ದಾರಿ ಬಿಡ್ರಿ... ಚಿತ್ರರಂಗಕ್ಕೆ ಬಂದ್ರು ಮಾರಿಮುತ್ತು ಮೊಮ್ಮಗಳು ಜಯಶ್ರೀ!

ಮಾರಿಮುತ್ತು ಮೊಮ್ಮಗಳ ಸಿನಿಮಾ ಎಂಟ್ರಿ

'ಉಪೇಂದ್ರ' ಸಿನಿಮಾದ ಮಾರಿಮುತ್ತು ಪಾತ್ರವನ್ನು ಯಾರು ಮರೆಯುವುದಕ್ಕೆ ಆಗಲ್ಲ. ಆ ಪಾತ್ರದಲ್ಲಿ ನಟಿಸಿದ್ದ ಪೋಷಕ ನಟಿ ಸರೋಜಮ್ಮ ಅವರ ಮೊಮ್ಮಗಳು ನಟಿ ಜಯಶ್ರೀ ಆರಾಧ್ಯ ಈಗ ಸಿನಿಮಾ ಹೀರೋಯಿನ್ ಆಗಿದ್ದಾರೆ.

'ಪುಟ್ಟರಾಜು ಲವರ್ ಆಫ್ ಶಶಿಕಲಾ' ಚಿತ್ರ

ಕನ್ನಡದಲ್ಲಿ ಬರುತ್ತಿರುವ 'ಪುಟ್ಟರಾಜು ಲವರ್ ಆಫ್ ಶಶಿಕಲಾ' ಎಂಬ ಹೊಸ ಸಿನಿಮಾದಲ್ಲಿ ನಟಿ ಜಯಶ್ರೀ ಆರಾಧ್ಯ ನಟಿಸುತ್ತಿದ್ದಾರೆ. ಈ ಚಿತ್ರದ ಇಬ್ಬರು ನಾಯಕಿಯರ ಪೈಕಿ ಅವರು ಕೂಡ ಒಬ್ಬರಾಗಿದ್ದಾರೆ.

ಅಜ್ಜಿ ಆಸೆ ಈಡೇರಿಸಿದ ಮೊಮ್ಮಗಳು

ಜಯಶ್ರೀ ಆರಾಧ್ಯ ಹೇಳುವ ಹಾಗೆ ಅವರ ಅಜ್ಜಿ ನಟಿ ಸರೋಜಮ್ಮ ಅವರಿಗೆ ತಮ್ಮ ಕುಟುಂಬದ ಯಾರಾದರೂ ಒಬ್ಬರಾದರು ಚಿತ್ರರಂಗಕ್ಕೆ ಬರಬೇಕು ಎಂಬ ಆಸೆ ಇತ್ತಂತೆ ಅದನ್ನು ಮೊಮ್ಮಗಳಾಗಿ ಜಯಶ್ರೀ ಆರಾಧ್ಯ ಪೂರೈಸಿದ್ದಾರೆ.

ಸಖತ್ ಕ್ಯೂಟ

ಜಯಶ್ರೀ ಆರಾಧ್ಯ ಈಗಾಗಲೇ ಅನೇಕ ಫೋಟೋ ಶೂಟ್ ಗಳನ್ನು ಮಾಡಿಸಿದ್ದಾರೆ. ಅವರ ಲುಕ್ ಸಖತ್ ಕ್ಯೂಟ್ ಆಗಿದೆ. ಹೋಮ್ಲಿ ಮತ್ತು ಗ್ಲಾಮರ್ ಎರಡು ಪಾತ್ರಗಳಿಗೂ ಅವರು ಲುಕ್ ಹೊಂದಿಕೆ ಆಗುತ್ತದೆ.

ಅನೇಕರ ಶುಭಾಶಯ

ಜಯಶ್ರೀ ಆರಾಧ್ಯ ನಟಿ ಸರೋಜಮ್ಮ ಅವರ ಮೊಮ್ಮಗಳು ಅಂತ ಇಷ್ಟು ದಿನ ಯಾರಿಗೂ ತಿಳಿದಿರಲಿಲ್ಲ. ಈಗ ಒಬ್ಬ ನಟಿಯಾಗಿ ಅವರು ಚಿತ್ರರಂಗಕ್ಕೆ ಕಾಲಿಟ್ಟಿದ್ದು ಸಾಕಷ್ಟು ಜನರು ಅವರಿಗೆ ಫೇಸ್ ಬುಕ್ ನಲ್ಲಿ ಶುಭ ಕೋರಿದ್ದಾರೆ.

ಸತ್ಯ ಘಟನೆಯ ಸಿನಿಮಾ

'ಪುಟ್ಟರಾಜು ಲವರ್ ಆಫ್ ಶಶಿಕಲಾ' ಸಿನಿಮಾ ತುಮಕೂರಿನಲ್ಲಿ ನಡೆದ ಸತ್ಯ ಘಟನೆಯ ಸಿನಿಮಾವಾಗಿದೆ. ಖೋ ಖೋ ಆಟವನ್ನು ಆಧಾರಿಸಿದ ಸಿನಿಮಾ ಇದಾಗಿದೆ. ಬಹುತೇಕ ಈ ಸಿನಿಮಾದಲ್ಲಿ ಹೊಸ ಕಲಾವಿದರೆ ನಟಿಸಿದ್ದಾರೆ. ಸಿನಿಮಾದಲ್ಲಿ ಪ್ರೇಮ ಕಥೆ ಜೊತೆಗೆ ಕಾಮಿಡಿ ಅಂಶಗಳು ಇದೆಯಂತೆ.

ಇತ್ತೀಚಿಗೆ ಬಂದ ಹಾಡು

ಇತ್ತೀಚಿಗಷ್ಟೆ ಪ್ರೇಮಿಗಳ ದಿನದ ವಿಶೇಷವಾಗಿ 'ಮಾಜಿ ಡವ್..' ಎಂಬ ಒಂದು ಆಲ್ಬಂ ಹಾಡು ರಿಲೀಸ್ ಆಗಿತ್ತು. ಈ ಹಾಡಿನಲ್ಲಿ ಜಯಶ್ರೀ ಆರಾಧ್ಯ ನಟಿಸಿದ್ದರು. 'ಮಾಜಿ ಡವ್..' ಹಾಡಿನಲ್ಲಿ ಜಯಶ್ರೀ ಜೊತೆಗೆ ನಟನಾಗಿ ಸೋನಿ ಆಚಾರ್ಯ ಅಭಿನಯಿಸಿದ್ದರು. ನಟ ಶರಣ್ ಈ ಹಾಡನ್ನು ರಿಲೀಸ್ ಮಾಡಿದ್ದರು.