವೇ ಅದೇ ಟೀಸರ್ ಸಾಮಾಜಿಕ ಜಾಲತಾಣದಲ್ಲಿ ಸೋರಿಕೆ ಆಗಿಬಿಟ್ಟಿತು. ಸೋರಿಕೆ ಆದರೂ ಸಹ 'ಕೆಜಿಎಫ್ 2' ಟೀಸರ್ ಅತಿ ಬೇಗನೆ ಕೋಟ್ಯಂತರ ವೀವ್ಸ್ ಗಳಿಸಿ ದಾಖಲೆಯನ್ನೇ ಬರೆಯಿತು. ಆದರೆ ಕಳೆದ ಬಾರಿಯಂತೆ ಈ ಬಾರಿ ಟ್ರೇಲರ್ ಲೀಕ್ ಆಗದಂತೆ ಹೆಚ್ಚಿನ ಎಚ್ಚರಿಕೆಯನ್ನು ಚಿತ್ರತಂಡ ವಹಿಸಿದೆ ಎನ್ನಲಾಗುತ್ತಿದೆ.

ಕಳೆದ ಬಾರಿ ಭರ್ಜರಿ ಪ್ರಚಾರ

'ಕೆಜಿಎಫ್ 2' ಸಿನಿಮಾದ ಪ್ರಚಾರ ಅಧಿಕೃತವಾಗಿ ಇನ್ನೂ ಆರಂಭವಾಗಿಲ್ಲ. 'ಕೆಜಿಎಫ್: ಚಾಪ್ಟರ್ ಒನ್' ಸಿನಿಮಾದ ಪ್ರಚಾರವನ್ನು ಹಲವು ರಾಜ್ಯಗಳಲ್ಲಿ, ಹಲವು ವಿಧಗಳಲ್ಲಿ ಮಾಡಲಾಗಿತ್ತು. ಹಿಂದಿಯ ಜನಪ್ರಿಯ ಯೂಟ್ಯೂಬ್ ಚಾನೆಲ್‌ಗಳಿಗೂ ಯಶ್ ಹೋಗಿ ಸಂದರ್ಶನ ನೀಡಿದ್ದರು. ತೆಲುಗು, ತಮಿಳಿನಲ್ಲಿಯೂ ಹಲವು ಸಂದರ್ಶನಗಳನ್ನು ಮಾಡಿದ್ದರು. ಆದರೆ ಈ ಬಾರಿ ಬೇರೆಯದೇ ಯೋಜನೆಯೊಂದಿಗೆ ಚಿತ್ರತಂಡ ಪ್ರಚಾರಕ್ಕೆ ಇಳಿಯಲಿದೆ. ನಿರ್ದೇಶಕ ಪ್ರಶಾಂತ್ ನೀಲ್, ನಿರ್ಮಾಪಕ ವಿಜಯ್ ಕಿರಗಂದೂರು, ಯಶ್ ಹಾಗೂ ಇತರರು ಕೆಲ ದಿನಗಳ ಹಿಂದಷ್ಟೆ ಕರಾವಳಿ ಭಾಗದ ದೇವಾಲಯಗಳಿಗೆ ಭೇಟಿ ನೀಡಿ ಆಶೀರ್ವಾದ ಪಡೆದಿದ್ದಾರೆ. ಕೆಲವೇ ದಿನಗಳಲ್ಲಿ ಪ್ರಚಾರ ಕಾರ್ಯ ಆರಂಭವಾಗಲಿದೆ.

ವಿದೇಶಗಳಲ್ಲಿ ದೊಡ್ಡ ಮಟ್ಟದಲ್ಲಿ ಬಿಡುಗಡೆ

'ಕೆಜಿಎಫ್ 2' ಸಿನಿಮಾವು ಏಪ್ರಿಲ್ 14 ರಂದು ಬಿಡುಗಡೆ ಆಗಲಿದೆ. ಈ ಬಾರಿ ವಿದೇಶಗಳಲ್ಲಿಯೂ ಸಿನಿಮಾವನ್ನು ದೊಡ್ಡ ಮಟ್ಟದಲ್ಲಿ ಬಿಡುಗಡೆ ಮಾಡಲು ಚಿತ್ರ ತಂಡ ಯೋಜನೆ ಹಾಕಿಕೊಂಡಿದೆ. ವಿದೇಶದಲ್ಲಿಯೂ ಸಿನಿಮಾದ ಪ್ರಚಾರ ಕಾರ್ಯ ನಡೆಯಲಿದೆ. 'ಕೆಜಿಫ್ 2' ಭಾರಿ ಬೇಡಿಕೆ ಇದ್ದು, ಈಗಾಗಲೇ ಆಡಿಯೋ ಹಕ್ಕುಗಳು ಲಹರಿ ಆಡಿಯೋ ಸಂಸ್ಥೆಗೆ ದೊಡ್ಡ ಮೊತ್ತಕ್ಕೆ ಮಾರಾಟವಾಗಿದೆ. 'ಕೆಜಿಎಫ್ 2' ಸಿನಿಮಾದಲ್ಲಿ ಯಶ್ ಜೊತೆಗೆ, ಬಾಲಿವುಡ್‌ನ ಸಂಜಯ್ ದತ್, ರವೀನಾ ಟಂಡನ್, ನಟ ಪ್ರಕಾಶ್ ರೈ, ರಾವ್ ರಮೇಶ್ ಇನ್ನೂ ಹಲವರು ನಟಿಸಿದ್ದಾರೆ.