ಕರ್ನಾಟಕದಲ್ಲಿ ಪಠಾಣ್ ಹಾಗೂ ಕ್ರಾಂತಿ 4 ದಿನಗಳಲ್ಲಿ ಗಳಿಸಿದ್ದಿಷ್ಟು; ಎರಡಕ್ಕೂ ಸ್ವಲ್ಪವೇ ವ್ಯತ್ಯಾಸ!

ಕ್ರಾಂತಿ vs ಪಠಾಣ್: ಕರ್ನಾಟಕದಲ್ಲಿ ಮೊದಲ 4 ದಿನದ ಕಲೆಕ್ಷನ್

ಈ ಎರಡೂ ಚಿತ್ರಗಳು ಕರ್ನಾಟಕ ಬಾಕ್ಸ್ ಆಫೀಸ್‌ನಲ್ಲಿ ಎಷ್ಟು ಕಲೆಕ್ಷನ್ ಮಾಡಿವೆ ಎಂಬುದರ ಬಗ್ಗೆ ಚಿತ್ರತಂಡಗಳೇನೂ ಅಧಿಕೃತ ಮಾಹಿತಿಯನ್ನು ಬಿಚ್ಚಿಟ್ಟಿಲ್ಲ. ಆದರೆ ಬಾಕ್ಸ್ ಆಫೀಸ್ ಟ್ರ್ಯಾಕರ್ಸ್ ಈ ಕುರಿತಾಗಿ ಮಾಹಿತಿ ನೀಡಿದ್ದು, ಕ್ರಾಂತಿ ಚಿತ್ರ ಮೊದಲ 4 ದಿನಗಳಲ್ಲಿ ಒಟ್ಟು 25.75 ಕೋಟಿ ರೂಪಾಯಿ ಗಳಿಕೆ ಮಾಡಿದ್ದು, ಪಠಾಣ್ ಕರ್ನಾಟಕದಲ್ಲಿ ಮೊಲದ 4 ದಿನಗಳಲ್ಲಿ 20 ಕೋಟಿ ಗಳಿಕೆ ಮಾಡಿದೆ. ಈ ಮೂಲಕ ಮೊದಲ 4 ದಿನಗಳ ಗಳಿಕೆ ಪೈಕಿ ಎರಡೂ ಚಿತ್ರಗಳ ನಡುವೆ ಕೇವಲ ಐದು ಕೋಟಿಯಷ್ಟೇ ವ್ಯತ್ಯಾಸವಿದೆ ಎಂಬುದು ಬಾಕ್ಸ್ ಆಫೀಸ್ ಪಂಡಿತರು ನೀಡಿರುವ ಮಾಹಿತಿ.

ನಾಲ್ಕು ದಿನಗಳಲ್ಲಿ ಯಾವ ದಿನ ಎಷ್ಟು ಗಳಿಸಿತು ಕ್ರಾಂತಿ?

ಮೊದಲ ದಿನ 12.85 ಕೋಟಿ ಕಲೆಕ್ಷನ್ ಮಾಡುವ ಮೂಲಕ ಬಾಕ್ಸ್ ಆಫೀಸ್‌ನಲ್ಲಿ ಧೂಳ್ ಎಬ್ಬಿಸಿ ಅಬ್ಬರದ ಓಪನಿಂಗ್ ಪಡೆದುಕೊಂಡಿದ್ದ ಕ್ರಾಂತಿ ಎರಡನೇ ದಿನ 3.9 ಕೋಟಿ ಹಾಗೂ ಮೂರನೇ ದಿನ 4.35 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿತ್ತು. ಇನ್ನು ನಾಲ್ಕನೇ ದಿನವಾದ ಜನವರಿ 29ರ ಭಾನುವಾರದಂದು ಕ್ರಾಂತಿ ಚಿತ್ರ 4.65 ಕೋಟಿ ಗಳಿಕೆ ಮಾಡಿದೆ ಎಂದು ಬಾಕ್ಸ್ ಆಫೀಸ್ ಪಂಡಿತರು ತಿಳಿಸಿದ್ದಾರೆ. ಈ ಮೂಲಕ ಕ್ರಾಂತಿ ಮೊದಲ ವಾರಾಂತ್ಯಕ್ಕೆ 25.75 ಕೋಟಿ ಗಳಿಸಿದೆ ಎಂಬ ಮಾಹಿತಿ ಇದೆ.

ಬುಕಿಂಗ್‌ನಲ್ಲಿ ಕ್ರಾಂತಿ ಹಿಂದಿಕ್ಕಿದ ಪಠಾಣ್

ಇನ್ನು ಬೆಂಗಳೂರು ಹಾಗೂ ಮಂಗಳೂರು ಶೋಗಳ ಸಂಖ್ಯೆಯಲ್ಲಿ ಕ್ರಾಂತಿ ಚಿತ್ರವನ್ನು ಪಠಾಣ್ ಹಿಂದಿಕ್ಕಿದೆ. ಬೆಂಗಳೂರಿನಲ್ಲಿ ಪಠಾಣ್ ದಿನವೊಂದಕ್ಕೆ 500ಕ್ಕೂ ಹೆಚ್ಚು ಪ್ರದರ್ಶನಗಳನ್ನು ಪಡೆದುಕೊಂಡಿದ್ದರೆ, ಕ್ರಾಂತಿ 400ಕ್ಕೂ ಹೆಚ್ಚಿನ ಪ್ರದರ್ಶನಗಳನ್ನು ಪಡೆದುಕೊಳ್ಳುತ್ತಿದೆ. ಇಂದು ( ಜನವರಿ 30 ) ಬೆಂಗಳೂರಿನಲ್ಲಿ ಪಠಾಣ್ 561 ಪ್ರದರ್ಶನಗಳನ್ನು ಪಡೆದುಕೊಂಡಿದ್ದರೆ, ಕ್ರಾಂತಿ 487 ಪ್ರದರ್ಶನಗಳನ್ನು ಪಡೆದುಕೊಂಡಿದೆ.