ತಮನ್ನಾಗೆ ಕೋಕ್, ಹೊಸ ನಟಿ ಜೊತೆ ಮತ್ತೆ 'ಕೆಜಿಎಫ್' ಸಾಂಗ್ ಶೂಟಿಂಗ್.!

ಮತ್ತೆ ಕೆಜಿಎಫ್ ಸಾಂಗ್ ಶೂಟಿಂಗ್

ಕೆಜಿಎಫ್ ಚಿತ್ರದಲ್ಲಿ ತಮನ್ನಾ ಡ್ಯಾನ್ಸ್ ಮಾಡಿದ್ದ ಹಾಡಿಗೆ ಬಾಲಿವುಡ್ ಮಂದಿ ಬ್ರೇಕ್ ಹಾಕಿದ್ದಾರೆ. ಚಿತ್ರದಿಂದ ಈ ಹಾಡನ್ನ ಕೈಬಿಟ್ಟಿರುವ ಹಿಂದಿ ವಿತರಕರು ಹೊಸ ಹಾಡನ್ನ ಮತ್ತು ಹೊಸ ನಟಿಯೊಂದಿಗೆ ಶೂಟ್ ಮಾಡಲು ನಿರ್ಧರಿಸಿದ್ದಾರೆ.

ಹಿಂದಿಯಲ್ಲಿ ಇರಲ್ಲ 'ಜೋಕೆ ನಾನು ಬಳ್ಳಿಯ ಮಿಂಚು'

1970 ರಲ್ಲಿ ತೆರೆಕಂಡ ಡಾ.ರಾಜ್ ಕುಮಾರ್ ಅಭಿನಯದ ಸೂಪರ್ ಡ್ಯೂಪರ್ ಹಿಟ್ 'ಪರೋಪಕಾರಿ' ಚಿತ್ರದ 'ಜೋಕೆ ನಾನು ಬಳ್ಳಿಯ ಮಿಂಚು...' ಹಾಡನ್ನ 'ಕೆ.ಜಿ.ಎಫ್' ಸಿನಿಮಾದಲ್ಲಿ ಬಳಸಲಾಗಿತ್ತು. ಈ ಹಾಡಿಗೆ ತಮನ್ನಾ ಹೆಜ್ಜೆ ಹಾಕಿದ್ದರು. ಐದು ಭಾಷೆಯಲ್ಲಿ ಈ ಸಿನಿಮಾ ಬರ್ತಿದ್ದ ಕಾರಣ ಬಹುಶಃ ಅದೇ ಹಾಡನ್ನ ಉಳಿಸಿಕೊಂಡಿದ್ದರು. ಬಟ್, ಇದೀಗ, ಹಿಂದಿಯಲ್ಲಿ ಈ ಹಾಡನ್ನ ಬದಲಾಯಿಸಿದ್ದಾರೆ.

'ತ್ರಿದೇವ್' ಚಿತ್ರದ ಹಾಡು ಬಳಕೆ

'ಜೋಕೆ ನಾನು ಬಳ್ಳಿಯ ಮಿಂಚು' ಹಾಡಿನ ಬದಲು 1989ರಲ್ಲಿ ತೆರೆಕಂಡಿದ್ದ ತ್ರಿದೇವ್ ಚಿತ್ರದ 'ಗಲಿ ಗಲಿ ಮೇ...' ಹಾಡನ್ನ ರಿ-ಕ್ರಿಯೇಟ್ ಮಾಡುತ್ತಿದ್ದಾರಂತೆ. ಜಾಕಿ ಶ್ರಾಫ್ ಹಾಗೂ ಸಂಗೀತಾ ಬಿಜಲಾನಿ ಈ ಹಾಡಿನಲ್ಲಿ ಕಾಣಿಸಿಕೊಂಡಿದ್ದರು. ಆ ಕಾಲಕ್ಕೆ ಇದು ಸೂಪರ್ ಹಿಟ್ ಆಗಿದ್ದ ಹಾಡು, ಹಾಗಾಗಿ, ಹಿಂದಿ ಅವತರಣಿಕೆಯಲ್ಲಿ ಈ ಹಾಡು ಬಳಸಲು ಮುಂದಾಗಿದ್ದಾರೆ.

ತಮನ್ನಾ ಬದಲು ಮೌನಿ ರಾಯ್

ಅಂದ್ಹಾಗೆ, ಕನ್ನಡ ವರ್ಷನ್ ನಲ್ಲಿ ತಮನ್ನಾ ಕುಣಿದಿದ್ದ ಹಾಡು ಇದಾಗಿದ್ದು, ಇಲ್ಲಿ ತಮನ್ನಾ ಬದಲು ಬಾಲಿವುಡ್ ಖ್ಯಾತ ನಟಿ ಮೌನಿ ರಾಯ್ ಡ್ಯಾನ್ಸ್ ಮಾಡಲಿದ್ದಾರೆ. ಯಶ್ ಮತ್ತು ಮೌನಿ ರಾಯ್ ಜೋಡಿಯ ಹಾಡನ್ನ ಮತ್ತೆ ರೀ-ಶೂಟ್ ಮಾಡಲಾಗ್ತಿದೆ.

ಡಿಸೆಂಬರ್ 7 ರಂದು ಶೂಟಿಂಗ್

ಸದ್ಯ, ಕೆಜಿಎಫ್ ಚಿತ್ರದ ಪ್ರಚಾರಕ್ಕಾಗಿ ಮುಂಬೈನಲ್ಲಿರುವ ಯಶ್, ಅಲ್ಲಿಯೇ ಸಾಂಗ್ ಶೂಟಿಂಗ್ ಮುಗಿಸಲಿದ್ದಾರಂತೆ. ಡಿಸೆಂಬರ್ 7 ಮತ್ತು 8 ಎರಡು ದಿನಗಳ ಕಾಲ ಚಿತ್ರೀಕರಣ ನಡೆಯಲಿದ್ದು, ಡಿಸೆಂಬರ್ 9 ರಂದು ಹೈದರಬಾದ್ ನಲ್ಲಿ ನಡೆಯಲಿರುವ ಪ್ರೀ-ರಿಲೀಸ್ ಕಾರ್ಯಕ್ರಮಕ್ಕೆ ಯಶ್ ಆಗಮಿಸಲಿದ್ದಾರೆ.

ಡಿಸೆಂಬರ್ 21ಕ್ಕೆ ಬಿಡುಗಡೆ?

ಇಷ್ಟು ಕಡಿಮೆ ಸಮಯದಲ್ಲಿ ಮತ್ತೆ ಸಾಂಗ್ ಶೂಟಿಂಗ್ ಗೆ ಹೋಗುತ್ತಿರುವುದು ನಿಜಕ್ಕೂ ಎಲ್ಲರಿಗೂ ಅಚ್ಚರಿ ಉಂಟು ಮಾಡಿದೆ. ಆದ್ರೆ, ಬಿಡುಗಡೆ ದಿನಾಂಕದಲ್ಲಿ ಯಾವುದೇ ಬದಲಾವಣೆ ಇಲ್ಲ. ಈ ಹಿಂದೆ ಘೋಷಿಸಿರುವಂತೆ ಡಿಸೆಂಬರ್ 21ಕ್ಕೆ ಕೆಜಿಎಫ್ ಎಲ್ಲಾ ಭಾಷೆಯಲ್ಲೂ ಬರಲಿದೆ.