ಸಾಮಾಜಿಕ ಜಾಲತಾಣದಲ್ಲಿ ಹೆಸರು ದುರ್ಬಳಕೆ ದೂರು ನೀಡಿದ ಸಾಧುಕೋಕಿಲಾ

ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಹೆಸರು ಮತ್ತು ಚಿತ್ರವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ ಎಂದು ಕನ್ನಡ ಖ್ಯಾತ ಹಾಸ್ಯನಟ ಸಾಧುಕೋಕಿಲಾ ದೂರು ದಾಖಲಿಸಿದ್ದಾರೆ.

ಸಾಧುಕೋಕಿಲಾ ಹೆಸರಲ್ಲಿ ಫೇಸ್‌ಬುಕ್, ಟ್ವಿಟ್ಟರ್‌ನಲ್ಲಿ ಹಲವಾರು ಖಾತೆಗಳಿದ್ದು, ಆ ಖಾತೆಗಳಲ್ಲಿ ಕೆಲವು ಜಾಹೀರಾತುಗಳನ್ನು ಪ್ರದರ್ಶಿಸುವುದು, ಪೇಯ್ಡ್ ಲಿಂಕ್‌ಗಳನ್ನು ಪ್ರಕಟಿಸುವುದು ಮಾಡುತ್ತಿವೆ.

ಫೇಸ್‌ಬುಕ್, ಇನ್‌ಸ್ಟಾಗ್ರಾಂ, ಟ್ವಿಟ್ಟರ್‌ಗಳಲ್ಲಿ ತಮ್ಮ ಫೋಟೋ, ಹೆಸರನ್ನು ದುರ್ಬಳಕೆ ಮಾಡಿಕೊಂಡಿದ್ದಾರೆ, ಇದು ತಮ್ಮ ಗೌರವಕ್ಕೆ ಧಕ್ಕೆ ತರುವ ಯತ್ನವಾಗಿದೆ ತಪ್ಪಿಸ್ಥರ ವಿರುದ್ಧ ಕ್ರಮಕೈಗೊಳ್ಳಬೇಕೆಂದು ಸಾಧುಕೋಕಿಲಾ ಅವರು ದಕ್ಷಿಣ ವಿಭಾಗದ ಸಿಇಎನ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.

ಸಾಧುಕೋಕಿಲಾ ಮಾತ್ರವಲ್ಲದೆ ಹಲವು ನಟ-ನಟಿಯರ ಬಗ್ಗೆ ಫೇಸ್‌ಬುಕ್ ಪೇಜ್‌ಗಳು ಚಾಲ್ತಿಯಲ್ಲಿವೆ. ಕೆಲವು ಫ್ಯಾನ್‌ ಪೇಜ್‌ಗಳಾಗಿದ್ದು, ಅವು ಜಾಹೀರಾತು, ಪೇಯ್ಡ್ ಲಿಂಕ್ ಶೇರ್‌ನಿಂದ ದೂರ ಉಳಿದಿವೆ, ಆದರೆ ಕೆಲವು ಪೇಜ್‌ಗಳು ಜಾಹೀರಾತು ಪ್ರಕಟಣೆ, ಸುಳ್ಳು ಸುದ್ದಿಗಳ ಪ್ರಸಾರ ಮಾಡುತ್ತಿವೆ.