2023ರ ಮೊದಲ 3 ತಿಂಗಳುಗಳಲ್ಲಿ 100 ಕೋಟಿ ಕ್ಲಬ್ ಸೇರಿದ್ದು ಈ 8 ಚಿತ್ರಗಳು ಮಾತ್ರ!

ಕಳೆದ ವರ್ಷ ಬರೋಬ್ಬರಿ 30 ನೂರ ಕೋಟಿ ಕ್ಲಬ್ ಚಿತ್ರಗಳನ್ನು ನೀಡಿದ ಭಾರತ ಸಿನಿಮಾರಂಗ ಈ ವರ್ಷದ ಮೊದಲ ಮೂರು ತಿಂಗಳನ್ನು ಪೂರೈಸಿದೆ. ಇನ್ನು ಕಳೆದ ವರ್ಷದ ಬಾಕ್ಸ್ ಆಫೀಸ್ ಸಕ್ಸಸ್ ಓಟವನ್ನು ಈ ವರ್ಷದ ಜನವರಿ ತಿಂಗಳಿನಲ್ಲಿ ಬಿಡುಗಡೆಗೊಂಡ ಚಿತ್ರಗಳು ಮುಂದುವರಿಸಿದವು.

ಹೌದು, ಸಂಕ್ರಾಂತಿ ಹಬ್ಬದ ಪ್ರಯುಕ್ತ ಚಿತ್ರಮಂದಿರಗಳಿಗೆ ಕಾಲಿಟ್ಟ ತೆಲುಗು ಹಾಗೂ ತಮಿಳಿನ ನಾಲ್ಕು ಸ್ಟಾರ್ ನಟರ ಚಿತ್ರಗಳೂ ಸಹ ನೂರು ಕೋಟಿಗೂ ಅಧಿಕ ಗಳಿಸಿದವು. ಈ ನಾಲ್ಕೂ ಚಿತ್ರಗಳೂ ಸಹ ಸಿನಿ ರಸಿಕರಿಂದ ಸಾಧಾರಣ ಹಾಗೂ ಸಾಧಾರಣಕ್ಕಿಂತ ಉತ್ತಮ ಎಂಬ ಪ್ರತಿಕ್ರಿಯೆಗಳನ್ನು ಪಡೆದುಕೊಂಡರೂ ಸಹ ಈ ಮೈಲಿಗಲ್ಲನ್ನು ತಲುಪಿದವು.

ಈ ನಾಲ್ಕು ಸಿನಿಮಾಗಳ ಬಳಿಕ ತೆರೆಕಂಡ ಚಿತ್ರಗಳ ಪೈಕಿ ಇನ್ನೂ ನಾಲ್ಕು ಸಿನಿಮಾಗಳು ನೂರು ಕೋಟಿಯ ಮೈಲಿಗಲ್ಲನ್ನು ಮುಟ್ಟುವಲ್ಲಿ ಯಶಸ್ವಿಯಾಗಿವೆ. ಹಾಗಿದ್ದರೆ ಈ ವರ್ಷದ ಮೊದಲ ಮೂರು ತಿಂಗಳಿನಲ್ಲಿ ನೂರು ಕೋಟಿ ಕ್ಲಬ್ ಸೇರಿರುವ ಚಿತ್ರಗಳು ಯಾವುವು ಎಂಬ ಪಟ್ಟಿ ಹೆಚ್ಚು ಕಲೆಕ್ಷನ್ ಮಾಡಿದ ಕ್ರಮಾಂಕದಲ್ಲಿ ಈ‌ ಕೆಳಕಂಡಂತಿದೆ.

1. ಪಠಾಣ್: ಶಾರುಖ್ ಖಾನ್, ದೀಪಿಕಾ ಪಡುಕೋಣೆ ಹಾಗೂ ಜಾನ್ ಅಬ್ರಹಾಂ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ ಪಠಾಣ್ ಚಿತ್ರ ಸಹ ಜನವರಿಯಲ್ಲಿ ಬಿಡುಗಡೆಯಾಗಿ ಬಾಕ್ಸ್ ಆಫೀಸ್ ಧೂಳ್ ಎಬ್ಬಿಸಿದೆ. ಈ ಚಿತ್ರ 65 ದಿನಗಳಲ್ಲಿ 1050 ಕೋಟಿ ಗಳಿಸಿದೆ. ಈ ಮೂಲಕ ಈ ವರ್ಷ 500 ಹಾಗೂ 1000 ಕೋಟಿ ಕ್ಲಬ್ ಸೇರಿದ ಭಾರತದ ಮೊದಲ ಹಾಗೂ ಏಕೈಕ ಚಿತ್ರ ಎನಿಸಿಕೊಂಡಿದೆ.

2. ಈ ವರ್ಷ ನೂರು ಕೋಟಿ ಕ್ಲಬ್ ಸೇರಿದ ಕೀರ್ತಿ ದಳಪತಿ ವಿಜಯ್ ಹಾಗೂ ವಂಶಿ ಪೈಡಿಪಲ್ಲಿ ಕಾಂಬೊದ ವಾರಿಸು ಚಿತ್ರಕ್ಕೆ ಸೇರುತ್ತದೆ. ಸಂಕ್ರಾಂತಿ ಪ್ರಯುಕ್ತ ಜನವರಿ 11ರಂದು ತೆರೆಗೆ ಬಂದಿದ್ದ ಈ ಚಿತ್ರ 310 ಕೋಟಿ ಗಳಿಸಿದೆ.

3. ವಾರಿಸು ಚಿತ್ರ ಬಿಡುಗಡೆಯಾದ ದಿನವೇ ತಮಿಳಿನ‌ ಮತ್ತೋರ್ವ ಸ್ಟಾರ್ ನಟ ಅಜಿತ್ ಕುಮಾರ್ ನಟನೆಯ ತುನಿವು ಸಹ ತೆರೆಗೆ ಬಂದಿತ್ತು.‌ ಈ ಚಿತ್ರ ಸಹ ಒಳ್ಳೆಯ ಕಲೆಕ್ಷನ್ ‌ಮಾಡಿದ್ದು ಒಟ್ಟಾರೆ 250 ಕೋಟಿ ಬಾಚಿದೆ.

4. ಚಿರಂಜೀವಿ ಹಾಗೂ ರವಿತೇಜಾ ನಟನೆಯ ವಾಲ್ತೇರು ವೀರಯ್ಯ ಬಿಡುಗಡೆಯಾದಾಗ ಬೃಹತ್ ಓಪನಿಂಗ್ ಪಡೆದುಕೊಂಡಿರಲಿಲ್ಲ. ಆದರೆ ನಂತರದ ದಿನಗಳಲ್ಲಿ ಕೋಟಿ ಕೋಟಿ ಬಾಚಿದ ಈ ಚಿತ್ರ ಒಟ್ಟಾರೆ 232 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿತು.

5. ರಣಬೀರ್ ಕಪೂರ್, ಶ್ರದ್ಧಾ ಕಪೂರ್ ಹಾಗೂ ಡಿಂಪಲ್ ಕಪಾಡಿಯಾ ನಟನೆಯ ತೂ ಜೂತಿ ಮೇನ್ ಮಕ್ಕರ್ ಚಿತ್ರ ಸಹ ನೂರು ಕೋಟಿ ಕ್ಲಬ್ ಸೇರಿದೆ. ಈ ಚಿತ್ರ ಈಗಾಗಲೇ 201 ಕೋಟಿ ಗಳಿಸಿದೆ.

6. ಸಂಕ್ರಾಂತಿ ಪ್ರಯುಕ್ತ ಬಿಡುಗಡೆಯಾದ ಮತ್ತೊಂದು ತೆಲುಗು ಚಿತ್ರ ಬಾಲಕೃಷ್ಣ ಹಾಗೂ ದುನಿಯಾ ವಿಜಯ್ ನಟನೆಯ ವೀರ ಸಿಂಹ ರೆಡ್ಡಿ ಸಹ ನೂರು ಕೋಟಿ ಕ್ಲಬ್ ಸೇರಿದೆ. ಈ ಚಿತ್ರ 134 ಕೋಟಿ ಕಲೆಕ್ಷನ್ ಮಾಡಿದೆ‌.

7. ಧನುಷ್ ಹಾಗೂ ಸಂಯುಕ್ತ ಮೆನನ್ ನಟನೆಯ, ವೆಂಕಿ ಅಟ್ಲುರಿ ನಿರ್ದೇಶನದ ವಾತಿ ಚಿತ್ರ ಸಹ ನೂರು ಕೋಟಿ ಕ್ಲಬ್ ಸೇರಿದೆ. ತೆಲುಗಿನಲ್ಲಿ ಸಾರ್ ಎಂಬ ಶೀರ್ಷಿಕೆ ಅಡಿಯಲ್ಲಿ ಬಿಡುಗಡೆಯಾಗಿದ್ದ ಈ ಚಿತ್ರ ಎರಡೂ ಭಾಷೆಗಳೂ ಸೇರಿ 100 ಕೋಟಿ ಕ್ಲಬ್ ಸೇರಿದೆ.

8. ಇನ್ನು ಕನ್ನಡದ ಕಬ್ಜ ಚಿತ್ರತಂಡ ಸಹ ಪೋಸ್ಟರ್ ಬಿಡುಗಡೆ ಮಾಡುವ ಮೂಲಕ ಹಾಗೂ ಪತ್ರಿಕಾಗೋಷ್ಠಿಯಲ್ಲಿ ಚಿತ್ರ ನೂರು ಕೋಟಿಯಾಗಿದೆ ಎಂಬುದನ್ನು ಹೇಳಿಕೊಂಡಿತ್ತು.